ၵူၼ်းၼုမ်ႇ ဝဵင်းသႅၼ်ဝီ ထုၵ်ႇၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း တီႉၺွပ်းၵုမ်းတူဝ်ၵႂႃႇ ဢမ်ႇယွမ်း 20 ယဝ်ႉ ၵူၼ်းပိုၼ်ႉတီႈ လၢတ်ႈ။

ၼႂ်းလိူၼ်ၼူဝ်ႊဝႅမ်ႊပိူဝ်ႊ 2023 ၼႆႉမႃး ဢွၼ်ႇၸၢႆးၼုမ်ႇ/ ယိင်းၼုမ်ႇ တီႈဝၢၼ်ႈတၢင်ႉသေႃႇ၊ မိူင်းပွၼ်း ၼႂ်းဢိူင်ႇၼမ်ႉၸ လၢပ်ႈလႄႈ ဝၢၼ်ႈၼမ်ႉသီးလီး ၼႂ်းဢိူင်ႇၸေႈဢူ ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ၸိူဝ်းၼႆႉ ထုၵ်ႇ ၸုမ်းယိပ်းၵွင်ႈၵၢင်ႉ ၸၢဝ်းၶိူဝ်း တီႉၺွပ်းၵုမ်းတူဝ်ၵႂႃႇၼမ် ၼႆယဝ်ႉ။

ၵူၼ်းၼုမ်ႇ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းၵဝ်ႈၵၢင်ႉ မႃးတီႉၵမ်းသိုဝ်ႈဢေႃႈ ၶဝ်တေတီႉဢဝ်ၵႂႃႇ ၵူၼ်း ၼုမ်ႇၽူႈၸၢႆး/ ၽူႈယိင်း ၸိူဝ်းၼႆႉ။ ယွၼ်ႉၼၼ်လႄႈ ႁဝ်းၶႃႈ ဢမ်ႇယူႇလႆႈသေ လႆႈပၢႆႈဢွၵ်ႇမႃးတၢင်းလႃႈသဵဝ်ႈၼႆႉဢေႃႈ။ ဢၼ်လႆႈႁူႉမႃးတႄႉ ယူႇတီႈ သိုၵ်းၵဝ်းၵၢင်ႉ တီႉၵႂႃႇၼႆႉ ၵူၼ်းၼုမ်ႇဝၢၼ်ႈတၢင်ႉသေႃႇ မီးမွၵ်ႈ 12 ၵေႃႉ။ ယဝ်ႉၵေႃႈ မိူင်းပွၼ်း ထႅင်ႈ။ တီႈဝၢၼ်ႈၼမ်ႉသီးလီး(ၶႄႇ) သမ်ႉ ပူၼ်ႉမႃးမွၵ်ႈ 9 ဝၼ်းၼႆႉ တီႉဢဝ်ၵႂႃႇမွၵ်ႈ 8 ၵေႃႉယဝ်ႉ။ တၢင်ႇဝၢၼ်ႈ ဢၼ်ႁဝ်းၶႃႈ ဢမ်ႇလႆႈႁူႉတႄႉ တေမီးထႅင်ႈၼမ်ယူႇ”- ဝႃႈၼႆ။

ၵၢင်လိူၼ်ၼူဝ်ႊဝႅမ်ႊပိူဝ်ႊၼႆႉ သင်ၶၸဝ်ႈ 4 တူၼ် တီႈမိူင်းၵူဝ်း ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇၼၼ်ႉၵေႃႈ ထုၵ်ႇသိုၵ်းၵဝ်းၵၢင်ႉ MNDAA တီႉၺွပ်းၵႂႃႇ။ ၼႂ်း 4 တူၼ်ၼၼ်ႉ ဢႃယု 18 လူင်းတႂ်ႈ 3 တူၼ်လႄႈ ဢႃယု 22 ပီ 1 တူၼ် ၼႆယဝ်ႉ။

လိူဝ်ၼၼ်ႉ ၵူၼ်းၼုမ်ႇ သီႇပေႃႉ သွင်ပီႈၼွင်ႉလႄႈ ၸဝ်ႈၵႃး ၵေႃႉၼိုင်ႈ လုၵ်ႉမူႇၸေႊမႃး တေပွၵ်ႈမိူဝ်းႁိူၼ်း တီႈဝဵင်းသီႇပေႃႉ သေ ထုၵ်ႇသိုၵ်းၵဝ်ႈၵၢင်ႉ တီႉၺွပ်း တီႈတူဝ်းၵဵၵ်ႉပၢင်ႇလေႃႉ ဝဵင်းသႅၼ်ဝီ ၼၼ်ႉၵေႃႈ ႁၢၼ်ႉတေႃႇထိုင်ယၢမ်းလဵဝ် ပႆႇပွႆႇတူဝ်မႃး။ ၵူၼ်းၼုမ်ႇ 2 ပီႈၼွင်ႉၼႆႉ ၸိုဝ်ႈႁွင်ႉ ၸၢႆးၽူင်းၼဵင်ႇဢူး ဢႃယု 15 ပီလႄႈ ၼွင်ႉယိင်း ၼၢင်း ဢွၼ်ႇၽူၺ်း ဢႃယု 10 ပီ။ ယဝ်ႉၵေႃႈ ၸဝ်ႈၵႃး ၸိုဝ်ႈႁွင်ႉ ၸၢႆးသႃႇဢူး ၼႆယဝ်ႉ။

ၸွမ်းၼင်ႇ ၽႅၼ်ၵၢၼ် 1027 ၸုမ်းဢူၺ်းလီပွတ်းႁွင်ႇ 3 ၸုမ်း ႁူမ်ႈၵၼ်လေႃႇတိုၵ်း တပ်ႉသိုၵ်းမၢၼ်ႈ ယိုတ်းမိူင်းမႃး ႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇၼႆႉမႃး ႁၢၼ်ႉတေႃႇထိုင်ယၢမ်းလဵဝ် ၸမ်ၶၢဝ်းတၢင်းၼိုင်ႈလိူၼ်ယဝ်ႉ ပၢင်တိုၵ်းပႆႇယဵၼ်။