မိူဝ်ႈၼႆႉ ဝၼ်းတီႈ 16/11/2023 သိုၵ်းမၢၼ်ႈ ယိုတ်းမိူင်း ႁၢမ်ႈၵူၼ်းပၢႆႈၽေးသိုၵ်း ၶဝ်ႈဝဵင်းလႃႈသဵဝ်ႈ တီႈၵိၵ်ႉဢေးသျိူဝ်း ဝေႃး ႁူဝ်ပိုၵ်ႉ ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၵူဝ်ၸုမ်းဢူၺ်းလီ ပွမ်တူဝ်ၶဝ်ႈမႃး ၼႂ်းဝဵင်းၸွမ်းၵူၼ်းပၢႆႈ ၽေး ဝႃႈၼႆ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်းမၢၼ်ႈ ဢမ်ႇပၼ်ၵူၼ်းပၢႆႈၽေးၶဝ်ႈဝဵင်းလႃႈ သဵဝ်ႈယဝ်ႉ တႄႇမိူဝ်ႈၼႆႉ ဝၼ်းတီႈ 16 ၵႂႃႇ ၶဝ်ဝႃႈ ၵူဝ်သိုၵ်းတၢင်းၼွၵ်ႈ ၸပ်းမႃးၸွမ်းၵႃးၵူၼ်းပၢႆႈၽေး။ ယဝ်ႉ ၵေႃႈ ၼႂ်းဝဵင်း လႃႈသဵဝ်ႈၼႆႉ ၵူၼ်းပၢႆႈၽေးၼမ်ၼႃႇယဝ်ႉ ၵူဝ်ဢမ်ႇပေႉလဵင်ႉၵၼ်ၼႆၶႃႈဝႃႈ ဢၼ်ၶဝ်လၢတ်ႈၼႄႁဝ်း ၶႃႈတႄႉ။ ဢၼ်ၶဝ်ႁၢမ်ႈ ၼႆႉ ဢမ်ႇၸႂ်ႈတီႈၼႆႈ တီႈလဵဝ်ၵူၺ်း သဵၼ်ႈတၢင်းၶဝ်ႈဢွၵ်ႇဝဵင်းလႃႈသဵဝ်ႈ တင်းမူတ်းၶႃႈယဝ်ႉ”- ဝႃႈၼႆ။
ဢိင်ၼိူဝ် လွင်ႈသိုၵ်းမၢၼ်ႈ ႁၢမ်ႈၵူၼ်းပၢႆႈၽေး ၶဝ်ႈသွၼ်ႈယူႇ ၼႂ်းဝဵင်းလႃႈသဵဝ်ႈၼႆႉ ဢမ်ႇၸႂ်ႈတီႈတၢင်းၶဝ်ႈဢွၵ်ႇဝဵင်းလႃႈ သဵဝ်ႈ – သႅၼ်ဝီၼႆႉၵူၺ်း မိူၼ်ၼင်ႇ သဵၼ်ႈတၢင်းလူင် သီႇပေႃႉ – လႃႈသဵဝ်ႈ ၸိူဝ်းၼၼ်ႉၵေႃႈ ႁၢမ်ႈဢမ်ႇပၼ်ၶဝ်ႈမိူၼ်ၵၼ် ဝႃႈၼႆ။
“မိူဝ်ႈၼႆႉ ၽူႈၸွႆႈထႅမ် ၵူၼ်းပၢႆႈၽေးၶဝ် ၵႂႃႇႁပ်ႉၵူၼ်းသႅၼ်ဝီမႃး တေၶဝ်ႈမႃးၼႂ်းဝဵင်းလႃႈသဵဝ်ႈၼႆႉ ၶဝ်တိုၼ်းဢမ်ႇပၼ်ၶဝ်ႈ ဝဵင်းၼၼ်ႉယဝ်ႉ။ ပေႃးလႆႈဢဝ်ၵႂႃႇဝႆႉတီႈ ၵျွင်းၶူဝ်ၶမ်း တၢင်းၼွၵ်ႈဝဵင်းလႃႈသဵဝ်ႈႁဝ်းၼႆႉဢေႃႈ။ ယၢမ်းလဵဝ် ၵူၼ်းသႅၼ်ဝီ ဢၼ် ၶမ်ဝႆႉ ၼႂ်းၵႄႈပၢင်တိုၵ်းသေ တေပၢႆႈဢွၵ်ႇမႃးၼႆႉ မီးတင်းၼမ်ၶႃႈယဝ်ႉ။ တီႈဝဵင်းသႅၼ်ဝီၼႆႉ ပေႃးတူၺ်းငဝ်းလၢႆး မိူဝ်ႈၼႆႉတႄႉ ဢမ်ႇပေႃးၶႂ်ႈလီယဝ်ႉ ၵူဝ်မၼ်းမိူၼ်ၼင်ႇ တၢင်းဝဵင်းထၢၼ်းတလၼ်ႇ ၼႂ်းမိူင်းၶျၢင်း ၼၼ်ႉၵူၺ်းယဝ်ႉ”- ၵူၼ်းပိုၼ်ႉတီႈ ဝဵင်းလႃႈ သဵဝ်ႈ သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၸုမ်းဢူၺ်းလီ ပွတ်းႁွင်ႇ 3 ၸုမ်း ယိုတ်းလႆႈ ၼႂ်းဝဵင်းသႅၼ်ဝီယဝ်ႉသေတႃႉ ၵူၺ်းၵႃႈ မိူၼ်ၼင်ႇ တပ်ႉသိုၵ်းမၢၼ်ႈ ၸၵၶ 16 ၸိူဝ်းၼၼ်ႉသမ်ႉ ပႆႇယိုတ်းလႆႈ လွင်ႈၼႆႉ ၵူၼ်းမိူင်းမႆႈၸႂ် ၵူဝ်ၶဝ် ႁႅၼ်းသိုၵ်းလေႃႇတိုၵ်းၵၼ် ႁၢဝ်ႈႁႅင်းသေ ၵူဝ်မၢၵ်ႇ လူင် တူၵ်းသႂ်ႇ ၵူၼ်းမိူင်း ၸဵမ်ၸိူဝ်းၼႆႉ – ၽူႈၸွႆႈထႅမ် ၵူၼ်းပၢႆႈၽေးသိုၵ်းလၢတ်ႈ။
ယၢမ်းလဵဝ် ၵူၼ်းပၢႆႈၽေးသိုၵ်း တီႈဝဵင်ႈလႃႈသဵဝ်ႈၼႆႉ သဵၼ်ႈမၢႆၵူၼ်းပၢႆႈၽေး ႁၢၼ်ႉတေႃႇထိုင် ဝၼ်းတီႈ 13 ၼႆႉ တီႈဝတ်ႉပၢင် ၼႃး 630 ၵေႃႉ၊ ႁူင်းႁဵၼ်းၸိူဝ်ႉၸၢတ်ႈ မိူင်းယေႃ 440 ၵေႃႉ၊ ဝတ်ႉဝၢၼ်ႈဢၢႆႇၼိူဝ် 410 ၵေႃႉ၊ ဝတ်ႉၵၢင်မိူင်း 122 ၵေႃႉ၊ ဝတ်ႉ ႁူမ်ႈယဵၼ် 305 ၵေႃႉ၊ ဝတ်ႉတေႃးယ 350 ၵေႃႉ၊ ဝတ်ႉထမ်ႈၶမ်း 140 ၵေႃႉ၊ ဝတ်ႉႁူဝ်ပိုၵ်ႉ 381 ၵေႃႉ၊ ဝတ်ႉၼႃး မူၼ်း 35 ၵေႃႉ၊ ဝတ်ႉတႃႈပုင်ႇ 210 ၵေႃႉ၊ ဝတ်ႉမိူင်းတဵမ် 250 ၵေႃႉ၊ ဝတ်ႉၵွင်းၶၢမ် 375 ၵေႃႉ၊ ဝတ်ႉႁူဝ်ၼမ်ႉ 340 ၵေႃႉလႄႈ ဝတ်ႉဝၢၼ်ႈ သူႈ 2,000 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ