ၽူႈၼမ်းၼႂ်းၵဝ်ႇ ၸုမ်းၸၢတ်ႈၸိုင်ႈလုမ်ႈၾႃႉ UN တူၵ်ႇတၵ်ႉဝႃႈ ၽူႈမီးပုၼ်ႈၽွၼ်းထုၵ်ႇလီ ၽွတ်ႈၸုမ်းသေဝႆႉၼၵ်းထတ်းထွင် Facebook တႃႇၵႄႈလိတ်ႈပၼ်ႁႃ ၸိူဝ်းၸႂ်ႉ Facebook သေလွၵ်ႇငိုတ်ႈ ၊ ၽိတ်းမေႃးၵၼ် ႁၢဝ်ႈႁႅင်းမႃးၵူႈဝၼ်း၊ ပႃးၵူၼ်းၸႂ်ႉ Facebook – ၼႂ်းမိူင်းႁူမ်ႈတုမ်မၢၼ်ႈ- ဝႃႈၼႆ။
ၶွပ်ႊၾီႊဢၼၼ်ႊ ၽူႈၼမ်းၼႂ်းၵဝ်ႇ ၸုမ်းၸၢတ်ႈၸိုင်ႈလုမ်ႈၾႃႉ UN တူၵ်ႇလၢတ်ႈဝႃႈ ဢၼ်ၸႂ်ႉ Facebook သေ ႁဵတ်းၶၢဝ်ႇပွမ်၊ လၢတ်ႈၵႂၢမ်းပႅင်းၸင်းၵၼ်၊ သႄႇယူင်းပူင်းၸႃႉ ႁႂ်ႈၵူၼ်းၶိူဝ်းၼိုင်ႈ လႄႈၶိူဝ်းၼိုင်ႈ၊ ၵူၼ်းၸုမ်းၼိုင်ႈလႄႈၸုမ်းၼိုင်ႈ ပီးပၼ်ႁႃၵၼ် သၢင်ႈႁႂ်ႈပဵၼ်ပၼ်ႁႃထိုင် ၸၼ်ႉ ၸိုင်ႈမိူင်း၊ ၸႂ်ယႂ်ႇ ၶေႃႈမုလ်းလူင်ပွင်ၸိုင်ႈၾၢႆႇလဵဝ်သေ ပိုၼ်ၽၢဝ်ႇၶၢဝ်ႇငၢဝ်းႁူၺ်းသူၼ်း ၸိူဝ်းၼႆႉ ႁၢဝ်ႇႁႅင်းမႃး ၵူႈမိုဝ်ႉ ၵူႈဝၼ်း။ ၼႂ်းၼၼ်ႉပႃးမိူင်းမၢၼ်ႈ ဢၼ်ၼိုင်ႈ။ ၵွပ်ႈၼၼ်လႄႈထုၵ်ႇလီၶိုင် ၶွတ်ႇ ၽွတ်ႈၸုမ်းသေ ပႂ်ႉထတ်းထွင်၊ တွၼ်ႈတႃႇပႂ်ႉတူၺ်းၵူၼ်း မိူင်းမၢၼ်ႈၵေႃႈ တိုၵ်းသူၼ်းႁႂ်ႈၽိူမ်ႉထႅမ် ႁႅင်းၵူၼ်းထႅင်ႈဝႃႈၼႆ။
ၶွပ်ႊၾီႊဢၼၼ်ႊ လၢတ်ႈတီႈ ၶရိတ်ႉသ်ၵွတ်ႇသ် ၸဝ်ႈၼႃႈတီႈၾၢႆႇႁဵတ်းဢွၵ်ႇ Facebook ဝႃႈ – ထုၵ်ႇလီပႂ်ႉတူၺ်း ၽူႈလႂ် ဢမ်ႇၼၼ် ၸုမ်းလႂ် တႅမ်ႈ၊ လၢတ်ႈၶေႃႈၵႂၢမ်းႁၢႆႉၸႃႉ ၊ ၶၢဝ်ႇပွမ် ဢၼ်တေ ၸၢင်ႈႁဵတ်းႁႂ်ႈ ဝၢၼ်ႈမိူင်းသုၵ်ႉယုင်ႈဢူၼ်ၵဝ်း၊ ၶၢဝ်ႇပွမ်ဢၼ်ၸၢင်ႈႁဵတ်းႁႂ်ႈမီးပၼ်ႁႃၶိူဝ်းၵူၼ်း၊ ဢၼ်ၸၢင်ႈႁဵတ်းႁႂ်ႈမီးၽေးတေႃႇသၢႆၸႂ်ၵူၼ်းၸိူဝ်းၼႆႉ ထုၵ်ႇလီတင်ႈၸုမ်းဢၼ်ႁူႉၽႃသႃၵႂၢမ်းလၢတ်ႈ ၶၢဝ်ႇလႄႈၶေႃႈၵႂၢမ်းဢၼ်လၢတ်ႈမႃးၸိူဝ်းၼၼ်ႉ၊ ထုၵ်ႇလီတုမ်ႉတွပ်ႇ၊ ဢဝ်လိူင်ႈ ၊ ၵႄႈၶႆဝႆးဝႆး- ဝႃႈၼႆ။
ၾၢႆႇႁွင်ႈၵၢၼ် Facebook တႄႉလၢတ်ႈဝႃႈ – တႃႇပႂ်ႉတူၺ်း Facebook ၼၼ်ႉ မီးႁႅင်းၵူၼ်း 7500 ။ ၵူၺ်းၵႃႈ တွၼ်ႈတႃႇမိူင်းမၢၼ်ႈတႄႉ တႃႇပႂ်ႉတူၺ်းFacebook ၼၼ်ႉ တေလႆႈထႅမ်ႁႅင်းၵူၼ်းထႅင်ႈ ဝႃႈၼႆ။
မိူဝ်ႈဝၼ်းထိ 1 လိူၼ်မေႊ ၼၼ်ႉၵေႃႈ ႁွင်ႈၵၢၼ် Facebook ၸတ်းႁဵတ်းပၢင်ၵုမ်လူင် F8 2018 Developer ။ ပိုၼ်ၽၢဝ်ႇဝႃႈ တေလႅၵ်ႈလၢႆႈ ၶပ်ႉမၢႆဢၼ်လၢၵ်ႇလၢႆးၽွင်ႈ။ ၼႂ်းၵၢၼ်လႅၵ်ႈလၢႆႈၼၼ်ႉ တေပႃးဢၼ်လၢင်ႉ ပိုၼ်းတူဝ်ၸဝ်ႈၵဝ်ႇ ဢၼ်ထႅမ်ဝႆႉၼႂ်း ၶေႃႈမုလ်း မိူဝ်ႈသၢင်ႈ Facebook ၼၼ်ႉ ဝႃႈၼႆ။
Facebook ၼႆႉၵေႃႇတင်ႈမီးမႃး မိူဝ်ႈပီ 2004 ၽူႈၵေႃႇသၢင်ႈပဵၼ် Mark Zuckerberg။ ၽႄႈတိူၼ်းၶဝ်ႈ ၼႂ်းၵုၼ်ဢေႊသျိူဝ်ႊ မိူဝ်ႈပီ 2008 – 2009 ၸိူဝ်းၼႆႉ။ ၽူႈၶဝ်ႈၸႂ်ႉFacebook ၼႂ်းလုမ်ႈၾႃႉၼိုင်ႈဝၼ်း ၽတ်ႉ ၽဵင်ႇမီး 2 ႁဵင်လၢၼ်ႉၵေႃႉ ။ ၽူႈယိင်းၸႂ်ႉ Facebook ၼမ်လိူဝ်ၽူႈၸၢႆး လႆႈႁူႉၸွမ်းၶေႃႈမုလ်ႊ Facebook Company – ပိုၼ်ၽၢဝ်ႇဝႆႉ။
