ဝၼ်းတီႈ 12/10/2023 ႁူဝ်ၶမ်ႈ 5 မူင်း ထိုင် 6 မူင်း(ယၢမ်းထႆး) ၸုမ်းၵူၼ်းၼုမ်ႇမိူင်းမၢၼ်ႈ ႁူမ်ႈၵၼ်ၸတ်းပၢင် Deadly Strike ၼႄၾၢင်ႁၢင်ႈ လွင်ႈသိုၵ်းမၢၼ်ႈဢဝ်ၵွင်ႈလူင် ယိုဝ်းသႂ်ႇတီႈပၢင်သဝ်းၵူၼ်းပၢႆႈၽေးသိုၵ်း တီႈမူင်ႈလၢႆးၶႅၵ်ႉ ၸႂ်ႉလၢႆးႁုၵ်ႉႁၢႆႉတေႃႇၵူၼ်းမိူင်း။

မိူဝ်ႈဝၼ်းတီႈ 9/10/2023 ၼၼ်ႉ သိုၵ်းမၢၼ်ႈတင်ႈၸႂ် ၸႂ်ႉၶိူင်ႈမိၼ် ပိုတ်းယိုဝ်း ပွႆႇမၢၵ်ႇလူင်သႂ်ႇ ပၢင်သဝ်းၵူၼ်းပၢႆၽေး  ႁိမ်းလၢႆႊၸႃႊ ငဝ်ႈငုၼ်း KIA ဢၼ်မီးတီႈမိူင်းၶၢင် ႁဵတ်းႁႂ်ႈၵူၼ်းမိူင်းတၢႆ 30 ပၢႆ မၢတ်ႇၸဵပ်း 50 ပၢႆ။ လုၵ်ႈဢွၼ်ႇလဵၵ်ႉလႅင် လႆႈတၢႆယွၼ်ႉၸၢၵ်ႇမၢၵ်ႇသိုၵ်းမၢၼ်ႈၼမ် ယွၼ်ႉၼၼ် ၸုမ်းၵူၼ်းၼုမ်ႇမိူင်းမၢၼ်ႈ ႁူမ်ႈၵၼ်ၸတ်းပၢင် Deadly Strike ၼႄၾၢင်ႁၢင်ႈ ႁႂ်ႈလုမ်ႈၾႃႉႁူႉထိုင် လွင်ႈၵူၼ်းမိူင်းလႆႈတိူဝ်ႉၸႂ် ။ ပၢင်ၼႄၾၢင်ႁၢင်ႈၼႆႉ ၸတ်းႁဵတ်းတီႈ ၽၵ်းတူတႃႈပႄး ၵၢင်ဝဵင်းၵဵင်းမႂ်ႇ ၸိုင်ႈထႆး။

ၼုမ်ႇၸၢႆးၸုမ်းၼႄၾၢင်ႁၢင်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸုမ်းႁဝ်းၶႃႈတႄႉ ဢမ်ႇလႆႈၵွင်ႉၸွမ်းၸုမ်း NGO  ၶဝ်သင်ၶဝ်။ ႁဝ်းၶႃႈ ပဵၼ်ၸုမ်းဢၼ် တူင်ႉၼိုင်ႈတႃႇသုၼ်ႇလႆႈသုၼ်ႇပဵၼ်ၵူၼ်း ယဝ်ႉၵေႃႈ ပဵၼ်ၸုမ်းပၢႆးမွၼ်းၸုမ်းၼိုင်ႈ။ ယိူင်းဢၢၼ်းဢၼ်ၼႄၾၢင်ႁၢင်ႈၼႆႉတႄႉၵေႃႈ ၶႂ်ႈႁႂ်ႈလုမ်ႈၾႃႉႁူႉထိုင် ဢၼ်သိုၵ်းမၢၼ်ႈၶဝ် ၸႂ်ႉလၢႆးႁုၵ်ႉႁၢႆႉၶႃႈႁႅမ် ၵူၼ်းမိူင်းၸိူဝ်းပဵၼ်ပူၼ်ႉမႃးၸိူဝ်းၼႆႉဢေႃႈ။ ၾၢင်ႁၢင်ႈဢၼ်ႁဝ်းၼႄတေႉၵေႃႈ ၼႄဝႃႈ ပေႃးၶိူင်ႈမိၼ်မႃးတိုၵ်းသႂ်ႇၼႆ မၼ်းလိူဝ်ၸႂ်ၵႃႈႁိုဝ် ယၢပ်ႇၽိုတ်ႇၵႃႈႁိုဝ်ၼႆၸိူဝ်းၼႆႉၶႃႈဢေႃႈ။ ပိူင်ပဵၼ်ၸိူဝ်းၼႆ။ လွင်ႈၸိူဝ်းၼႆႉ ယႃႇဝႃႈ ၵူၼ်းမိူင်းပိူၼ်ႈလႃႈ ၵူၼ်းၼႂ်းၸိုင်ႈမိူင်းလဵဝ်ၵၼ်ၵူၺ်းၵေႃႈ မၢင်ၵေႃႉတေဢမ်ႇႁူႉၸွမ်း ယွၼ်ႉၼၼ်လႄႈ ႁဝ်းၶႃႈ တၢင်တူဝ်ၵူၼ်းမိူင်းဢၼ်ၺႃးပေႉၵိၼ်လူလၢႆၸိူဝ်းၼၼ်ႉသေ ဢွၼ်ၵၼ်မႃးၸတ်းႁဵတ်းဢေႃႈ” – ဝႃႈၼႆ။

ပၢင်ၼႄၾၢင်ႁၢင်ႈပွၵ်ႈၼႆႉ မီးၵူၼ်းတုၵ်းယွၼ်းႁႂ်ႈၸွႆႈၵၼ်သူၼ်းဢီးလုမ်ႈၾႃႉ တႃႇပၼ်တူတ်ႈတၢမ်ႇသိုၵ်းမၢၼ်ႈ ႁႂ်ႈလႆႈ လိူဝ်ၼၼ်ႉ သူၼ်းဢီးႁႂ်ႈၵူႈၸိုင်ႈမိူင်း ယႃႇႁႂ်ႈၵမ်ႉထႅမ်သိုၵ်းမၢၼ်ႈယိုတ်းမိူင်း။

 ၼုမ်ႇၸၢႆးၸုမ်းၼႄၾၢင်ႁၢင်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ပေႃးမႃးတူၺ်းၸဵင်ႇသုၼ်ႇလႆႈသုၼ်ႇပဵၼ်သေ လၢတ်ႈၼႆၸိုင်သိုၵ်းမၢၼ်ႈဢမ်ႇထုၵ်ႇလီႁဵတ်းၸိူင်ႉၼႆသေဢိတ်း။ ပိူင်ပဵၼ်ဢၼ်ပဵၼ်ပဵၼ်မႃးၸိူဝ်းၼႆႉ ၶႂ်ႈႁႂ်ႈၽူႈမီးပုၼ်ႈၽွၼ်းၶဝ် ၵဵပ်းၶေႃႈမုလ်းမၼ်းဝႆႉ လီလီ။ယုမ်ႇယမ်ဝႃႈ ပေႃးထိုင်မႃးဝၼ်းၼိုင်ႈ တေၸၢင်ႈတၢင်ႇဢဝ်လိူင်ႈပၼ်တူတ်ႈတၢမ်ႇ သိုၵ်းမၢၼ်ႈလႆႈယူႇ။ယဝ်ႉၵေႃႈ ၸိုင်ႈမိူင်းဢၼ်ႁဵတ်းလွင်ႈသိုဝ်ႉၶၢႆၵပ်းသိုပ်ႇၵၼ်တင်းသိုၵ်းမၢၼ်ႈၸိူဝ်းၼၼ်ႉၵေႃႈ ႁႂ်ႈၵိုတ်းလိုဝ်ႈ။ယဝ်ႉၵေႃႈ ၸိုင်ႈမိူင်းဢၼ်ၶၢႆၼမ်ႉမၼ်းၶိူင်ႈမိၼ်ပၼ်သိုၵ်းမၢၼ်ႈၸိူဝ်းၼၼ်ႉၵေႃႈ ႁႂ်ႈၵိုတ်းၵၢၼ်ၶၢႆသေၵမ်း” – ဝႃႈၼႆ။

ႁွင်ႈၵၢၼ်ၾၢႆႇငိုၼ်းၵွင်ၵၢင်လုၵ်ႈဢွၼ်ႇၸၢတ်ႈၸိုင်ႈလုမ်ႈၾႃႉ ယူႊၼီႊသႅပ်ႉၾ် (UNICEF) ၵေႃႈ ပိုၼ်ၽၢဝ်ႇလၢတ်ႈမွၵ်ႇ မွင်ၸႂ်ၸွမ်းလွင်ႈပၢင်သဝ်းၵူၼ်းပၢႆႈၽေးသိုၵ်း တီႈလၢႆႊၸႃႊ ၺႃးသိုၵ်းမၢၼ်ႈၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ မိူဝ်ႈဝၼ်းတီႈ 9/10/2023 ယၢမ်းၶမ်ႈ ႁဵတ်းႁႂ်ႈ လုၵ်ႈဢွၼ်ႇလူႉတၢႆၸွမ်းၼမ်။

ၾၢႆႇၼိုင်ႈ UN Myanmar တူၵ်ႇလၢတ်ႈဝႆႉဝႃႈ ပၢင်သဝ်းၵူၼ်းပၢႆႈၽေးသိုၵ်းၼႆႉ မီးၼႂ်းၼႃႈ လိၼ်ၾၢႆႇလႂ် ၵေႃႈယဝ်ႉ ၸုမ်းယိပ်းၵွင်ႈၵၢင်ႇတိုၼ်းတေဢမ်ႇလႆႈဝႆႉပဵၼ်ပဝ်ႉမၢႆၵၢၼ်သိုၵ်းသေပိုတ်းယိုဝ်း ဝႃႈၼႆဝႆႉ။