မိူဝ်ႈဝၼ်းတီႈ 27/10/2023  တႄႇယၢမ်းၵၢင်ၼႂ် 4 မူင်း သိုၵ်းမၢၼ်ႈတင်း သိုၵ်းဢူၺ်းလီပွတ်းႁွင်ႇ ပဵၼ်ပၢင်တိုၵ်းၵၼ် ႁၢဝ်းႁႅင်း ၼႂ်းၸႄႈဝဵင်းလႃႈသဵဝ်ႈ ႁဵတ်းႁႂ်ႈ ၵူၼ်းဝၢၼ်ႈ ပၢႆႈၽေးပၢင်တိုၵ်း တင်းၼမ်။

ၵူၼ်းမိူင်းပိုၼ်ႉတီႈ ဝဵင်းလႃႈသဵဝ်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ပၢင်တိုၵ်းၼႆႉမၼ်းဢမ်ႇပႆႇယဵၼ်လႆႈ။ ႁိူဝ်းမိၼ်မႃးယိုဝ်း၊ တေႃႇထိုင်ယၢမ်းလဵဝ်ၵေႃႈႁိူဝ်းမိၼ် တိုၵ်ႉမႃးယူႇ တိၵ်းတိၵ်း ။ မိူဝ်ႈတႄႇမၼ်းမီး 96 ၵေႃႉ ယၢမ်းလဵဝ်မႃးထႅင်ႈ 15 ၵေႃႉ။ ႁူမ်ႈၵၼ်မီးၵႂႃႇ 100 ပၢႆယဝ်ႉၶႃႈ။ ပဵၼ်ဝၢၼ်ႈမွၼ်း၊ ပၢင်ၸိူင်း၊ ၵုင်းသူင်၊ ၵွင်းတပ်ႉ၊ ၵွင်းၵေး လႄႈ မၢၵ်ႇၶီႈၼူၶႃႈ ” – ဝႃႈၼႆ။

ၸိူဝ်းပၢႆႈၽေးပၢင်တိုၵ်းၼႆႉ ၵမ်ႈၽွင်ႈၵေႃႈ ပၢႆႈသွၼ်ႈၸွမ်း ဝတ်ႉဝႃးၽႃသိူဝ်ႇ ၊ မၢင်ႇၸိူဝ်းၵေႃႈ ပၢႆႈယူႇသဝ်းဝႆႉ ၸွမ်းႁိူၼ်းယေးပီႈၼွင်ႉ ၼႂ်းဝဵင်းၸိူဝ်းၼႆႉ။ ယၢမ်းလဵဝ် ၼႂ်းၸႄႈဝဵင်းလႃႈသဵဝ်ႈၼႆႉ သဵင်ၵွင်ႈသဵင်မၢၵ်ႇ တႅၵ်ႇၵူႈႁူးၵူႈတၢင်းလႄႈ ၵူၼ်းဝၢၼ်ႈၵူၼ်းမိူင်း ဢွၼ်ၵၼ်တူၵ်းၸႂ်ၵူဝ်ႁႄ။

ၵူၼ်းမိူင်းပိုၼ်ႉတီႈ ဝဵင်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၸဵမ်မိူဝ်ႈ 4 မူင်းၵၢင်ၼႂ်မႃး တေႃႇထိုင် 9−10 မူင်းၼႆႉၵေႃႈယဵၼ်ၵႂႃႇ လႆႈဝႃႈၶၢဝ်းတၢင်း 5−6 ၸူဝ်းမူင်း  ၼႆႉၶႃႈဢေႃႈ။ ၽႂ်ၵေႃႈဢွၼ်ၵၼ်တူၵ်းၸႂ်ယူႇၶႃႈဢေႃႈ မၼ်းသမ်ႉမေႃးလူင်ၵႂႃႇၵူႈၾၢႆႇၵူႈတၢင်း ယဝ်ႉၶႃႈၼႃႇ။ ငဝ်းလၢႆးၼႂ်းဝဵင်းလႃႈသဵဝ်ႈၼႆႉၵေႃႈ တၢင်းၼႂ်ပုင်ႉပုင်ႉပင်ႉပင်ႉၵႂႃႇမူတ်း။ ပေႃးၶႂ်ႈဝႃႈ ယိုဝ်းလူင်ၵႂႃႇၵူႈတပ်ႉ ဢၼ်မီးၼႂ်းဝဵင်းလႃႈသဵဝ်ႈယဝ်ႉၶႃႈ ” ဝႃႈၼႆ။

 သိုၵ်းမၢၼ်ႈၶဝ် ၸႂ်ႉၶိူင်ႈမိၼ်ပွႆႇမၢၵ်ႇလေႃႇတိုၵ်းပႃးလႄႈ ႁဵတ်းႁႂ်ႈ ႁိူၼ်းၵူၼ်းဝၢၼ်ႈ တီႈဝၢၼ်ႈမၢၵ်ႇၶီႈၼူၵေႃႈ လူႉၵွႆၵႂႃႇၵမ်ႈၽွင်ႈ၊ လိူဝ်ၼၼ်ႉ တူဝ်းၵဵၵ်ႉႁူဝ်ပိုၵ်ႉၵေႃႈ ၺႃးပွႆႇမၢၵ်ႇ လူႉၵွႆမူတ်း ၵူၼ်းပိုၼ်ႉတီႈလၢတ်ႈၼင်ႇၼႆ။

ဝၼ်းတီႈ 25/10/2023 ယၢမ်းၵၢင်ၶိုၼ်း 11 မူင်းၼၼ်ႉၵေႃႈ သိုၵ်းမၢၼ်ႈယိုဝ်းၵွင်ႈလူင်သႂ်ႇ ၼႂ်းဝၢၼ်ႈႁူဝ်ၼမ်ႉ ႁဵတ်းႁႂ်ႈတိူဝ်ႉၺႃး ၵူၼ်းထဝ်ႈ ဢႃယု 50 ပၢႆၵေႃႉၼိုင်ႈတၢႆထင်တီႈလႄႈ ၵူၼ်းဝၢၼ်ႈမၢတ်ႇၸဵပ်း 2 ၵေႃႉ။ လိူဝ်ၼၼ်ႉ  ႁိူၼ်းယေးၵူၼ်းဝၢၼ်ႈႁူဝ်ၼမ်ႉ လႆႈလူႉၵွႆယွၼ်ႉၸၢၵ်ႇမၢၵ်ႇ ၼႆႉဢမ်ႇယွမ်း 2 လင်။