မိူဝ်ႈၼႆႉ ဝၼ်းတီႈ 01/05/2024 ယၢမ်းဝၢႆးဝၼ်း 1 မူင်း ယူႇတီႈ ႁႅင်းၵၢၼ်ယၢၼ်မိူင်း ႁူမ်ႈၵၼ် ၵႂႃႇတၢင်ႇယိုၼ်ႈၶေႃႈတုၵ်းယွၼ်း ၼႂ်းဝၼ်းႁႅင်းၵၢၼ်လုမ်ႈၾႃႉ (May Day) တီႈလုမ်း ၾၢႆႇဢုပ်ႉပိူင်ႇၽွင်းငမ်း ၸႄႈတွၼ်ႈၵဵင်းမႂ်ႇ (သႃႇလႃးၵၢင်) ၸိုင်ႈထႆး ၼႆယဝ်ႉ။

ႁႅင်းၵၢၼ် ယၢၼ်မိူင်း ဢၼ်ၵႂႃႇၶဝ်ႈႁူမ်ႈ ပၢင်ယိုၼ်ႈလိၵ်ႈ တုၵ်းယွၼ်း တီႈၽူႈၵွၼ်းၸႄႈတွၼ်ႈၵဵင်းမႂ်ႇ ၼၼ်ႉ မၢင်ၸိူဝ်း ယိပ်းပၢႆႉ တုၵ်းယွၼ်း မိူၼ်ၼင်ႇ – ယွၼ်းႁႂ်ႈၶိုၼ်ႈပၼ်ၵႃႈႁႅင်း 1 ဝၼ်း 400 ဝၢတ်ႇ ၵူႈၼႃႈၵၢၼ် ၊ ယဝ်ႉၵေႃႈ ႁႂ်ႈတိူဝ်းပၼ် ဝႂ်ႁႅင်းၵၢၼ် 5 ပီ လိူဝ်ၼၼ်ႉ ႁႂ်ႈႁဵတ်းပၼ်တီႈလဵဝ်သေ ႁႂ်ႈယဝ်ႉၸွမ်းၵမ်းလဵဝ် – ဝႃႈၼႆ။

လိူဝ်ၼၼ်ႉ ယၢမ်းၵၢင်ၶမ်ႈ 5 မူင်း ႁႅင်းၵၢၼ် ၶွၼ်ႈတုမ်ၵၼ် တီႈလၢၼ်းဢၼုသဝလီး သၢမ်ၵသတ်ႇသေ ႁူမ်ႈၵၼ် ပႆတၢင်းၵႂႃႇ တီႈၽၵ်းတူတႃႈပႄး ဝဵင်းၵဵင်းမႂ်ႇ။ ယဝ်ႉၵေႃႈ ၼႄတၢင်းၵႃႈ ၼူၵ်ႉၵိင်ႇၼရီ/ ၵိင်ႇၼရႃႇ။ သပ်းၸႅင်ႈၼႄ လွင်ႈယိူင်းဢၢၼ်း တီႈလႆႈၸတ်းႁဵတ်းပၢင်ပွႆးလႄႈ လွင်ႈတူင်ႉၼိုင်။ လိူဝ်ၼၼ်ႉ ၸတ်းပၢင်ဢုပ်ႇၶႆႈ ၵဵဝ်ႇလူၺ်ႈလွင်ႈႁႅင်း ၵၢၼ်လႄႈ ႁူမ်ႈၵၼ် ႁွင်ႉၽဵင်းၵႂၢမ်း ပိၵ်ႉဢိုတ်းပၢင်ၵႂႃႇ ၼႆယဝ်ႉ။