ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈလူင်ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/SSA လႆႈႁပ်ႉသူး ရၢင်းဝလ်း “တူၼ်ႈထမ်း” လွင်ႈတိုဝ်းၵမ် ႁဵတ်းသၢင်ႈလီ ။

ဝၼ်းတီႈ 04/05/2018 မူႇလၼိထိ ၸိတ်ႇတသူဝ်ၾူၼ်ႊၽႃဝၼႃးလႄႈ ၽူႈၵဵဝ်ႇၶွင်ႈၼႂ်းၸိုင်ႈထႆး မွပ်ႈယိုၼ်ႈသူးရၢင်းဝလ်း “တူၼ်ႈထမ်း” သိၼ်သီႇလလၢႆးႁဵတ်းသၢင်ႈလီ ထိုင်ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈလူင် RCSS/SSA တီႈၸၼ်ႉၸွမ်ရၢတ်ႊၶျၽတ်ႊၽရႃႊၼၶွၼ်ႊ ဢိူင်ႇဢၼုသႃဝရီႊ ပၢင်ႊၶဵၼ်ႊ မိူင်းၵွၵ်ႇ ၸိုင်ႈထႆး ။

ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း3 RCSS/SSA လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ဢၼ်ၸဝ်ႈႁူဝ်ပဝ်ႈ ႁဝ်းလႆႈႁပ်ႉသူးၼႆႉ ပဵၼ်ဢၼ်ယိၼ်းလီႁူမ်ၸူမ်းၸွမ်းတႄႉၶႃႈဢေႃႈ ၊ မၼ်းၸဝ်ႈၼႆႉ ပဵၼ်တူဝ်ယၢင်ႇလီတွၼ်ႈတႃႇၵူၼ်းၼုမ်ႇသႅၼ်းႁုၼ်ႈမႂ်ႇတႄႉတႄႉ၊ မၼ်းၸဝ်ႈမီး တၢင်းၶတ်းၸႂ်ၵူႈပၢႆး ႁႃလွၵ်းလၢႆးပူၵ်းပွင် လုၵ်ႈၼွင်ႉပွင်ႈပၢႆ ၵူၼ်းဝၢၼ်ႈၵူၼ်းမိူင်း၊ ဝၢၼ်ႈမိူင်းႁႂ်ႈၶိုၼ်ႈယႂ်ႇ မႂ်ႇသုင်မႃးတႃႇသေႇ ” ဝႃႈၼႆ။

တႃႇတေလႆႈမႃးႁပ်ႉသူးရၢင်းဝလ်းပွၵ်ႈၼႆႉ ၸွမ်သိုၵ်းလူင်ယွတ်ႈသိုၵ်း လႆႈႁပ်ႉၽိုၼ်လိၵ်ႈၽိတ်ႈမွၵ်ႇဝႆႉ ၸဵမ်မိူဝ်ႈလိူၼ်ဢေႊၿိူဝ်လ် 2018 ၼႆယဝ်ႉ။

သူးရၢင်းဝလ်းဢၼ်ၼႆႉ မွပ်ႈယိုၼ်ႈပၼ်ၽူႈဢၼ်မီးလွင်ႈတိုဝ်းၵမ်လီ၊ မီးသိၼ်ထမ်းတြႃး၊ ပဵၼ်တူဝ် ယၢင်ႇလီ၊ မီးလၢႆးႁဵတ်းလၢႆးသၢင်ႈလီ ပူၵ်းပွင်တူင်ႇဝူင်းၵူၼ်းဝၢၼ်ႈ ၊ မိူင်းၶိုၼ်ႈယႂ်ႇၼႆ ၶၢဝ်ႇတႆးလွတ်ႈလႅဝ်းၶွင် RCSS ဢွၵ်ႇဝႆႉ။ ၼႂ်းပၢင်ၼႆႉမီးၽူႈယႂ်ႇၵူၼ်းလူင်ၼႂ်းမိူင်းလၢဝ်း၊ ၵမ်ႇပူးၶျႃး ဢိၵ်ႇၸၢႆးငဝ်းၼၢင်းငဝ်း ၸိုဝ်ႈသဵင်ယႂ်ႇ ၸိူဝ်းၼႆႉၵေႃႈလႆႈႁပ်ႉ ဝႃႈၼႆ။

Photo by Sang Sai