မိူဝ်ႈၼႆႉ ဝၼ်းတီႈ 22/11/2023 ယၢမ်းၵၢင်ၼႂ်မွၵ်ႈ 10 မူင်း မၢၵ်ႇလူင် တူၵ်းသႂ်ႇၼႂ်းဝၢၼ်ႈၸၢမ်ၽိူၵ်ႇ ဝဵင်းသီႇပေႃႉ ၸႄႈ တွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈ လူႉတၢႆထင်တီႈ 1 ၵေႃႉ မၢတ်ႇၸဵပ်း 6 ၵေႃႉ ၼႆယဝ်ႉ။
ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်လႆႈႁူႉဝႆႉ သဵၼ်ႈမၢႆ ႁၢၼ်ႉတေႃႇထိုင် ဝၢႆးဝၼ်းၼႆႉ ၵူၼ်းဝၢၼ်ႈ လူႉတၢႆထင်တီႈ 1 ၵေႃႉ ပဵၼ်လုင်းၺၢၼ်ႇထေး ဢႃယုမွၵ်ႈ 49 ပီ ယဝ်ႉၵေႃႈ ၽူႈၸၢႆးထႅင်ႈ 3 ၵေႃႉ ၼၼ်ႉတႄႉ မၢတ်ႇၸဵပ်း။ လိူဝ်ၼၼ်ႉ ၼၢင်းယိင်းထႅင်ႈ 3 ၵေႃႉ ၼၼ်ႉၵေႃႈ မၢတ်ႇၸဵပ်းမိူၼ်ၵၼ်။ ယၢမ်းလဵဝ် ၵူၼ်းမၢတ်ႇၸဵပ်းၼႆႉ လႆႈသူင်ႇယူတ်းယႃ ဝႆႉတီႈႁူင်းယႃလူင် ဝဵင်းလႃႈသဵဝ်ႈယဝ်ႉ”- ဝႃႈၼႆ။
ပၢင်တိုၵ်း သိုၵ်းမၢၼ်ႈတင်း သိုၵ်းတဢၢင်း TNLA ၼႆႉ တႄႇပဵၼ်မႃး မိူဝ်ႈၼႆႉ ယၢမ်းၵၢင်ၼႂ်ၸဝ်ႉ တေႃႇထိုင်ယၢမ်းလဵဝ် ၵူၼ်း မိူင်းမႆႈၸႂ် ဢမ်ႇႁတ်းဢွၵ်ႇႁိူၼ်း။ လိူဝ်ၼၼ်ႉ ၼႂ်းၵႄႈသဵၼ်ႈတၢင်းလူင် သီႇပေႃႉ – ၵျွၵ်ႉမႄး ၸိူဝ်းၼႆႉၵေႃႈ ၺႃးတတ်းၶၢတ်ႇ ယဝ်ႉၵေႃႈ ၸွမ်းႁိမ်းၶူဝ်လူင် တၢင်းဢွၵ်ႇဝဵင်း ၸိူဝ်းၼၼ်ႉၵေႃႈ သိုၵ်းမၢၼ်ႈ ပႂ်ႉၵူတ်ႇထတ်းၵူၼ်းမိူင်းၵႂႃႇမႃး ႁၢဝ်ႈႁႅင်းထႅင်ႈ။
ယၢမ်းလဵဝ် ၵူၼ်းမိူင်းသီႇပေႃႉ ဢွၼ်ၵၼ်ငိူင်ႉပၢႆႈၽေးသိုၵ်းဝႆႉ တီႈဝတ်ႉၽူဝ်းတေႃႇ မီးႁူဝ်ၵူၼ်း 207 ၵေႃႉ ၼႂ်းၼၼ်ႉ ၸၢႆး 82 ၵေႃႉ၊ ယိင်း 125 ၵေႃႉ။ ပဵၼ်ၵူၼ်းဝၢၼ်ႈ ပွၵ်ႉၸၢင်ႈၶမ်းၸၢၼ်း၊ ဝၢၼ်ႈမႂ်ႇ၊ ၵၢင်ႉမေႃႇ၊ တူင်ႈၸၢင်ႉလႄႈ လၢဝ် ၶုၼ် ၸိူဝ်းၼႆႉ။ ငိူင်ႉပၢႆႈမႃးလႆႈ 2 ဝၼ်းယဝ်ႉ။
ယဝ်ႉၵေႃႈ တီႈဝတ်ႉၼမ်ႉႁူးၼွႆႉ မွၵ်ႈ 40 ပဵၼ်ၵူၼ်းဝၢၼ်ႈၽၢႆၸၢမ်ႇ၊ မူးလေး။ တီႈဝတ်ႉမၢၼ်ႈႁၢႆးသမ်ႉ မွၵ်ႈ 30 ၵေႃႉလႄႈ ဝတ်ႉ ၼွၵ်ႈၵၢတ်ႇ မွၵ်ႈ 20 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ