ၼၢင်းယိင်းၵႃလီႉၵေႃႉၼိုင်ႈ ၺႃးၸူၼ်ၽၼ်းတႅင်းၶႃႈႁႅမ် သေ ဢဝ်ၵႃးလႄႈၶူဝ်းၶွင်ငိုၼ်းၶမ်းၵႂႃႇ

ၼၢင်းယိင်းၵူၼ်းၵႃလီႉၵေႃႉၼိုင်ႈ ၺႃးၸူၼ်ၽၼ်းတႅင်းၶႃႈႁႅမ်ၽွင်းၵႂႃႇဢဝ်ၶူဝ်းၵုၼ်ႇတီႈၵုၼ်ႁဵင် တူဝ်တၢႆမၼ်းၼၢင်းတႄႉႁၼ်ယဝ်ႉတႄႉၸူၼ်ဢဝ်ၵႂႃႇတေႃႇထိုင်ယၢမ်းလဵဝ်မီးတီလႂ်ဢမ်ႇႁူႉ ယင်းပႆႇႁၼ်ၶိုၼ်း။

မိူဝ်ႈဝၼ်းတီႈ10/10/2023 ယၢမ်းၵၢင်ၼႂ် 8 မူင်းၶိုင်ႈၼၼ်ႉ ၼၢင်းယိင်းၵူၼ်းၵႃလီၵေႃႉၼိုင်ႈ ၵႂႃႇဢဝ်ၶူဝ်းဢၼ်သင်ႇဝႆႉၼိူဝ်ဢွၼ်ႊလၢႆႊ တီႈၵုၼ်ႁဵင်ၼႆသေႁၢႆၵႂႃႇလႆႈၶိုၼ်းၼိုင်ႈလႄႈဝၼ်းၼိုင်ႈၸင်ႇႁၼ်တူဝ်တၢႆမၼ်းၼၢင်းၶိုၼ်း။

  ၼၢင်းယိင်းၵူၼ်း ၵႃလီႉၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “  မိူဝ်ႈမၼ်းၵႂႃႇထိုင် ၵုၼ်ႁဵင်ၼၼ်ႉ မၼ်းတင်းၵႂႃႇႁူပ်ႉထူပ်းပီႈၼွင်ႉမၼ်းယူႇၵမ်းၼိုင်ႈၼႆဢေႃႈ။မၼ်းလၢတ်ႈဝႃႈ တေၵႂႃႇဢဝ် ၶူဝ်းၶွင်ဢၼ်မၼ်းသင်ႇဝႆႉၼိူဝ်ဢွၼ်ႊလၢႆႊၼႆသေ ႁၢႆတူဝ်ၵႂႃႇ။ၵပ်းသိုပ်ႇဢမ်ႇလႆႈ ။ ၽိူဝ်ႇထိုင်မႃး ဝၼ်းတီႈ 11/10/2023 ယၢမ်းၵၢင်ၼႂ်ၼၼ်ႉ ၵူၼ်းၵုၼ်ႁဵင်ၶဝ် ၸင်ႇၵႂႃႁၼ်မႅၼ်ႈ တူဝ်တၢႆမၼ်းတီႈ တၢင်းၶိုၼ်ႈၵွင်းမူးလူင် ပျီႇငဵင်းဢေးၼၼ်ႉၼႆဢေႃႈ။ မီးႁွႆးၽၼ်းတႅင်းဝႆႉ ၸွမ်းပုမ်မၼ်းၸိူဝ်းၼႆႉ ပေႃးလိူတ်ႈပေႃးယၢင်လူင်ဝႆႉဢေႃႈ။ ၺႃးတႅင်း ဢမ်ႇယွမ်း 10 ၵမ်းၼႆႉ ထိုင်မိူဝ်ႈလဵဝ် ၵႃးမၼ်းၵႂႃႇမီးလႂ်ဢမ်ႇႁူႉ” – ဝႃႈၼႆ။

ၼၢင်းယိင်းၵေႃႉၺႃးၸူၼ်တႅင်းၼႆႉ ၸိုဝ်ႈ ၼၢင်းလူႇ ဢႃယု 38 ပီ ယူႇပွၵ်ႉ 5 ၸႄႈဝဵင်းၵႃလီႉ တႄႇၼႃႈႁိူၼ်းယဝ်ႉ မီးလုၵ်ႈၵေႃႉၼိုင်ႈ ဢႃယု 7 ၶူပ်ႇ ။ၵႃးဢၼ်မၼ်းၼၢင်းၶီႇၵႂႃႇသေ ၺႃးၸူၼ်ဢဝ်ၼႆႉ ပဵၼ်ၵႃး တူဝ်ႊယူဝ်ႊတႃႊ သီၶၢဝ် မၢႆ SHN 7Q 2489 ။

ၼၢင်းယိင်းၵူၼ်း ၵႃလီႉၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၶိူင်ႈၶူဝ်းဢၼ်ၸပ်းတူဝ်ပီႈၼၢင်းလူႇၵႂႃႇၼႆႉ တေမီးယူႇလၢႆမဵဝ်း မိူၼ်ၼင်ႇ ၾူၼ်းၵပ်းတူဝ်မၼ်း ၊ ၶမ်းဢၼ်တိုဝ်းၸပ်းတူဝ်မၼ်း ၊ ၵႃးဢၼ်မၼ်းၶီႇၵႂႃႇၸိူဝ်းၼႆႉ ထိုင်မိူဝ်ႈလဵဝ် ပႆႇႁူႉၽႂ်ဢဝ်ၵႂႃႇ။သုမ်းၵႂႃႇမူတ်းယဝ်ႉ” – ဝႃႈၼႆ။

ႁူဝ်လိူၼ်ဢွၵ်ႊထိူဝ်ႊပိူဝ်ႊ 2023 ယၢမ်းဝၢႆးဝၼ်းၼၼ်ႉၵေႃႈ မီးၵူၼ်းႁၢႆႉ ၽူႈၸၢႆး 3 ၵေႃႉ ၶီႇၵႃး (Crown) လမ်းၼိုင်ႈသေ မႃးၵိုတ်းႁႄႉၵႃး ၵူၼ်းမိူင်း တီႈႁိမ်းလႅင်းၵႃးသူၺ်ႇလယူင်ႇ ပွၵ်ႉ 7 ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸူၼ်ဢဝ်ငိုၼ်း ၼႂ်းၵႃး ၵူၼ်းမိူင်းၼၼ်ႉၵႂႃႇ 800 သႅၼ်ပၢႆ ၼႆယဝ်ႉ။