ၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းသႅၼ်ဝီ ႁူမ်ႈတင်းၸုမ်း SYO ၸတ်းႁဵတ်းပၢင်ၾိုၵ်းၽွၼ်ႉ တၢင်းၵႃႈ ၾိင်ႈႁိတ်ႈႁွႆးတႆး ၵူၼ်းၼုမ်ႇၽူႈသူၼ်ၸႂ်ၶဝ်ႈႁူမ်ႈ 200 ၵေႃႉပၢႆ။
ဝၼ်းတီႈ 01- 05/05/2018 ၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းသႅၼ်ဝီ ၸတ်းႁဵတ်းပၢင်သွၼ်လၢႆးၵႃႈ ၾိင်ႈႁိတ်ႈႁွႆးတႆး မိူၼ်ၼင်ႇတၢင်းၵႃႈၼူၵ်ႉ၊တူဝ်း၊လၢႆးႁႆႇၵွင်မွင်း၊ လၢႆးမိုဝ်းတႆး၊ လၢႆးလႅဝ်း၊ လၢႆးတႅၼ်းၸိူဝ်းၼႆႉ ၸတ်းႁဵတ်းတီႈဝတ်ႉၵျွင်းသႅင်၊ ဝၢင်းႁေႃၶုၼ်သၢင်ႇတူၼ်ႈႁုင်း ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်းႁွင်ႇ ။
ၼႂ်းပၢင်ၼႆႉ ၶူးသွၼ်ၸၢႆးၶိူဝ်းလဵဝ် ပူင်သွၼ်ပၼ်လၢႆးၵႃႈၼူၵ်ႉ၊တူဝ်း၊ ၶူးလူင်လၢႆးၶႅၼ်ႉ ၸၢႆးၵျေႃႇထေး ပူင်သွၼ်ပၼ် လၢႆးမိုဝ်းတႆး၊ လၢႆးလႅဝ်းလၢႆးတႅၼ်းၸိူဝ်းၼႆႉ ပၢင်သွၼ်တႄႇၶၢဝ်းယၢမ်းၵၢင်ၼႂ် 05:30 တေႃႇထိုင် ၵၢင်ၶမ်ႈ 9:00 မူင်း မီးလုၵ်ႈႁဵၼ်းမႃးၶိုၼ်ႈႁဵၼ်းဢဝ် 235 ၵေႃႉ။
ၸၢႆးမိၼ်ႉထုၼ်း ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆးလၢတ်ႈဝႃႈ – “ တႃႇတေၸတ်းႁဵတ်းပၢင်ၼႆႉ ႁဝ်းၶႃႈထၢမ် ၵၢင်ၸႂ်ၵူၼ်းၼုမ်ႇၵူၼ်းဝၢၼ်ႈသေ ၵူႈၵေႃႉႁၼ်ထိုင်ဝႃႈ ထုၵ်ႇလီၸတ်းႁဵတ်းၼႆသေ ႁဝ်းၶႃႈၸင်ႇႁူမ်ႈၵၼ်ၸတ်း ႁဵတ်း ယိူင်းဢၢၼ်းပိူဝ်ႈႁႂ်ႈၵူၼ်းၼုမ်ႇမီးၾိင်ႈယၢမ်ႈလီ ၊ ႁၵ်ႉႁွမ်ၵၼ်၊ ၽွမ်ႉသဵင်ပဵင်းပၢၵ်ႇၵၼ် ဢမ်ႇလိုမ်းၾိင်ႈႁိတ်ႈႁွႆးတူဝ်ၸဝ်ႈၵဝ်ႇသေ သိုပ်ႇပိုၼ်ၽႄႈၵႂႃႇမိူဝ်း ၼႃယၢဝ်းယိုၼ်းလႄႈ ႁႂ်ႈၵူၼ်းၼုမ်ႇၵႆယၢၼ်ယႃႈမဝ်းၵမ် ” ဝႃႈၼႆ။
မိူဝ်ႈဝၼ်းတီႈ 08/11/2017 ၼၼ်ႉၵေႃႈ ၸုမ်းၵူၼ်းၼုမ်ႇတႆး SYO တင်း ၵေႃလိၵ်ႈလၢႆးလႄႈ ၾိင်ႈငႄႈတႆးၸႄႈ ဝဵင်းသႅၼ်ဝီ ဢုပ်ႇဢူဝ်းလႅၵ်ႈလၢႆႈၵၼ် လွင်ႈတေပူင်သွၼ်ပၼ် တၢင်းၵႃႈ ၾိင်ႈႁိတ်ႈႁွႆးတႆးပၼ် ၵူၼ်းၼုမ်ႇ ၼႂ်းၸႄႈဝဵင်းသႅၼ်ဝီ၊ လွင်ႈတေလုမ်းလႃးၵေႃႇသၢင်ႈႁဵတ်းႁူဝ်ႉဝၢင်းၵေႃလိၵ်ႈလၢႆးလႄႈ ႁူဝ်ႉဝၢင်းၶုမ်ၵုတ်း ၸဝ်ႈၾႃႉ ၸဵမ်ၸိူဝ်းၼႆႉ ဝႃႈၼႆ။
