ၵူၼ်းဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ တုၵ်းယွၼ်း ႁႂ်ႈလႆႈပွၵ်ႈၶိုၼ်းႁိူၼ်းၽႂ်မၼ်း ယွၼ်ႉပၢႆႈၽေးသိုၵ်းမႃး ၸမ်လိူၼ် ယဝ်ႉလႄႈ မႆႈၸႂ် ႁိူၼ်းယေးသူၼ်ႁႆႈၼႃးၵၼ် ဝႃႈၼႆ။

တႄႇဢဝ် ဝၼ်းတီႈ 27/10/2023 ၼၼ်ႉမႃးသေ ႁၢၼ်ႉတေႃႇထိုင်ယၢမ်းလဵဝ် ၸမ်လိူၼ်ယဝ်ႉ ၵူၼ်းဝၢၼ်ႈၵၢတ်ႇ၊ ဝၢၼ်ႈလူင် ၼႂ်းဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ဢွၼ်ၵၼ်ပၢႆႈၽေးသိုၵ်း ယွၼ်ႉသိုၵ်းမၢၼ်ႈ ယိုတ်းမိူင်းတင်း ၸုမ်း ဢူၺ်းလီ ပွတ်းႁွင်ႇ 3 ၸုမ်း ပိုတ်းယိုဝ်းၵၼ် ႁၢဝ်ႈႁႅင်း။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ပၢႆႈၽေးသိုၵ်းမႃးတၢင်း မိူင်းယေႃၼႆႉ တင်ႈတႄႇ ဝၼ်းတီႈ 27 လိူၼ်ပူၼ်ႉမႃးၶႃႈဢေႃႈ။ ႁၢၼ်ႉတေႃႇထိုင်ယၢမ်းလဵဝ် ပႆႇလႆႈပွၵ်ႈႁိူၼ်း။ တီႈတပ်ႉမိူင်းၵႅတ်ႈၼၼ်ႉၵေႃႈ ၸုမ်းဢူၺ်းလီၶဝ် ပေႃးသိမ်းလႆႈ မိူဝ်ႈဝၼ်းတီႈ 23/11/2023 ၼႆႉယဝ်ႉ။ ယၢမ်းလဵဝ် တီႈတပ်ႉမိူင်းၵႅတ်ႈၼႆႉ ၸုမ်းဢူၺ်းလီၶဝ် ဢဝ်ၵႃးပႅၵ်ႉၶူဝ်ႉ မႃးထုၺ်ႇလိၼ်ၼိူဝ်မၼ်းယဝ်ႉၶႃႈ”- ဝႃႈၼႆ။

ဝၢႆးၸုမ်းဢူၺ်းလီ ယိုတ်းလႆႈ တပ်ႉသိုၵ်းမၢၼ်ႈ တီႈဢိူင်ႇၵႅတ်ႈၼႆႉယဝ်ႉ ၵူၼ်းပၢႆႈၽေး မၢင်ၸိူဝ်း ဢွၼ်ၵၼ်ပွၵ်ႈၶိုၼ်းဝၢၼ်ႈ။ ယူႇတီႈၸုမ်းဢူၺ်းလီၶဝ် ဢမ်ႇပၼ်ၶဝ်ႈဝၢၼ်ႈ လၢတ်ႈဝႃႈ လူဝ်ႇၵူတ်ႇထတ်းမၢၵ်ႇမႅင်း – ၵူၼ်းပိုၼ်ႉတီႈ ဝဵင်းလႃႈသဵဝ်ႈလၢတ်ႈ ။

“ဢၼ်ယူႇၼႂ်းဝၢၼ်ႈဝႆႉသေ ဢမ်ႇပၼ် ၵူၼ်းဝၢၼ်ႈၶဝ်ႈၼႆႉ ပဵၼ်သိုၵ်းလွႆၶႃႈဢေႃႈ။ ၵူၼ်းဝၢၼ်ႈၼႆႉ ဢွၼ်ၵၼ်ပွၵ်ႈမိူဝ်းၶိုၼ်း တင်ႈတႄႇ ဝၼ်းတီႈ 24 -25 -26- 27 ၼႆႉယဝ်ႉ ၶဝ်တိုၼ်းဢမ်ႇပၼ်ၽႂ်ၶဝ်ႈၼႂ်းဝၢၼ်ႈ။ ၶဝ်လၢတ်ႈဝႃႈ လူဝ်ႇၵူတ်ႇထတ်းမၢၵ်ႇ မႅင်း ၸွမ်းၼႂ်းမူႇဝၢၼ်ႈၼႆၶႃႈဝႃႈ။ ၵူၺ်းၵႃႈ ၶဝ်သမ်ႉဢဝ်ၶူဝ်းၶွင် ၵူၼ်းဝၢၼ်ႈ မိူၼ်ၼင်ႇ လဵၵ်းယွၵ်း၊ ဢီႇၸေႃးရူတ်ႉၶိူင်ႈ၊ ရူတ်ႉ ၶိူင်ႈၵဝ်ႇ ၸိူဝ်းၼႆႉ တေႃႉသႂ်ႇၵႃးသေ ဢဝ်ၵႂႃႇၶၢႆၵိၼ်ၶႃႈဢေႃႈ လွင်ႈၼႆႉ ႁဝ်းၶႃႈ ဢမ်ႇႁၼ်လီၸွမ်းၶႃႈ။ ဢၼ်ၶဝ်ဝႃႈ လူဝ်ႇ ၵူတ်ႇထတ်းမၢၵ်ႇမႅင်းၼႆၼၼ်ႉ ယွၼ်ႉၶဝ်လူဝ်ႇဢဝ်ၶူဝ်းၶွင်ၵူၼ်းဝၢၼ်ႈၶၢႆၵိၼ်ၵူၺ်း ႁဝ်းၶႃႈ ႁၼ်တႄႉ။ ႁဝ်းၸဝ်ႈႁိူၼ်းတႄႉ မႆႈၸႂ်ဢေႃႈ ႁိူၼ်းႁဝ်းၶႃႈလူး”- ဝႃႈၼႆ။

ဢိူင်ႇမိူင်းၵႅတ်ႈၼႆႉ မီးၾၢႆႇဢွၵ်ႇဝဵင်းလႃႈသဵဝ်ႈ ယၢၼ်ဝဵင်း 30 လၵ်းပၢႆ ယဝ်ႉၵေႃႈ ယၢၼ်မိူင်းယေႃးမွၵ်ႈ 16 လၵ်း မီးၾၢႆႇဢွၵ်ႇ မိူင်းယေႃ မိူၼ်ၵၼ်။ တီႈဢိူင်ႇမိူင်းၵႅတ်ႈၼႆႉသမ်ႉ မူႇဝၢၼ်ႈတင်းမူတ်းမီး 12 မူႇဝၢၼ်ႈ။ ဢၼ်လႆႈပၢႆႈၽေးသိုၵ်းဝႆႉ ယၢမ်းလဵဝ် သမ်ႉ ပဵၼ်ၵူၼ်းဝၢၼ်ႈၵၢတ်ႇလႄႈ ဝၢၼ်ႈလူင် ၸိူဝ်းၼႆႉ။

ၸူဝ်ႈပၢင်တိုၵ်း ၼႂ်းဢိူင်ႇမိူင်းၵႅတ်ႈ ၶၢဝ်းတၢင်းၸမ်လိူၼ်ၼႆႉ ၵူၼ်းမိူင်းၺႃးၸၢၵ်ႇၸွမ်း လူၺ်ႈၸၢၵ်ႇမၢၵ်ႇလူင်တိူဝ်ႉသႂ်ႇ ၵေႃႉ ၼိုင်ႈ၊ ထုၵ်ႇၶႃႈႁႅမ်တၢႆ ၵေႃႉၼိုင်ႈလႄႈ ႁၢႆတူဝ် (တၢႆႁိုဝ်လိပ်းႁိုဝ်) ပႆႇႁူႉ ၵေႃႉၼိုင်ႈ ႁၢၼ်ႉတေႃႇထိုင်ယၢမ်းလဵဝ်။ ယဝ်ႉၵေႃႈ ၶူဝ်းႁိူၼ်းယေး၊ ႁၢၼ်ႉၶၢႆၶူဝ်းၵုၼ်ႇယွႆႈ ၸိူဝ်းၼႆႉၵေႃႈ ထုၵ်ႇယႃႉသွၵ်ႈတဝ်ထႅင်ႈ တင်းၼမ်။