ဝၼ်းတီႈ 14 လိူၼ်တီႊသႅမ်ႊပိူဝ်ႊၼႆႉ လူင်ပွင်ၸိုင်ႈၶႄႇႁဵတ်းပၢင်သပ်းၸႅင်ႈၶၢဝ်ႇထႅင်ႈတီႈမိူင်းၶႄႇ မၢဝ်ႊၼိင်ႊ ၽူႈၶၢၼ်ပၢၵ်ႇ ႁွင်ႈၵၢင်ၽွင်းလူင်ၾၢႆႇၼွၵ်ႈမိူင်းမိူင်းၶႄႇ လၢတ်ႈပဵၼ်တၢင်းၵၢၼ်ဝႃႈ – ပၢင်တိုၵ်းၼႂ်းၸိုင်ႈတႆးပွတ်းႁွင်ႇ လူတ်းယွမ်းလႄႈယဵၼ်ၵႂႃႇၼမ်ၼႃႇယဝ်ႉဝႃႈၼႆ။

မၼ်းၼၢင်းလၢတ်ႈတီႈပၢင်သပ်းၸႅင်ႈၶၢဝ်ႇ တီႈမိူင်းၶႄႇ မိူဝ်ႈဝၼ်းတီႈ 14/12/2023 မိူဝ်ႈဝႃး။ မၼ်းၼၢင်းလၢတ်ႈဝႃႈ လွင်ႈပၢင်တိုၵ်းလူတ်းယွမ်းယဵၼ်လူင်းၼႆႉ ပဵၼ်ဢၼ်ၵမ်ႉၸွႆႈလွင်ႈၵတ်းယဵၼ်လႄႈႁူမ်ႇလူမ်ႈလႅၼ်လိၼ် ၶႄႇ-မၢၼ်ႈတႄႉတႄႉဝႃႈဝႃႈ။ မီးၽွၼ်းလီတေႃႇႁွင်ႈၵၢၼ်ၾၢႆႇၵဵဝ်ႇၶွင်ႈၵူႈပႃႈၵူႈၾၢႆႇဝႃႈၼႆ။

မၼ်းၼၢင်းယင်းလၢတ်ႈပႃးထႅင်ႈဝႃႈ – ၾၢႆႇတၢင်းၶႄႇ တေၶတ်းၸႂ်ၸွႆႈႁႂ်ႈလူတ်းယွၼ်ႇလႆႈလွင်ႈၶဵင်ႈၶႅင်ၼႂ်းၵႄႈ 2 ပႃႈသွင်ၾၢႆႇသေ တေႃႇထိုင်ပေႃးၵိုတ်းတိုၵ်းၵၼ်လႆႈ တေႃႇထိုင်ပေႃးလႆႈလွင်ႈငမ်းယဵၼ်ဝႃႈၼႆ။

ၶၢဝ်ႇပီႇပီႇသီႇတႄႉလၢႆးငၢၼ်းဝႆႉဝႃႈ တီႈပၢင်ဢုပ်ႇလွင်ႈၵိုတ်းတိုၵ်းၵၼ်တီႈၶုၼ်းမိင်ၼၼ်ႉ ၾၢႆႇတၢင်း MNDAA လႆႈတုၵ်းယွၼ်း ႁႂ်ႈၶႄႇၸွႆႈပိုတ်ႇပၼ်သဵၼ်ႈတၢင်း ၵူၼ်းမိူင်းၸိူဝ်းၶမ်ဝႆႉၼႂ်းလၢဝ်ႇၵၢႆး ယွၼ်ႉပၢင်တိုၵ်း။ သိုၵ်းမၢၼ်ႈဢၼ်ၵိုတ်းဝႆႉၼႂ်းလိၼ်ထုင်ႉလၢဝ်ႇၵၢႆးၸိူဝ်းၼၼ်ႉႁႂ်ႈထွႆထွၼ်ဢွၵ်ႇယဝ်ႉတူဝ်ႈၼႂ်းလိူၼ်တီႊသႅမ်ႊပိူဝ်ႊၼႆႉသေ ႁႂ်ႈပၼ်ၵႂၢမ်းမၼ်ႈဝႃႈတိုၼ်းတေဢမ်ႇၶိုၼ်းမႃးပိုတ်းယိုဝ်းတိုၵ်းတေႃးၶိုၼ်းထႅင်ႈ -ၸဵမ်ၸိူဝ်းၼႆႉ ဝႃႈၼႆ။

ၾၢႆႇတၢင်းသိုၵ်းမၢၼ်ႈတႄႉပိုၼ်ၽၢဝ်ႇဝႃႈ – ပၢင်ဢုပ်ႇၵၼ်တီႈၶုၼ်းမိင်ၼၼ်ႉ လႆႈၸႂ်ၵၼ်တႃႇလူတ်းယွမ်းလွင်ႈပိုတ်းယိုဝ်းၵၼ်ၸွမ်းလႅၼ်လိၼ်ၶႄႇသေ တေၶိုၼ်းတႄႇပၼ်ၵၢၼ်ၵႃႉၶၢႆၸွမ်းလႅၼ်လိၼ်ၼႂ်းဝႆးဝႆးၼႆႉ။ တေၶတ်းၸႂ်ႁႂ်ႈၵုမ်းလႆႈ ယႃႇႁႂ်ႈပၢင်တိုၵ်းသိုပ်ႇလၢမ်းၽႄႈၵႂၢင်ႈၵႂႃႇလိူဝ်ၼႆႉထႅင်ႈၸဵမ်ၸိူဝ်းၼႆႉဝႃႈၼႆ။

ၶၢဝ်ႇဢၼ်ၸမ်ၸႂ်ၸုမ်းယိပ်းၵွင်ႈတႄႉ လၢတ်ႈဝႃႈ – ၼႂ်းႁၢင်လိူၼ်တီႊသႅမ်ႊပိူဝ်ႊၼႆႉ သိုၵ်းမၢၼ်ႈလႄႈၸုမ်းဢူၺ်းလီပွတ်းႁွင်ႇသၢမ်ၸုမ်း တင်းသွင်ၾၢႆႇ တေႁူပ်ႉၵၼ်ထႅင်ႈၵမ်းၼိုင်ႈသေ တေဢုပ်ႇၵၼ်တႃႇၵိုတ်းတိုၵ်း၊ တႃႇလႅၵ်ႈၶႃႈသိုၵ်းၵၼ်ၶိုၼ်း၊ တႃႇႁူမ်ႈၵၼ်ၽဵဝ်ႈမူၺ်ႉၸုမ်းလွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ ၵျႃးၽျႅၼ်ႉ ၊ တႃႇၶတ်းၸႂ်လမ်းတီႉ ၽူႈၼမ်းၸုမ်းလွၵ်ႇလႅၼ်ႁႂ်ႈလႆႈဝႆးဝႆး ၸိူဝ်းၼႆႉ – ဝႃႈၼႆ။

တႃႇႁႂ်ႈၵိုတ်းတိုၵ်းၵၼ်လႆႈၼႆသေမိူင်းၶႄႇ ယူႇၵၢင်ႁူၺ်းႁွင်ႉဢဝ်တူဝ်တႅၼ်းတၢင်း 2 ၾၢႆႇၵႂႃႇဢုပ်ႇဢူဝ်ၵၼ် တီႈဝဵင်းၶုၼ်းမိင် မိူင်းၶႄႇ မိူဝ်ႈဝၼ်းတီႈ 8 လႄႈ 9 လိူၼ်တီႊသႅမ်ႊပိူဝ်ႊၼႆႉ။ ၾၢႆႇတၢင်းၶႄႇတႄႉပိုၼ်ၽၢဝ်ႇဝႃႈ ၶေႃႈတူၵ်းလူင်းၵၼ်ပဵၼ်ငဝ်းလၢႆးလီၼႆသေတႃႉ ၼႂ်းဝၼ်းၼၼ်ႉၵူၺ်းပၢင်တိုၵ်းၼႂ်းၸႄႈဝဵင်းၼမ်ႉၶမ်း မူႇၸေႊ ပဵၼ်ႁၢဝ်ႈႁႅင်း။ ယင်းလၢမ်းလူင်းမႃးထိုင် သႅၼ်ဝီ ၼမ်ႉသၼ်ႇၸိူဝ်းၼႆႉထႅင်ႈလူးၵွၼ်ႇ။