ဝၼ်းတီႈ 1/2/2026 ယၢမ်းၵၢင်ဝၼ်း ၵူၼ်းၸူၼ်ၶဝ်ႈႁိူၼ်းၸၢင်ႈၶမ်းလင်ၼိုင်ႈ တီႈပွၵ်ႉ 4 ၼႂ်းဝဵင်းလႃႈသဵဝ်ႈ မိူင်းတႆးပွတ်းႁွင်ႇ ၊ ပႃးၵႂႃႇၶမ်း မွၵ်ႈ 5 ၸွႆႉ လႄႈ တူဝ်ငိုၼ်း မွၵ်ႈ 1000 သႅၼ်ပျႃး ဝႃႈၼႆ။

ႁိူၼ်းၸၢင်ႈၶမ်းဢၼ်ၺႃးၸူၼ်ၶဝ်ႈၼႆႉ မီးၾၢႆႇလင် ၵျွင်းမုၼ်ၸဝ်ႈမႁႃႇပေႃးၻႃႉယူင်ႇ ဢၼ် သင်ၶၸဝ်ႈၺႃးၶႃႈႁႅမ်တၢႆၵႂႃႇ ၼႂ်းဝူင်ႈပူၼ်ႉ (ႁၢင်လိူၼ်ၵျႅၼ်ႊၼိဝ်ႊရီႇ) ၼၼ်ႉၵူၺ်း။ ႁိူၼ်းၸၢင်ႈၶမ်းၼႆႉ ၶၢႆပႃးၶမ်း။ ၼႂ်းၵၢတ်ႇလူင်လႃႈသဵဝ်ႈၵေႃႈ ၸင်ႇႁႃပိုတ်ႇႁၢၼ်ႉၶမ်း ပူၼ်ႉမႃး ဢမ်ႇပေႃးႁိုင်ၼႆႉၵူၺ်း ဝႃႈၼႆ။

ၼၢင်းယိင်းဢႃႇယု 40 ပီ ၵူၼ်းဝဵင်းလႃႈသဵဝ်ႈ လၢတ်ႈၽူႈတွႆႇႁွၵ်ႈဝႃႈ- “ ၸႂ်ႈယဝ်ႉဝႃႈ ၸူၼ်ၶဝ်ႈႁိူၼ်းႁၢၼ်ႉၶၢႆၶမ်း ၵျေႃႇသရၽူႇ (ကျော်သရဖူရွှေဆိုင်) ၶဝ်ဢိူဝ်ႈမိူဝ်ႈဝႃး (1/2/2026) ။ ၶဝ်ၼႆႉ ပိုတ်ႇသႅင်ႇဝႆႉတီႈႁိူၼ်းပႃး။ ၼႂ်းၵၢတ်ႇတႄႉ ၶဝ်တိုၵ်ႉမႃးပိုတ်ႇဝႆႉပႆႇႁိုင်။ ဢၼ်ၺႃးၸူၼ်ၼႆႉ ပဵၼ်သႅင်ႇတီႈ ႁိူၼ်းၶဝ်ၼၼ်ႉဢိူဝ်ႈ။ ပိူၼ်ႈဝႃႈတႄႉ ပႃးၵႂႃႇ ၶမ်း 5 ၸွႆႉ တင်း တူဝ်ငိုၼ်းမွၵ်ႈ 1 ႁဵင်သႅၼ်ဝႃႈၼႆယူႇ။ ၵူၺ်းမိူဝ်ႈလဵဝ် ၼႂ်းၵၢတ်ႇတႄႉလိုဝ်းၵၼ်ဝႃႈ ၶမ်းတႄႉဢမ်ႇတၼ်းပႃးၵႂႃႇ။ ၵွပ်ႈဝႃႈ မိူဝ်ႈၵူၼ်းၸူၼ်ၶဝ်ႈႁိူၼ်း ၶဝ်ၼၼ်ႉ ၸဝ်ႈႁိူၼ်းဢဝ်ၵွင်ႈယိုဝ်းလွၵ်ႇသႂ်ႇႁႄ ၸူၼ်တၼ်းဢဝ်ၵႂႃႇ ၸွၵ်းငိုၼ်းၶဝ်ၵူၺ်းၼႆယူႇဢေႃႈ။ မိူဝ်ႈလဵဝ်ၼႆႉ ၵူၼ်းၸူၼ်ၵေႃႈ ပႆႇငိၼ်းဝႃႈ ၺွပ်းလႆႈ။ ၸူဝ်ႈသိုၵ်းမၢၼ်ႈမႃးဢုပ်ႉၼႆႉ ၵူၼ်းလၵ်ႉ၊ ၵူၼ်းၸူၼ်၊ ၵူၼ်းႁႅမ်ၵၼ်တၢႆၵေႃႈ ၼမ်မႃးၶိုၼ်းတေႉတေႉ။ ၵမ်ႈၽွင်ႈပိူၼ်ႈတင်းဝႃႈ ပဵၼ်ၵူၼ်းၼႂ်းသိုၵ်းမၢၼ်ႈၶဝ်ၵူၺ်း ၼႆၵွၼ်ႇ။ ပဵၼ်မႃးၸိူင်ႉၼႆမိူဝ်ႈလႂ်ၵေႃႈ ဢမ်ႇတွၼ်ႉၺွပ်းလႆႈသေပွၵ်ႈ” ၼႆယဝ်ႉ။

ႁိူၼ်းၸၢင်ႈၶမ်းဢၼ်ၺႃးၸူၼ်ၼၼ်ႉ ႁပ်ႉႁုင်ထတ်းထွင်ၶမ်း၊ ႁပ်ႉၶူဝ်းၵမ်ႉ (ရွှေအပေါင်ခံ) ၸိူဝ်းၼႆႉ။ ႁၢၼ်ႉဢၼ်ၶၢႆဝႆႉၼႂ်းၵၢတ်ႇတႄႉ ယွၼ်ႉတိုၵ်ႉပိုတ်ႇမႂ်ႇပႆႇပေႃးႁိုင်လႄႈ ၵူၼ်း ႁဵတ်းၵၢၼ်ၶဝ်ၵေႃႈ တူၺ်းလူပၼ် ၵူၼ်းသိုဝ်ႉလီ ႁဵတ်းပၼ်လႆႈၼင်ႇၵူၼ်းသိုဝ်ႉပဵင်းပေႃးၸႂ်လႆႈလႄႈ ၵူၼ်းၸိူဝ်းၵႂႃႇသင်ႇသိုဝ်ႉၶမ်း၊ ၵူၼ်းဢဝ်ၶမ်းၵႂႃႇၵမ်ႉဝႆႉၸိူဝ်းၼႆႉၵေႃႈ မီးၼမ်တေႉတေႉၼႆ ၵူၼ်းမိူင်း ဝဵင်းလႃႈသဵဝ်ႈ လၢတ်ႈၼင်ႇၼႆ။

လိူဝ်ၼၼ်ႉ မိူဝ်ႈဝႃး (1/2/2026) ၼႆႉ ၸဝ်ႈႁၢၼ်ႉၶမ်း ၵျေႃႇသရၽူႇၼႆႉ ႁပ်ႉႁဵတ်းပဵၼ်ၸဝ်ႈတႃႇၼလူင် ၸတ်းပၢင်ပွႆးၸႃႇပၼ ၸဝ်ႈသြႃႇၵျွင်းပေႃးၻႃႉယူင်ႇ ဢၼ်လူႉလွၼ်ႇၵႂႃႇ ၼၼ်ႉပႃးလႄႈ ၾၢႆႇၼႃႈႁိူၼ်းၶဝ် ၵူၼ်းၵိုၼ်းႁႅင်းဝႆႉ ဝႃႈၼႆ။

ဝၢႆးလင်သိုၵ်းမၢၼ်ႈၶဝ်ႈၵုမ်းၵမ်ၶိုၼ်းဝဵင်းလႃႈသဵဝ်ႈၼႆႉ လွင်ႈၽူႈလၵ်ႉၵူၼ်းၸူၼ်၊ ၵၢၼ်ၶႃႈႁႅမ်ၵၼ်တၢႆ လႄႈ လွင်ႈႁဵတ်းၽိတ်းမၢႆမီႈ လိူင်ႇၼမ်မႃးႁႅင်းတေႉတေႉသေ ဢမ်ႇတွၼ်ႉတီႉၺွပ်းဢဝ်လႆႈ ၵူၼ်းႁဵတ်းၽိတ်းမႃး ပၼ်တၢမ်ႇတေႉတေႉဝႃႈဝႃႈ ၼႆယဝ်ႉ။