ၸွမ်သိုၵ်းလူင် ယွတ်ႈသိုၵ်း မွၵ်ႇႁူပ်ႉ ၽူႈယၢမ်ႈႁၢပ်ႇၵၢၼ်ၸိူဝ်ႉၸၢတ်ႈ ၶဝ်ႈၸွႆႈၵၢၼ်ၽွမ်ႉႁူမ်ႈ

ၸွမ်သိုၵ်းလူင် ယွတ်ႈသိုၵ်း RCSS မွၵ်ႇႁူပ်ႉ ၽူႈယၢမ်ႈႁၢပ်ႇၵၢၼ်ၸိူဝ်ႉၸၢတ်ႈ ၸွမ်းလႅၼ်လိၼ်တႆး – ထႆး ႁူပ်ႉဢုပ်ႇ ၵၼ် တုၵ်းယွၼ်းႁႂ်ႈၸွႆႈပၼ်သိုၵ်းတႆး 2 ၾၢႆႇ ဢၼ်တိုၵ်းယိုဝ်းၵၼ်ဝႆႉယူႇၼၼ်ႉ ႁႂ်ႈလီၵၼ်ၶိုၼ်း ဝႃႈၼႆ။

ဝၼ်းတီႈ 10/03/2019 ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/ SSA မွၵ်ႇႁွင်ႉ ၽူႈယၢမ်ႈႁၢပ်ႇၵၢၼ်ၸိူဝ်ႉၸၢတ်ႈ မိူၼ်ၼင်ႇ ပူႇၼၢၼ်ၸေႃး (မုၼ်ၸဝ်ႈထၢၵ်ႈ)၊ ၸဝ်ႈၵၼ်းၸဵတ်း၊ ၸဝ်ႈ ပၢႆးမိူင်း၊ ၸဝ်ႈၶုၼ်ထူး(ၸဝ်ႈသူးလၢႆး) ဢိၵ်ႇလၢႆလၢႆၸဝ်ႈ ၸိူဝ်းယူႇၸွမ်းလႅၼ်လိၼ်တႆး – ထႆး မႃးႁူပ်ႉဢုပ်ႇၵၼ် ၵဵဝ်ႇ လူၺ်ႈ လွင်ႈပၼ်ႁႃ သိုၵ်းတႆး 2 ၸုမ်း ပိုတ်းယိုဝ်းၵၼ်ၼၼ်ႉ တေႁဵတ်းႁိုဝ် ႁႂ်ႈၸပ်းၵၼ် ပဵၼ်ဢၼ်လဵဝ်။

ၸွမ်သိုၵ်းလူင် ယွတ်ႈသိုၵ်းလၢတ်ႈၼႂ်းပၢင်ၵုမ်ဝႃႈ “ ယွၼ်းလွင်ႈၸွႆႈထႅမ်တီႈၵူၼ်းထဝ်ႈ ႁႂ်ႈၸွႆႈပၼ်၊ ယႃႇႁႂ်ႈ ပဵၼ်ၸႂ်ၾၢႆႇ လႂ် ႁႂ်ႈဝူၼ်ႉတႃႇတင်း 2 ၾၢႆႇ ႁႂ်ႈပေႃးပဵၼ် ယၢင်ၸပ်း ၵၼ်ၶိုၼ်း” ဝႃႈၼႆ။

RCSS ၼႆႉ ပဵၼ်ၸုမ်းလူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ယဝ်ႉ ဝႃႈၼႆသေတႃႉၵေႃႈ ဝၢႆးလူင်းလၢႆးမိုဝ်း NCA မႃးၼႆႉ သိုၵ်းလူင်ပွင်ၸိုင်ႈမၢၼ်ႈ တင်း RCSS ပဵၼ်ပၢင်တိုၵ်းၵၼ်မႃး ႁိမ်း 300 ပွၵ်ႈ။ ၸုမ်းဢူၺ်းလီပွတ်းႁွင်ႇ ဢၼ်မီးသိုၵ်း TNLA ၊ သိုၵ်း SSPP ၸိူဝ်းၼႆႉၵေႃႈ ၼႄး RCSS ပူၼ်ႉပႅၼ်ၽိုတ်ႉႁိမ်ၼႃႈလိၼ် ၼႂ်းမိူင်းတႆးပွတ်းႁွင်ႇ သေ ႁူမ်ႈၵၼ်တိုၵ်းယိုဝ်းပဵၼ်ပၢင်တိုၵ်းၵၼ်မႃး တင်ႈတႄႇႁၢင်ပီ 2015 တေႃႇထိုင်ဝၼ်းမိူဝ်ႈၼႆႉ။

ၸွမ်သိုၵ်းလူင် ယွတ်ႈသိုၵ်း ယင်းသိုပ်ႇလၢတ်ႈၼႂ်းပၢင်ၵုမ်ဝႃႈ “ တီႈတႄႉမၼ်း ႁဝ်းၵေႃႈ ဢမ်ႇၶႂ်ႈယိုဝ်း ၸင်ႇဝႃႈ ယူႇၾၢႆႇ တင်ႈႁပ်ႉ ၵႅတ်ႇၶႄတူဝ်မႃး တေႃႇထိုင်မိူဝ်ႈလဵဝ်ၼႆႉ ၶဝ်သမ်ႉပဵၼ်ၾၢႆႇၶိုၼ်ႈယိုဝ်း။ ႁဝ်းၵေႃႈ မုင်ႈမွင်း ႁႂ်ႈသင်ၶၸဝ်ႈ ၵူၼ်းမိူင်း ၶဝ်ႈယူႇၵၢင်ၸွႆႈထႅမ်ပၼ်။ မိူဝ်ႈလဵဝ် သိုၵ်းမၢၼ်ႈၼႆႉ တင်ႈၸႂ်ႁဵတ်းႁႂ်ႈႁဝ်းၽိတ်းၵၼ်” ဝႃႈၼႆ။

ၵဵဝ်ႇၵပ်းလွင်ႈႁူပ်ႉထူပ်းၼႆႉသေ ၸွမ်သိုၵ်းလူင် ယွတ်ႈသိုၵ်း တုၵ်းယွၼ်းပႃးဝႃႈ ပေႃးတင်းသွင်ၾၢႆႇဢုပ်ႇၵၼ်လႆႈ ၼႆ ၵေႃႈ ဢွၼ်တၢင်းသုတ်းတႄႉ ၵိုတ်းယိုဝ်း၊ ၽႂ်ယႃႇပေၶိုၼ်ႈယိုဝ်းၽႂ်၊ ယဝ်ႉၵေႃႈ ႁႂ်ႈယူႇတီႈၽႂ် တီႈမၼ်း ၵႂႃႇၵွၼ်ႇ ထွႆဝႃႇ ထွၼ်ဝႃႇ ၸိူဝ်း ၼႆႉ ပႆႇလူဝ်ႇႁဵတ်းသင် ဝႃႈၼႆ။

တီႈပၢင်ၵုမ်ၼၼ်ႉ ၸွမ်သိုၵ်းလူင် ယွတ်ႈသိုၵ်း ယင်းလၢတ်ႈဝႃႈ “ RCSS ၵႂႃႇယူႇတီႈပွတ်းႁွင်ႇၼၼ်ႉ တင်ႈတႄႇမိူဝ်ႈပီ 2006။ ၵူၼ်းသိုၵ်း ၼႂ်း RCSS/SSA 80% ၵေႃႈ ပဵၼ်ၵူၼ်းပွတ်းႁွင်ႇလၢႆလၢႆ။ သမ်ႉတေမႃးႁွင်ႉၸုမ်းပွတ်းၸၢၼ်း ၵေႃႈ ဢမ်ႇထုၵ်ႇ” ဝႃႈၼႆ။

ဢၼ်ပဵၼ်ပၢင်တိုၵ်းယူႇၼႂ်းမိူင်းတႆးပွတ်းႁွင်ႇၼႆႉ ၾၢႆႇ SSPP တႄႉဝႃႈ ယွၼ်ႉဢမ်ႇၼပ်ႉယမ်ၵၼ်၊ ဢမ်ႇယွမ်းႁပ်ႉ ၵၼ်၊ ဢၼ်ၽိုတ်ႉႁိမ်ပိုၼ်ႉတီႈၵၼ်ၼႆႉ ႁဵတ်းႁႂ်ႈၵူၼ်းမိူင်းလႆႈပႃးသွင်မႃႇ ႁၢပ်ႇသွင်ၵၢၼ်း ၵူၺ်းလႄႈ ႁႂ်ႈ RCSS ထွၼ်ပွၵ်ႈ ယူႇၶိုၼ်းတီႈၵဝ်ႇဢၼ်ယၢမ်ႈယူႇမႃးၼၼ်ႉလီသေပိူၼ်ႈယဝ်ႉ ဝႃႈၼႆ။