သင်ၶၸဝ်ႈ တီႈဝတ့်တိုၼ်းသၢင်ၼွင်ၵႃး(ၼွင်ၵႃး) ဝဵင်းသႅၼ်ဝီ တိတ်းၸပ်း ၸိူဝ့်မႅင်းတၢင်း ပဵၼ်ၶူဝ်ႊဝိတ့် 19 တင်းမူတ်း 26 တူၼ် ဝႃႈၼႆ။
Photo ၸၢႆးပႃ့ဢေး -ပိၵ်ႉဢိုတ်း Lockdown ဝႆႉတီႈဢိူင်ႇၶမ်းတိူၼ်း ဝဵင်းသႅၼ်ဝီ ၼင်ႇႁိုဝ်တၢင်းပဵၼ်ၶူဝ်ႊဝိတ်ႉ 19 တေဢမ်ႇၸပ်းၽႄႈလၢမ်းမႃးထႅင်ႈ 
Photo ၸၢႆးပႃ့ဢေး -ပိၵ်ႉဢိုတ်း Lockdown ဝႆႉဝတ်ႉၵျွင်း ဝတ့်တိုၼ်းသၢင်ၼွင်ၵႃး ဝဵင်းသႅၼ်ဝီ ၼင်ႇႁိုဝ်တၢင်းပဵၼ်ၶူဝ်ႊဝိတ်ႉ 19 တေဢမ်ႇၸပ်းၽႄႈလၢမ်းမႃးထႅင်ႈ
မိူဝ်ႈဝၼ်းတီႈ 12/9/2021 ၾၢႆႇပၢႆးယူႇလီ ၶဝ်ႈၵူတ်ႇထတ်းတၢင်းပဵၼ်ၶူဝ်ႊဝိတ့် 19 ပၼ်သင်ႇၶႃႇၸဝ်ႈ 54 တူၼ် တီႈဝတ့်ၼွင်ၵႃး ဢိူင်ႇၶမ်းတိူၼ်း ၸႄႈဝဵင်း သႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ။ ၼႂ်းၼၼ့် ၸဝ်ႈရႁၢၼ်း 6 တူၼ်လႄႈ ၸဝ်ႈသၢင်ႇ 20 တူၼ် ၸပ်းတၢင်းပဵၼ်ၶူဝ်ႊဝိတ်ႉဝႆႉ လႆႈႁူႉၼင်ႇၼႆ။
ၸၢႆးပႃ့ဢေး ၾၢႆႇတိတ်းတေႃႇၵပ်းသၢၼ်/ ၽူႈၸွႆႈထႅမ် ႁပ့်တၢင်းလူႇ တီႈဝတ့်ၼွင်ၵႃး လၢတ်ႈတီႈၽူႈတွႆႇႁွၵ်ႈဝႃႈ– “ၸႂ်ႈၶႃႈဢေႃႈ သင်ၶ ၸဝ်ႈ တိတ်းၸပ်း တင်းမူတ်း 26 ပႃးၶႃႈ။ လွင်ႈမႆႈၸႂ်ႈတႄ့ ဢမ်ႇထိုင်တီႈလႆႈမႆႈၸႂ်ႁႅင်းၶႃႈ။ ၵူၺ်းၵႃႈ ၸဝ်ႈသြႃႇပီးႁဝ်းၶႃႈသမ့် ဢႃယုယႂ်ႇ ဢိတ်းၼိုင်ႈသေ သမ်ႉမီးတၢင်းပဵၼ်ဝႆႉလႄႈ တေလႆႈသႂ်ႇၸႂ်ယူတ်းယႃပၼ်ဝႆးဢိတ်းၼိုင်ႈ ။ တေလႆႈဝႆ့လွင်ႈယႂ်ႇ တူၺ်း ထိုင်ၸမ် ဢိတ်းၼိုင်ႈၶႃႈ။ ၵူၺ်းၵႃႈ ဢမ်ႇထိုင်တီႈလႆႈမႆႈၸႂ်ၼင်ႇၵဝ်ႇၶႃႈ”- ဝႃႈၼႆ။
ယၢမ်းလဵဝ် သင်ၶၸဝ်ႈ ဢၼ်တိတ်းၸပ်းၸိူဝ့်မႅင်းတၢင်းပဵၼ်ၶူဝ်ႊဝိတ့် 19 ၼၼ့် ထုၵ်ႇၵၵ်းတူဝ်ယူတ်းယႃယူႇဝႆ့တီႈၼႂ်းဝတ့်။ တႃႇ 28 တူၼ် ဢၼ်ဢမ်ႇတိတ်းၸပ်းၼၼ့်တႄ့ လႆႈယႅၵ်ႈယူႇဝႆ့တီႈဝတ့် ထႅင်ႈတီႈၼိုင်ႈႁင်းၶေႃ ၼႆယဝ့်။
“လွင်ႈၵိၼ်ယႅမ့် သုင်းသွမ်းတႄ့ ဢမ်ႇပေႃးလႆႈမႆႈၸႂ် ။ မီးပီႈၼွင့်တၵ့်ၵႃႇ မႃးလူႇတၢၼ်းယူႇ။ ၵူၺ်းၵႃႈ ဢၼ်လႆႈမႆႈၸႂ်ဝႆ့တႄ့ ဝတ့်ထုငိုၼ်း တွင်းၶႃႈဢေႃႈ။ ဝတ့်ထုငိုၼ်းတွင်းၼႆ့ တႃႇဝႆ့ၸႂ်ႉၽွင်းလူဝ်ႇၵိုင့်ၵၢင့် ၶႃႈ။ ပေႃးပဵၼ်သင်မႃး မီးသင်မႃး တေၸၢင်ႈၸႂ်ႉတိုဝ်းလႆႈၵမ်းလဵဝ်ၶႃႈ”-ၸၢႆးပႃ့ဢေး သိုပ်ႇလၢတ်ႈၼႄ ၼင်ႇၼႆ။
ယၢမ်းလဵဝ် တီႈဝတ့်ၼွင်ၵႃး Lockdown ဝႆ့ၸူဝ်ႈၶၢဝ်း။ လိူဝ်ၼၼ့် တီႈဢိူင်ႇၶမ်းတိူၼ်းၵေႃႈ Lockdown ဝႆ့ မိူၼ်ၵၼ် တႃႇၶၢဝ်းတၢင်း 14 ဝၼ်း တႄႇဢဝ် ဝၼ်းတီႈ 14-27/9/2021 ၼႆယဝ့်။
သင်ဝႃႈ ၽူႈမီးၼမ်ႉၸႂ်ၸေႇတၼႃႇ တီႈၸမ်ၵႆ ပေႃးတေၸၢင်ႈၵမ့်ထႅမ် ၶဝ်ႈသွမ်းၽၵ်းသွမ်း ဝတ့်ထုငိုၼ်းတွင်းလႄႈ ယႃႈယႃ တီႈသင်ၶၸဝ်ႈ ဝတ့်ၼွင်ၵႃးၸိုင် ၵပ်းသိုပ်ႇတွင်ႈထၢမ် တီႈၸၢႆးပႃႉဢေး မၢႆၾူၼ်းမၢၼ်ႈ 09403767583 ၵေႃႈလႆႈ ဢမ်ႇၼၼ် မၢႆၾူၼ်း တၢင်း မိူင်းထႆး ၸၢႆးသၢႆဝၼ်း 0823347371, ၸၢႆးလူႇဢေး 0869884288 ၵေႃႈလႆႈ ဝႃႈၼႆ။
မိူဝ်ႈဝၼ်းတီႈ 13/9/2021 တီႈဝတ့်မၢၼ်ႈၼွင် ၸႄႈဝဵင်းသႅၼ်ဝီ သင်ၶၸဝ်ႈလႄႈ ၵပ်ႉပီႇ တိတ်းၸပ်းၶူဝ်ႊဝိတ့် 19 တင်းမူတ်း 52 တူၼ် ။ ၶူဝ်ႊဝိတ်ႉၽႄႈလၢမ်းမႃးၵမ်းၼႆႉ သင်ၶၸဝ်ႈလၢႆလၢႆတီႈလၢႆလၢႆဝဵင်းၵေႃႈ တိတ်းၸပ်းမႃးတင်းၼမ်။
