ၽွင်းသဵင်ၵွင်ႈယဵၼ် 9 မိုဝ်ႉ 10 ဝၼ်းမႃးၼႆႉ သိုၵ်းၵဝ်ႈၵၢင်ႉ MNDAA ၸႂ်ႉၵူၼ်းမိူင်းၽၵ်ၵႃႇ ႁုင်မိုဝ်ႉပၼ်ၶဝ်ႈၼမ်ႉတၢင်းၵိၼ်တႃႇ လုၵ်ႈသိုၵ်းၶဝ် ၼိုင်ႈတႃႇလႂ် သဵင်ႈၶဝ်ႈသၢၼ်ထူင်လူင် 5 ထူင် ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶၢဝ်းသဵင်ၵွင်ႈယဵၼ်ၼႆႉ တီႈပၢင်ႇသၢႆးၼႆႉ သိုၵ်းၵဝ်ႈၵၢင်ႉၶဝ် ႁွင်ႉပေႃႈမႄႈၵူၼ်းမိူင်းၼႂ်းပွၵ်ႉ ၸိူဝ်းၵိုတ်းဝႆႉတၢင်းႁိူၼ်းယေး။ႁႂ်ႈၵႂႃႇတူမ်ႈႁုင်ၶဝ်ႈၽၵ်းယဝ်ႉၵေႃႈ သႂ်ႇၼႂ်းဢႅပ်ႇပၼ်ၶဝ်ဢေႃႈ။ လႆႈၼိုင်ႈၶဝ်ႈပၼ်ၶဝ် ၼိုင်ႈတႃႇလႂ် မွၵ်ႈ ၶဝ်ႈသၢၼ်ထူင်ၸၢၼ်ႈလူင် 5 ထူင်ၼႆႉဢေႃႈ ” – ဝႃႈ ၼႆ။

ဢၼ်သိုၵ်းၵဝ်ႈၵၢင်ႉ ၸႂ်ႉၵူၼ်းမိူင်းႁုင်ႉမိုဝ်ႉၶဝ်ႈၽၵ်းပၼ်ၶဝ်ၼႆႉ ပဵၼ်တီႈ ပွၵ်ႉ 8 ၸႄႈဝဵင်းပၢင်ႇသၢႆး ၸႄႈတွၼ်ႈမူႇၸေႊ လႅၼ်လိၼ်တႆး – ၶႄႇ ။ ၵူၼ်းမိူင်းတႄႉ ယွၼ်ႉၵူဝ်လၢႆပႃႈလၢႆၾၢႆႇ လၢႆလွင်ႈလၢႆဢၼ်လႄႈ ၵႃႈလႆႈႁဵတ်းၸွမ်းၼင်ႇၵႂၢမ်းသင်ႇသိုၵ်းၵဝ်ႈၵၢင်ႉ  လႆႈႁူႉၼင်ႇၼႆ။

ၵူၼ်းၼႂ်းပိုၼ်ႉတီႈသိုပ်ႇလၢတ်ႈဝႃႈ – “ ၵၢင်ၸႂ်ၵူၼ်းမိူင်းတေႉ တေဢမ်ႇၽွမ်ႉႁဵတ်းပၼ် ႁၼ်ပိူၼ်ႈယိပ်း ၵွင်ႈၵၢင်ႇသေ မႃးၸႂ်ႉၵေႃႈ ၵႃႈလႆႈၵႂႃႇႁဵတ်းပၼ်ၼၼ်ႉၶႃႈၼႃႇ ” – ဝႃႈၼႆ။

တၢင်းၵိၼ်တၢင်းယမ်ႉၸိူဝ်းၼႆႉတႄႉ ၾၢႆႇသိုၵ်းၵဝ်ႈၵၢင်ႉႁၢင်ႈႁႅၼ်းဢဝ်မႃးသေ ၵူၼ်းမိူင်းပၢင်ႇသၢႆး လႆႈႁုင်မိုဝ်ႉပၼ်ပိူင်လဵဝ်ၵူၺ်း ႁႂ်ႈပေႃးယွၼ်းၶဝ်ႈၼမ်ႉတၢင်းၵိၼ်တီႈၵူၼ်းမိူင်းတႄႉဢမ်ႇမီး ၵူၼ်းပိုၼ်ႉတီႈသိုပ်ႇလၢတ်ႈၼင်ႇၼႆ။

သိုၵ်းဢူၺ်းလီပွတ်းႁွင်ႇ 3 ၸုမ်း လေႃႇတိုၵ်းသိုၵ်းမၢၼ်ႈမႃးၶိူဝ်းယႂ်း လိူဝ်ၼၼ်ႉ ယိုတ်းလႆႈတပ်ႉလႄႈမၢၵ်ႇၵွင်ႈၸိုၼ်းယၢမ်းသိုၵ်းမၢၼ်ႈတင်းၼမ်။ ၼႂ်းၵႄႈၼၼ်ႉ ၵူၼ်းမိူင်းတူၵ်းၸႂ်ၵူဝ်ႁႄ ၽူင်ႉပၢႆႈၵူႈႁူးၵူႈတၢင်း ။မိူဝ်ႈလဵဝ်  ဢမ်ႇပဵၼ်ပၢင်တိုၵ်းသင်ၵေႃႈယႃႇ ၵူၼ်းမိူင်းႁၼ်သိုၵ်းတူင်ႉၼိုင်ၵႂႃႇမႃးၵူၺ်းၵေႃႈ ပေႃးလွမ်ၵူဝ်မႆႈၸႂ်ပႂ်ႉထႃႈ ၵူဝ်သိုပ်ႇပဵၼ်ပၢင်တိုၵ်းၵၼ်ထႅင်ႈႁၢဝ်ႈႁႅင်း။