ဝၼ်းတီႈ 25/11/2023 ယၢမ်းၵၢင်ၼႂ် 10 မူင်းၼၼ်ႉ သိုၵ်းၵဝ်ႈၵၢင်ႉ MNDAA ႁွင်ႉၵူၼ်းမိူင်းပၢင်ႇသၢႆး ၸတ်းပၢင်ၵုမ်ၶိုၵ်ႉၶၵ်ႉသေ လၢတ်ႈဝႃႈ ႁႂ်ႈၵူၼ်းပၢႆႈၽေးပွၵ်ႈၶိုၼ်းႁိူၼ်းၽႂ်မၼ်းၶိုၼ်းၽႂ်းၶၼ်။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းၵဝ်ႈၵၢင်ႉ ႁွင်ႉမွၵ်ႇဢဝ် ပေႃႈမႄႈၵူၼ်းမိူင်း ပူႇၵၢင်ႉပူႇၵႄႇ ႁူဝ်ပွၵ်ႉ ၼႂ်းဝဵင်းပၢင်ႇသၢႆး။ ၼႂ်းပၢင်ၵုမ်ၼၼ်ႉ ၶဝ်လၢတ်ႈဝႃႈ ငဝ်းလၢႆးၵတ်းယဵၼ်လီယဝ်ႉ တမ်းၸႂ် လႆႈယဝ်ႉ။ၵူၼ်းၸိူဝ်းပၢႆႈၽေး ဢွၵ်ႇယၢၼ်ႁိူၼ်းယေးၸိူဝ်းၼၼ်ႉ ၵႂႃႇယူႇလႂ်ၵေႃႈ ႁႂ်ႈပွၵ်ႈၶိုၼ်း ” – ဝႃႈၼႆ။
သိုၵ်းၵဝ်ႈၵၢင်ႉ MNDAA ၸတ်းပၢင်ၵုမ်ဢၼ်ၼႆႉ တီႈႁူင်းႁဵၼ်းသွၼ်လိၵ်ႈၶႄႇ ၼႂ်းပွၵ်ႉ 8 ၸႄႈဝဵင်းပၢင်ႇသၢႆး လႅၼ်လိၼ်တႆး-ၶႄႇ ။ ၼႂ်းၶၢဝ်းတၢင်း ဝၼ်းတီႈ 25 ထိုင် 27/11/2023 ၼႆႉ ႁႂ်ႈၶိုၼ်းဢွၼ်ၵၼ်ပွၵ်ႈၶိုၼ်းယူႇသဝ်း ႁိူၼ်းယေးၽႂ်မၼ်း ။ပေႃးပူၼ်ႉဝၼ်းဢၼ်ၶဝ် လၢတ်ႈဝႆႉၸိုင် ၶဝ်တေဢမ်ႇမၵ်းမၼ်ႈဝႃႈ ၵူၼ်းပၢႆႈၽေးယဝ်ႉ ဝႃႈၼႆထႅင်ႈ။
ၵူၼ်းၼႂ်းပိုၼ်ႉတီႈ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ပေႃးပူၼ်ႉဝၼ်းထီႉ ဢၼ်ၶဝ်လၢတ်ႈဝႆႉၼႆ ၵူၼ်းဢၼ်တိုၵ်ႉသွၼ်ႈယူႇဝႆႉ ၸွမ်းၶႅပ်ႇၼမ်ႉယၢင်းလႄႈသင် ယူႇတၢင်ႇတီႈတၢင်ႇလႅၼ်လႄႈသင် တေဢမ်ႇမၵ်းမၼ်ႈပဵၼ်ၵူၼ်းပၢႆႈၽေးၼႆဢေႃႈ” – ဝႃႈၼႆ။
လိူဝ်ၼၼ်ႉ ပေႃးထိုင်ၵၢင်ၶမ်ႈၵၢင်ၶိုၼ်း ၵူၼ်းမိူင်းတၵ်းတေဢမ်ႇလႆႈ ဢွၵ်ႇၼွၵ်ႈႁိူၼ်း ပေႃးႁၼ်မႅၼ်ႈၼႆ တၵ်းၺႃးတီႉၺွပ်း ဢမ်ႇမီးသုၼ်ႇလႆႈတူဝ်ၶိုၼ်းၼႆလူးၵွၼ်ႇ။ၵူၼ်းမိူင်းတႄႉ ထိုင်မိူဝ်ႈလဵဝ် ပႆႇႁတ်းတမ်းၸႂ်လႆႈ ယွၼ်ႉဝႃႈ သိုၵ်းၵဝ်ႈၵၢင်ႉလၢတ်ႈယူႇၾၢႆႇလဵဝ်ၵူၺ်းၼႆယဝ်ႉ။
ၵူၼ်းၼႂ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ – “ လွင်ႈၼႆႉ တိုၵ်ႉပဵၼ်ၾၢႆႇၵဝ်ႈၵၢင်ႉၶဝ် လၢတ်ႈၵူၺ်းလႄႈ ပႆႇမီးလွင်ႈတမ်းၸႂ်လႆႈတေႉတေႉၶႃႈ ” – ဝႃႈၼႆ။
ထိုင်မႃး ဝၼ်းတီႈ 26/11/2023 ၼႆႉ ဢမ်ႇမီးပၢင်တိုၵ်းသင်ယဝ်ႉသေတႃႉ သဵင်ၵွင်ႈတႅၵ်ႇတၢင်းပွတ်း ဝဵင်းဝၼ်းတဵင်ႈ ၾၢႆႇမိူင်းၶႄႇၼၼ်ႉထႅင်ႈလႄႈ ၵူၼ်းမိူင်းၸိူဝ်းၵိုတ်းယူႇၼႂ်းပၢင်ႇသၢႆး ၵူဝ်ႁႄတိုၼ်ႇသၢၼ်ႈထႅင်ႈ။ သိုၵ်းၵဝ်ႈၵၢင်ႉလၢတ်ႈဝႃႈ လွင်ႈၼႆႉ ပဵၼ်ၶႄႇၶဝ် ၽိုၵ်းၵၢၼ်သိုၵ်းၶဝ်ၵူၺ်းၼႆယဝ်ႉ။
ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သဵင်မၢၵ်ႇလူင်မိူဝ်ႈၼႆႉ ပဵၼ်သဵင်ဢၼ်ၶႄႇၶဝ် ၽိုၵ်းၵၢၼ်သိုၵ်းၶဝ် ၾင်ႇမိူင်းၶႄႇၵူၺ်းၼႆဢေႃႈ။ၼႂ်းပၢင်ၵုမ်တီႈပၢင်ႇသၢႆးၼႆႉၵေႃႈ ၶဝ်လၢတ်ႈပႃးလွင်ႈၼႆႉယူႇ။လၢတ်ႈဝႃႈယႃႇပေတူၵ်းၸႂ်ပေႃး ငိၼ်းသဵင်ၵွင်ႈသဵင်မၢၵ်ႇ။ၼၼ်ႉပဵၼ် ၶႄႇၽိုၵ်းၵၢၼ်သိုၵ်းၵူၺ်း ” – ဝႃႈၼႆ။
တႄႇဢဝ် ဝၼ်းတီႈ 30/10/2023 ၼၼ်ႉမႃး သိုၵ်းမၢၼ်ႈယိုတ်းမိူင်းတင်း သိုၵ်းၵဝ်ႈၵၢင်ႉ MNDAA ပိုတ်းယိုဝ်းၵၼ် ၼႂ်းဝဵင်းပၢင်ႇသၢႆး ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ မႃးႁၢဝ်ႈႁႅင်းလႄႈ မၢၵ်ႇ လူင် တူၵ်းသႂ်ႇႁိူၼ်းယေး ၵူၼ်းဝၢၼ်ႈ တီႈပွၵ်ႉ 3 တင်းမူတ်း 6 လင်၊ ပွၵ်ႉ 4 သမ်ႉ 10 လင်လႄႈ ပွၵ်ႉ 6 တင်းမူတ်း 6 လင် တီႈဝၢၼ်ႈမႂ်ႇသမ်ႉ 12 လင် ၼႆယဝ်ႉ။
