လိၵ်ႈႁူမ်ႈမၢႆၵိုတ်းတိုၵ်းတူဝ်ႈမိူင်း NCA ၼႆ့ လူႉ/ယၢႆႈၵႂႃႇ ၸဵမ်မိူဝ်ႈသိုၵ်းမၢၼ်ႈယိုတ်းမိူင်း ၼႂ်းႁူဝ်ပီ 2021 ၼၼ့်ယဝ့်ၼႆ ၸုမ်းသိုၵ်းၸိူဝ့်ၸၢတ်ႈယၢင်းၽိူၵ်ႇ KNU ၊ ၸုမ်းသိုၵ်းၸိူဝ့်ၸၢတ်ႈၶျၢင်း CNF ၊ ၸုမ်းလုၵ်ႈႁဵၼ်း တီႇမူဝ်ႇၶရႅၵ့်တိတ့် ၵဵဝ်ႇၵပ်းမိူင်းမၢၼ်ႈပတ်းပိုၼ့် ABSDF ၶဝ် 3 ၸုမ်း ႁူမ်ႈၵၼ်လူင်းလၢႆးမိုဝ်း ပိုၼ်ၽၢဝ်ႇဢွၵ်ႇမႃးၼင်ႇၼႆ။

ၵဵဝ်ႇၵပ်းလွင်ႈၼႆ့သေ ၽူႈၶၢၼ်ပၢၵ်ႇ ၸုမ်းသိုၵ်းၸၢတ်ႈၸၢတ်ႈယၢင်းၽိူၵ်ႇ KNU – ၽတူဝ်ႇၵလႄႇသေး လၢတ်ႈဝႃႈ NCA ၼႆ့ ယၢႆႈၵႂႃႇၸဵမ်မိူဝ်ႈသိုၵ်းမၢၼ်ႈယိုတ်းမိူင်း ပီ 2021 လိူၼ် Feb ဝၼ်းတီႈ 1 ယဝ့်။ ၵူၺ်းၵႃႈ ဢၼ်လႆႈပိုၼ်ၽၢဝ်ႇဢွၵ်ႇ ပဵၼ်တၢင်းၵၢၼ်တႄ့ ပဵၼ် ဝၼ်းတီႈ 10 လိူၼ်ထူၼ်ႈ 10 ပီ 2023 ၼႆ့။ ယူႇတီႈၸုမ်းလူင်းလၢႆးမိုဝ်းၵိုတ်းတိုၵ်းတူဝ်ႈမိူင်း ထႅင်ႈ 2 ၸုမ်းၵေႃႈ ႁၼ်ထိုင်မိူၼ်ၵၼ်လႄႈ ၸင်ႇလႆႈပိုၼ်ၽၢဝ်ႇၽွမ့်ၵၼ်ပဵၼ်တၢင်းၵၢၼ် ဝႃႈၼႆ။

တႃႇတေပဵၼ်မႃး လိၵ်ႈႁူမ်ႈမၢႆၵိုတ်းတိုၵ်းတူဝ်ႈမိူင်း NCA ၼႆ့ လႆႈလူင်းလၢႆးမိုဝ်းၸွမ်း တပ့်သိုၵ်းဢၼ်လဵဝ်ၵူၺ်းဢမ်ႇၸႂ်ႈ။ လူင်ပွင်ၸိုင်ႈ၊ တႅၼ်းၽွင်း၊ ၸုမ်းယိပ်းၵွင်ႈၸၢဝ်းၶိူဝ်း လႄႈ ၽူႈတူင့်ၼိုင်ၵၢၼ်မိူင်းၶဝ်ၸိူဝ်းၼႆ့ၵေႃႈ လႆႈၶဝ်ႈႁူမ်ႈၸွမ်း။ ၵူၺ်းၵႃႈ ၸွမ်းၼင်ႇငဝ်းလၢႆးၵၢၼ်မိူင်းဝၼ်းမိူဝ်ႈၼႆ့ တေဢမ်ႇၸၢင်ႈသိုပ်ႇႁူမ်ႈၵႂႃႇလႆႈတၢင်းၼႃႈယဝ့်ၼႆ ယႄးပေႃႇ သၼ်ႇၼီႇ ၽူႈၶၢၼ်ပၢၵ်ႇ ၸုမ်းသိုၵ်း ABSDF တွပ်ႇဝႆ့တီႈသိုဝ်ႇ VOA ၼင်ႇၼႆ။

မိူၼ်ၼႆ ၸဝ်ႈသိုၵ်းလူင်ၼေႃႇပူႇ ၽူႈၶၢၼ်ပၢၵ်ႇ သိုၵ်းၶၢင် KIA ၵေႃႈ လၢတ်ႈဝႃႈ – သိုၵ်းမၢၼ်ႈဝႃႈတႄ့ ပၢင်ဢုပ်ႇၵုမ်လွင်ႈငမ်းယဵၼ် ၊ ၶဝ်သမ့်ဢဝ်ၵူၼ်းမိူင်းတၢႆ ၊ယိုဝ်းၸုမ်းၸၢဝ်းၶိူဝ်းယဝ့် ၶိုၼ်းမႃးဢုပ်ႇၵုမ်လွင်ႈယမ်းယဵၼ် လွင်ႈၵၢၼ်မိူင်းၸိူင့်ၼႆၼႆ့ ဢမ်ႇမႅၼ်ႈလၢႆးမၼ်း၊ ၵွပ်ႈၼႆ ႁၼ်ထိုင်ဝႃႈ ပၢင်ဢုပ်ႇဢူဝ်းၼႆ့ ဢမ်ႇၸႂ်ႈပၢင်ဢုပ်ႇဢူဝ်းလွင်ႈငမ်းယဵၼ် ဢၼ်တေ့ဢၼ်မၢၼ်ႇမၼ်း ဝႃႈၼႆ။

ၼႂ်းဝၼ်းတီႈ 15 လိူၼ်ထူၼ်ႈ 10 ပီ 2023 ၼႆ့ တူၵ်းမႅၼ်ႈ ဝၼ်းလူင်းလၢႆးမိုဝ်းလိၵ်ႈႁူမ်ႈမၢႆၵိုတ်းတိုၵ်းတူဝ်ႈမိူင်း NCA ၶွပ်ႈတဵမ် 8 ပီ ။ ပၢင်မၢႆတွင်း ၶွပ်ႈၶူပ်ႇ NCA ၼႆ့ တေၸတ်းတီႈ ၼေႇပျီႇတေႃႇ ။ မီးၸုမ်းသိုၵ်း လူင်းလၢႆးမိုဝ်းၵိုတ်းတိုၵ်းတူဝ်ႈမိူင်း 7 ၸုမ်း တေၵႂႃႇၶဝ်ႈႁူမ်ႈ ။ ပဵၼ်ၸုမ်း ၶွင်ႇသီႇဢဝ်ၶိုၼ်းၸိုင်ႈတႆး RCSS ၊ ၸုမ်းသိုၵ်းပဢူဝ်း PNLO ၊ ၸုမ်းသိုၵ်း လႃးႁူႇ LDU ၊ ၸုမ်းသိုၵ်းရၶၢႆႇ ALP ၊ ၸုမ်းသိုၵ်းယၢင်းၽိူၵ်ႇ KNU/KNLA-PC ၊ ၸုမ်းသိုၵ်းယၢင်းၽိူၵ်ႇၵမ့်ၸွႆႈတီႇမူဝ်ႇၶရေႇသီႇ DKBA လႄႈ ပႃႇတီႇမိူင်းမွၼ်းမႂ်ႇ NMSP ၸဵမ်ၸိူဝ်းၼႆ့ ၼႆယဝ့်။
VOA