မိူဝ်ႈၼႆႉ ဝၼ်းတီႈ 22/11/2023 ယၢမ်းၵၢင်ၼႂ် မၢၵ်ႇတႅၵ်ႇ တၢင်းဢွၵ်ႇဝဵင်းလၢဝ်ႇၵၢႆး ၼႂ်းၼႃႈလိၼ်ၽွင်းငမ်းတူဝ်ၵဝ်ႇ တပ်ႉ သိုၵ်းၵဝ်ႈၵၢင်ႉ MNDAA ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ တႅၵ်ႇတိူဝ်ႉသႂ်ႇၵူၼ်းမိူင်း လူႉတၢႆ ဢမ်ႇယွမ်း 3 ၵေႃႉ။
ၵူၼ်းပိုၼ်ႉတီႈ ဝဵင်းလၢဝ်ႇၵၢႆး လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇတႅၵ်ႇသႂ်ႇၵႃးၵူၼ်းမိူင်း တီႈတူင်ႇၶျၢၼ်း တၢင်းဢွၵ်ႇဝဵင်းလၢဝ်ႇ ၵၢႆးၼႆႉၶႃႈဢေႃႈ ၵူၼ်းမိူင်းလူႉတၢႆထင်တီႈ 3 ၵေႃႉၶႃႈ။ ယဝ်ႉၵေႃႈ ၵႃးဢၼ်ၶဝ်ၶီႇဢွၵ်ႇၵႂႃႇၼၼ်ႉၵေႃႈ ယွၵ်းယွႆမူတ်းၶႃႈ။ ယဝ်ႉ ၵေႃႈ ၵႃး Hijet ထႅင်ႈလမ်းၼိုင်ႈ ၼၼ်ႉတႄႉ ပူၼ်ႉတူင်ႇၶျၢၼ်းၵႂႃႇယဝ်ႉ ၺႃးမၢၵ်ႇလူင်ယိုဝ်းသႂ်ႇၼႆ ၶႃႈဢေႃႈ။ တၢႆမၢတ်ႇလႂ်ၵေႃႉ တႄႉ ဢမ်ႇႁူႉၶႃႈ ၵႃးတႄႉ ယွၵ်းယွႆမူတ်း။ ၵူၼ်းတႄႉ ႁၼ်တၢႆဝႆႉၸွမ်းတၢင်းဢေႃႈ”- ဝႃႈၼႆ။
ၸွမ်းၼင်ႇ ၽႅၼ်ၵၢၼ် 1027 ပၢင်တိုၵ်း ၸုမ်းဢူၺ်းလီပွတ်းႁွင်ႇ 3 ၸုမ်း သိုၵ်းတဢၢင်း TNLA သိုၵ်းၵဝ်ႈၵၢင်ႉ MNDAA လႄႈ သိုၵ်းရၶႅင်ႇ AA ႁူမ်ႈၵၼ်လေႃႇတိုၵ်း သိုၵ်းမၢၼ်ႈ ယိုတ်းမိူင်း မႃးႁၢဝ်ႈႁႅင်း ၼႂ်းမိူင်းတႆးပွတ်းႁွင်ႇ။ မိူၼ်ၼင်ႇ ၼႂ်းဝဵင်း ၼမ်ႉၽႃႈ၊ လၢဝ်ႇၵၢႆးလႄႈ ၵုၼ်လူင် ၸိူဝ်းၼႆႉ ၾၢႆႇသိုၵ်းၵဝ်ႈၵၢင်ႉ ႁႅၼ်းသိုၵ်းလေႃႇတိုၵ်း သိုၵ်းမၢၼ်ႈမႃးႁၢဝ်ႈႁႅင်း ႁၢၼ်ႇတေႃႇ ထိုင်ယၢမ်းလဵဝ် ၶၢဝ်းတၢင်းၸမ်လိူၼ်ယဝ်ႉ သဵင်ၵွင်ႈပႆႇယဵၼ်။
“ယၢမ်းလဵဝ် တီႈဝဵင်းလၢဝ်ႇၵၢႆးၼႆႉ ၶဝ်ႈသၢၼ် 1 ထူင် 3,000 ယႂၼ်ႊ (ငိုၼ်းၶႄႇ) ယင်းဢမ်ႇမီးတီႈသိုဝ်ႉယဝ်ႉ။ ၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ) 1 ပုင်း 10,000 ယႂၼ်ႊပၢႆယဝ်ႉၶႃႈ။ ၵူၼ်းမိူင်း ၸိူဝ်းၶမ်ဝႆႉတီႈဝဵင်းလၢဝ်ႇၵၢႆးၼႆႉ ၶႂ်ႈပွၵ်ႈမိူဝ်းၵၼ်ၼႃႇ ယဝ်ႉ။ မၼ်းဢမ်ႇၸၢင်ႈဢွၵ်ႇမိူဝ်းၶႃႈ ၵူဝ်ၺႃးမၢၵ်ႇၼၼ်ႉၶႃႈယဝ်ႉ။ တုၵ်ႉၶတႄႉဢေႃႈ ၶမ်ဝႆႉၼႂ်းၵႄႈပၢင်တိုၵ်းၸိူင်ႉၼႆ”- ၵူၼ်း ပိုၼ်ႉတီႈ ဝဵင်းလၢဝ်ႇၵၢႆး သိုပ်ႇလၢတ်ႈၼႄၼင်ႇၼႆ။
ယဝ်ႉၵေႃႈ မိူဝ်ႈၼႆႉ ဝၼ်းတီႈ 22/11/2023 ယၢမ်းၵၢင်ဝၼ်း 11:49 မူင်း မီးတရူၼ်း မႃးပွႆႇမၢၵ်ႇသႂ်ႇ တီႈဝတ်ႉၸေႇယ မင်ႇၵ လႃႇ တီႈဝၢၼ်ႈၼမ်ႉႁွႆတႂ်ႈ (အောက်နမ့်ဟွယ်ကျေးရွာ) မိူင်းယူႉ 105 လၵ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ တႅၵ်ႇတိူဝ်ႉ သႂ်ႇ သင်ၶၸဝ်ႈတူၼ်ၼိုင်ႈ လႆႈတိူဝ်ႉမၢတ်ႇၸဵပ်းႁၢဝ်ႈႁႅင်း ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ရူတ်ႉၵႃး ၼႂ်းဝတ်ႉထႅင်ႈလၢႆလမ်း လႄႈ ၸလွပ်ႈထႅင်ႈ 3 လင် ၼႆယဝ်ႉ။
