မိူဝ်ႈၼႆႉ ဝၼ်းတီႈ 6/6/2022 ယၢမ်းၵၢင်ၼႂ် မွၵ်ႈ 6 မူင်းၶိုင်ႈ ၽူႈၶဝ်ႈၸုမ်းပျီႇတူႉၸိတ်ႉ ၵေႃႉၼိုင်ႈ ၺႃးၸူၼ် တီႈပွၵ်ႉၵွင်းမူးလွႆ ၸႄႈဝဵင်းမူႇ ၸေႊ ၸိုင်ႈတႆးပွတ်းႁွင်ႇ ။
ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မီးၵူၼ်းၶီႇၵႃးမႃးၸွမ်းၵၼ် ယိပ်းၵွင်ႈၸေးမိုဝ်းသေ လူင်းၵႃးမႃးၸူၼ် လုၵ်ႈၸုမ်းပျီႇတူႉၸိတ်ႉ ၵေႃႉၼိုင်ႈ တီႈပွၵ်ႉၵွင်းမူးလွႆ ၵူၼ်းၸူၼ်ၼၼ်ႉ လႆႈၵႂႃႇၵႃးလမ်းၼိုင်ႈ။ ယဝ်ႉၵေႃႈ ၼႂ်းၵႃးၼၼ်ႉ လႆႈပႃးၵႂႃႇ သင်ထႅင်ႈတႄႉ ဢမ်ႇႁူႉၶႃႈ။ လုၵ်ႈၸုမ်းပျီႇတူႉၸိတ်ႉ ဢၼ်ၺႃးၸူၼ်ၼၼ်ႉ လၢၵ်ႈၵွင်ႈယိုဝ်းၸွမ်းၵူၼ်ႈၵူၼ်းႁၢႆႉၼၼ်ႉလႄႈ လႆႈမၢတ်ႇၸဵပ်းၵႂႃႇၵေႃႉၼိုင်ႈ”- ဝႃႈၼႆ။
လုၵ်ႈၸုမ်းပျီႇတူႉၸိတ်ႉ မူႇၸေႊ ၵေႃႉၺႃးၸူၼ်ၼၼ်ႉ တႅမ်ႈတၢင်ႇဝႆႉ တီႈ Wechat သုၼ်ႇတူဝ်မၼ်းၸၢႆးဝႃႈ သင်ၽူႈလႂ် ၽႂ်ႁၼ်ၵႃးလမ်းၼိုင်ႈၶိုၼ်းၼႆၸိုင် တေပၼ်ငိုၼ်းသူး 50 သႅၼ်ပျႃး(ငိုၼ်းမၢၼ်ႈ) ဝႃႈၼႆ။
တီႈပွၵ်ႉၵွင်ႈမူးလွႆၼႆႉ ၵမ်ႈၼမ် ပဵၼ်ၸုမ်းပျီႇတူႉၸိတ်ႉလႄႈ ၸၢဝ်းၶႄႇ ယူႇသဝ်းဝႆႉၼမ် ၵူၼ်းပိုၼ်ႉတီႈလၢတ်ႈ။
“တီႈပွၵ်ႈၵွင်းမူးလွႆ တၢင်းၼၼ်ႉတႄႉ ပဵၼ်ၸုမ်းယိပ်းၵွင်ႈယူႇၼမ်။ ၸဝ်ႈၵွင်ႈၼင်ႇၵၼ်ၶိုၼ်း ၸူၼ်ၵၼ်ၵေႃႈပဵၼ်လႆႈ ၶႃႈဢေႃႈ။ ၵူၼ်းတႄႉ ယိုဝ်းမႅၼ်ႈၵေႃႉၼိုင်ႈ ယိုဝ်းၺႃးၵူၼ်းၸူၼ်ၼႆၶႃႈ။ ၵေႃႉၺႃးၸူၼ်ၼၼ်ႉ ပဵၼ်လုၵ်ႈၸုမ်းပျီႇတူႉၸိတ်ႉ ၵူၺ်းၵႃႈ ပဵၼ်ပျီႇတူႉၸိတ်ႉၸုမ်းလႂ်တႄႉ ပႆႇႁူႉ”- ၵူၼ်းၼုမ်ႇ မူႇၸေႊ လၢတ်ႈတီႈၽူႈတွႆႇႁွၵ်ႈၼင်ႇၼႆ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း ပီပၢႆၼႆႉ ၼႂ်းၸႄႈဝဵင်းမူႇၸေႊ မီးလွင်ႈၸူၼ်/ ယိုဝ်းၵၼ်မႃးၶိူဝ်းယႂ်း ႁဵတ်းႁႂ်ႈၵူၼ်းပိုၼ်ႉတီႈ မႆႈၸႂ် ဢမ်ႇ မီးလွင်ႈႁူမ်ႇလူမ်ႈ။
ပူၼ်ႉမႃး မိူဝ်ႈဝၼ်းတီႈ 4/6/2022 ယၢမ်းႁူဝ်ၶမ်ႈၼၼ်ႉၵေႃႈ သွင်ပူႇယႃႈ ၶီႇၵႃးမႃးၸွမ်းၵၼ် ထုၵ်ႇၵူၼ်းႁၢႆႉ ၶီႇၵႃးလမ်းယိုဝ်းၸွမ်းလင်သေ ၸူၼ် ဢဝ်ၵႂႃႇငိုၼ်းၶႄႇမွၵ်ႈ 2 သႅၼ်ယႂၼ်ႇ ၼႂ်းၵႄႈႁူဝ်ပေႃႈဝဵင်းၼၢင်း – ပၢင်ႇၶမ်း ၼႂ်းၸႄႈဝဵင်းမူႇၸေႊ ။
တီႈဝဵင်းမူႇၸေႊၼႆႉ ပျီႇတူႉၸိတ်ႉ ၸုမ်းဢွၼ်ႇၸုမ်းလူင်ႁူမ်ႈသဵင်ႈမီး 20 ၸုမ်းပၢႆ။