ပၢင်တိုၵ်း ၽႅၼ်ၵၢၼ်သိုၵ်း 11.11 ၼႂ်းၵႄႈသိုၵ်းမၢၼ်ႈလႄႈသိုၵ်းၵႅတ်ႇၶႄၵူၼ်းမိူင်းဢိၵ်ႇသိုၵ်းယၢင်းလႅင် ၸွမ်းလႅၼ်လိၼ်တႆး-ယၢင်းလႅင် ပဵၼ်ႁႅင်းဝႆႉလႄႈ ၵူၼ်းမိူင်းပၢႆႈၽေးသိုၵ်းထႅင်ႈ ႁွတ်ႈထိုင်ဝဵင်းသီႇသႅင်ႇ ၸိုင်ႈတႆးပွတ်းၸၢၼ်း။
ၵူၼ်းမိူင်းတူၼ်ႈတီးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ မိူဝ်ႈဝႃးၼႆႉႁၼ် လတ်းဝဵင်းတူၼ်ႈတီးၼႆႉပဵၼ် 10 လမ်းပၢႆဢေႃႈ။ ၵူၼ်းတဵမ်ၵူႈလမ်း။ ပဵၼ်ၵူၼ်းပၢႆႈၽေးသိုၵ်း လုၵ်ႉတၢင်းလႅၼ်လိၼ်တႆး-ယၢင်းလႅင်မႃးၶႃႈၵႂႃႈ။ လီဢီးလူၵျႃႉၶႃႈလႆ ပၢႆလိူဝ်ပဵၼ်ၶၢဝ်းၵတ်း။ ၶဝ်တေသိုပ်ႇၵႂႃႇတၢင်းလႂ်တႄႉဢမ်ႇႁူႉၶႃႈ ”- ဝႃႈၼႆ။
ၵူၼ်းပၢႆႈၽေးသိုၵ်းၸိူဝ်းၼႆႉပဵၼ်ၵူၼ်းလုၵ်ႉတၢင်းလႅၼ်လိၼ်တႆး-ယၢင်းလႅင်မႃး။ ဝၼ်းတီႈ 13/11/2023 ၼႆႉ ႁွတ်ႈထိုင်တီႈဝဵင်းသီႇသႅင်ႇဝႆႉၼပ်ႉႁူဝ်ပၢၵ်ႇၵေႃႉဝႃႈၼႆ။
ၽူႈၶဝ်ႈၵေႃႇမတီႇၸွႆႈထႅမ်ၵူၼ်းပၢႆႈၽေးသိုၵ်းတီႈဝဵင်းသီႇသႅင်ႇၵေႃႈလၢတ်ႈတီႈၽူႈတွႆႇႁွၵ်ႈဝႃႈ -“ ၶမ်ႈဝႃးထိုင်မႃးတီႈသီႇသႅင်ႇၽွင်ႈ။ ၶဝ်ဝႃႈတိုၵ်ႉၵိုတ်းပွတ်းတၢင်းထႅင်ႈၽွင်ႈၼႆဝႃႇ။ မႃးလၢႆၵေႃႉတႄႉပႆႇႁူႉႁူဝ်ယွႆႈတႅတ်ႈတေႃး။ ၼမ်တႄႉ ၼမ်ဢေႃႈဢၼ်ထိုင်ဝႆႉၼႆႉၵေႃႈၼမ်ၼႃႇယဝ်ႉ။ လူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ်ဢေႃႈတလဵဝ်” ဝႃႈၼႆ။
လွင်ႈၼႆႉၵူၼ်းပၢႆႈၽေးသိုၵ်းဢၼ်ႁွတ်ႈထိုင်ဝဵင်းသီႇသႅင်ႇလၢတ်ႈဝႃႈ တႄႇဝၼ်းတီႈ 11 လိူၼ် 11 ၼႆႉမႃး သဵင်ၵွင်ႈသဵင်မၢၵ်ႇယိုဝ်းၵၼ်မီးၵူႈဝၼ်း။ ၸိူဝ်းၶဝ်တႄႉပဵၼ်ၵူၼ်းၼႂ်းၸႄႈဝဵင်းၾၢႆၶုၼ်ဝႃႈၼႆ။
“သဵင်ၵွင်ႈတႅၵ်ႇတၢင်းဝၢၼ်ႈၵူႈဝၼ်း။ ၵူၼ်းတၢင်းမိူင်းပၢႆးၵေႃႈပၢႆႈမႃးတၢင်းၾၢႆၶုၼ်ဢေႃႈ။ ႁဝ်းၶႃႈၵူၼ်းတၢင်းၾၢႆၶုၼ်ၵေႃႈ ပၢႆႈမႃးတၢင်းၼႆႉဢေႃႈ။ သဵင်ၵွင်ႈၸမ်ဝၢၼ်ႈမႃးၵူႈဝၼ်းလႄႈ ၵူၼ်းၸိူဝ်းလုၵ်ႉတၢင်းၾၢႆၶုၼ်ပၢႆႈမႃးၼၼ်ႉၵေႃႈလႅပ်ႈတေၸွမ်းလင်ႁဝ်းၶႃႈမႃးယူႇ ” – ဝႃႈၼႆ။
ၽႅၼ်ၵၢၼ်သိုၵ်း 11.11 ၼႆႉ ၸုမ်းသိုၵ်းၸၢဝ်းၶိူဝ်းၼႂ်းမိူင်းယၢင်းလႅင် ပိုၼ်ၽၢဝ်ႇတႃႇယိုဝ်းသိုၵ်းမၢၼ်ႈၼႂ်းဝၼ်းတီႈ 11 လိူၼ်ၼူဝ်ႊဝႅမ်ႊပိူဝ်ႊ ၽွမ်ႉၽွမ်ႉၵၼ်။ ၼႂ်းၸုမ်းယိပ်းၵွင်ႈၸၢဝ်းၶိူဝ်း မီးၸုမ်းသိုၵ်းယၢင်းလႅင် KA ၊ တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈယၢင်းလႅင် KNDF ၊ တပ်ႉသိုၵ်းလွတ်ႈလႅဝ်းၵူၼ်းမိူင်းယၢင်းလႅင် KNPLF ၊ သိုၵ်းၵႅတ်ႇၶႄၵူၼ်းမိူင်း တီႊမူဝ်ႊသူဝ်ႊ DMO Local PDF လႄႈ ၸုမ်းသိုၵ်းလုၵ်ႉၽိုၼ်ႉၸၼ်ႉဝဵင်း တိူင်းသိုၵ်းပွတ်းၵၢင် URF ၵေႃၽႄၼႃႈလိၼ်သိုၵ်းၸိုင်ႈတႆးပွတ်းၸၢၼ်း လႄႈ သိုၵ်းၵႅတ်ႇၶႄၵူၼ်းမိူင်း မိူင်းယၢင်းလႅင် PDF ၶဝ်ၸိူဝ်းၼႆႉ ႁူမ်ႈၵၼ်သေ ယိုဝ်းတပ်ႉသိုၵ်းမၢၼ်ႈ တပ်ႉပၢင်သဝ်းမၢၼ်ႈၽွမ်ႉၽွမ်ႉၵၼ်ၼႂ်းပိုၼ်ႉတီႈ ၸိုင်ႈတႆးပွတ်းၸၢၼ်း လႅၼ်လိၼ်တႆး-ယၢင်းလႅင်( မိူၼ်ၵၼ်တင်းၵၢၼ်လုၵ်ႉၽိုၼ်ႉၽႅၼ်ၵၢၼ်သိုၵ်း 1027 မိူင်းတႆးပွတ်းႁွင်ႇ)။
ၼႂ်းဝၼ်းတႄႇပၢင်တိုၵ်းဝၼ်းတီႈ 11 ၼၼ်ႉၵူၺ်း ၸုမ်းသိုၵ်းၸၢဝ်းၶိူဝ်းၽွမ်ႉႁူမ်ႈ ယိုတ်းလႆႈတပ်ႉပၢင်သဝ်းသိုၵ်းမၢၼ်ႈ ဢၼ်မီးၼႂ်းၸႄႈဝဵင်းလွႆၶေႃ ၊ မိူင်းပၢႆးလႄႈ တီႊမူဝ်ႊသူဝ်ႊ 7 တီႈ။ ယိုတ်းလႆႈပႃးၶိူင်ႈၵွင်ႈၵၢင်ႇသိုၵ်းမၢၼ်ႈ ၶိူင်ႈယႂ်ႇၶွင်ႈလဵၵ်ႉလႄႈ မၢၵ်ႇမိုဝ်ႈၸိုၼ်းယၢမ်းထႅင်ႈ 100 ပၢႆ။ ပၢင်တိုၵ်းၵမ်းၼႆႉ ၸုမ်းသိုၵ်းၸၢဝ်းၶိူဝ်းယၢင်းလႅင် ယိုဝ်းတူၵ်းၶိူင်ႈမိၼ်ယိုဝ်းသိုၵ်းၶွင်ၸုမ်းသိုၵ်းမၢၼ်ႈလမ်းၼိုင်ႈ ၼႆတပ်ႉသိုၵ်းၵႅတ်ႇၶႄၵူၼ်းမိူင်းတီႊမူဝ်ႊသူဝ်ႊ ပိုၼ်ၽၢဝ်ႇမိူဝ်ႈဝၼ်းတီႈ 12 ၼူဝ်ႊဝႅမ်ႊပိူဝ်ႊၼၼ်ႉၼင်ႇၼႆ။
