တႄႇဢဝ် ၵၢင်လိူၼ်ၼူဝ်ႊဝႅမ်ႊပိူဝ်ႊၼႆႉမႃး သိုၵ်းမၢၼ်ႈ ပိၵ်ႉဢိုတ်းသဵၼ်ႈတၢင်း ၼႂ်းၸိုင်ႈတႆးပွတ်းႁွင်ႇ လၢႆသဵၼ်ႈတၢင်း ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇ တႃႇဢွၵ်ႇတႃႈပႆတၢင်း တေႃႉသူင်ႇၶူဝ်းၵုၼ်ႇ ၸိူဝ်းၼႆႉ။

ယၢမ်းလဵဝ် ဢၼ်ယူႇတီႈ သိုၵ်းမၢၼ်ႈ ယိုတ်းမိူင်း ပိၵ်ႉဢိုတ်းသဵၼ်ႈတၢင်းၼႆႉသမ်ႉ ၸွမ်းၵဵတ်ႉ/ လၢၼ်ႇ၊ ၸွမ်းတပ်ႉၶဝ် ၼႂ်းၸႄႈဝဵင်းသီႇပေႃႉ တၢင်းၶဝ်ႈဢွၵ်ႇဝဵင်းတၢင်ႉယၢၼ်းလႄႈ ဝဵင်းမိူင်းယႆ ၼႂ်းၸိုင်ႈတႆး ပွတ်းႁွင်ႇ ၸိူဝ်းၼႆႉ။

ၵူၼ်းဝဵင်းသီႇပေႃႉ ၽူႈၸၢႆးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းၸႄႈဝဵင်းသီႇပေႃႉၼႆႉ တီႈၼမ်ႉလၼ်ႈၼၼ်ႉ ၶဝ်ပိၵ်ႉတၢင်းမူတ်းဢေႃႈ။ သဵၼ်ႈတၢင်းလူင်ၼႆႉ ပေႃးတီႈမီးသိုၵ်းမၢၼ်ႈ ပႂ်ႉဝႆႉၼႆ ၶဝ်ပိၵ်ႉ ဝႆႉမူတ်းယဝ်ႉ။ မိူၼ်ၸိူင်ႉၼင်ႇ ၵႃးတၢင်ႇၵုၼ်ႇ ၸိူဝ်းၼႆႉၵေႃႈ ၶဝ်ဢမ်ႇပၼ်ၵႂႃႇ။ ၼမ်ႉမၼ်းရူတ်ႉၵႃး ၸိူဝ်းၼႆႉၵေႃႈ ၶဝ်ဢမ်ႇပၼ်တၢင်ႇသေဢိတ်း ယၢမ်းလဵဝ်ၼႆႉ မိူၼ်ၸိူင်ႉၼင်ႇ လႅင်းၵႃး ၸိူဝ်းၼႆႉဢမ်ႇ ပၼ်ၵႂႃႇယဝ်ႉ”- ဝႃႈၼႆ။

သိုၵ်းမၢၼ်ႈ ပိၵ်ႉဢိုတ်းသဵၼ်ႈတၢင်း တီႈၼမ်ႉလၼ်ႈၼႆႉ ပဵၼ်တီႈဝၢၼ်ႈၵွင်းလၢင်းလႄႈ ဝၢၼ်ႈၶူဝ်လွင်း ၸိူဝ်းၼႆႉ ဢမ်ႇပၼ်ၵႃးၶၢမ်ႈၵႂႃႇမႃး။ ပေႃးပဵၼ်ၵႃးလူင်ၼႆ တိုၼ်းၵႂႃႇဢမ်ႇပၼ်ၵႂႃႇမႃး။ ၵႃးဢွၼ်ႇတႄႉ သင်တေၵႂႃႇတၢင်ႉယၢၼ်းၸိုင် တေလႆႈလၢတ်ႈၵႂၢမ်းၼမ်ဢိတ်းၼိုင်ႈသေ သိုၵ်းမၢၼ်ႈ ၸင်ႇ ၵွႆႈပွႆႇၵႂႃႇ – ၵူၼ်းသီႇပေႃႉ သိုပ်ႇလၢတ်ႈၼႄၼင်ႇၼႆ။

ဢၼ်သိုၵ်းမၢၼ်ႈပိၵ်ႉဢိုတ်းသဵၼ်ႈတၢင်းၼႆႉ လိူဝ်သေၵူၼ်းမိူင်း ဢမ်ႇၸၢင်ႈၵႂႃႇမႃးယဝ်ႉ ၽွၼ်းယွၼ်ႈဢၼ်မႃးၸွမ်းလင်သမ်ႉ ႁဵတ်းႁႂ်ႈၶၼ်ၶူဝ်းၵုၼ်ႇ၊ ၶွင်ၵိၼ်ယႅမ်ႉၵႃႈၶိုၼ်ႈႁႅင်း။ ယၢမ်းလဵဝ် ၵူၼ်းမိူင်း ဢွၼ်ၵၼ်ထူပ်းတၢင်းယၢပ်ႇၽိုတ်ႇ တႃႇသိုဝ်ႉၵိၼ်သိုဝ်ႉယႅမ်ႉ ၼႆယဝ်ႉ။

“မိူဝ်ႈလဵဝ်ၼႆႉ ၼမ်ႉမၼ်းရူတ်ႉၼမ်ႉမၼ်းၵႃးၵႃႈႁႅင်း။ မိူဝ်ႈဢွၼ်တၢင်းၼႆ 1 ပေႇပႃႇၼႆႉ တေမီး 7 – 8 သႅၼ်။ မိူဝ်ႈလဵဝ်ၶိုၼ်ႈမႃးပဵၼ် 13 သႅၼ် 14 သႅၼ်ယဝ်ႉ။ ၽၵ်းၶဵဝ်၊ မၢၵ်ႇၶိူဝ်သူမ်ႈ ၸိူဝ်းၼႆႉ မိူဝ်ႈဢွၼ်တၢင်းတေမီး 3 – 4 ႁဵင်။ ယၢမ်းလဵဝ် ၶၼ်ၶိုၼ်ႈမႃး 6 ႁဵင်ပျႃးယဝ်ႉ။ ၼမ်ႉမၼ်းၵိၼ် ၼိုင်ႈၸွႆႉ လႆႈသိုဝ်ႉ 14,000 ပျႃးယဝ်ႉ”- ၵူၼ်းဝဵင်းသီႇပေႃႉလၢတ်ႈ။

ယဝ်ႉၵေႃႈ မိူၼ်ၼင်ႇ ၵွၼ်ႈသီ(သပ်ႉပျႃႇ) ၼိုင်ႈၵွၼ်ႈၼႆႉ လႆႈသိုဝ်ႉ 2,000 ပျႃး၊ တီႈၵေးသီးသမ်ႉ1 ၵွၼ်ႇ 5,000 ပျႃး ၼႆယဝ်ႉ။

ဢၼ်သိုၵ်းမၢၼ်ႈ ပိၵ်ႉဢိုတ်းသဵၼ်ႈတၢင်း ၼႂ်းၸိုင်ႈတႆးပွတ်းႁွင်ႇၼႆႉ ၼွၵ်ႈလိူဝ် တီႈဝဵင်းသီႇပေႃႉယဝ်ႉ မိူၼ်ၼင်ႇ ဝဵင်း ၵေးသီး၊ ဝဵင်းမိူင်းၵိုင်၊ ဝဵင်းလွၵ်ႉၸွၵ်ႇ၊ ဝဵင်းၼမ်ႉလၼ်ႈ၊ ဝဵင်းတၢင်ႉယၢၼ်း၊ မိူင်းယႆ၊ ၼွင်ၶဵဝ် ၸိူဝ်းၼႆႉလႄႈ ၾၢႆႇၼွၵ်ႈဝဵင်းလႃႈသဵဝ်ႈ ၸိူဝ်းၼႆႉ။

ဢၼ်သိုၵ်းမၢၼ်ႈ ပိၵ်ႉဢိုတ်းသဵၼ်ႈတၢင်းၼႆႉ ၼွၵ်ႈလိူဝ်ၵူၼ်းမိူင်း ထူပ်းတၢင်းယၢပ်ႇၽိုတ်ႇ ယွၼ်ႉၶူဝ်းၵုၼ်ႇၵႃႈၶိုၼ်ႈယဝ်ႉ ႁဵတ်းႁႂ်ႈၵူၼ်းမိူင်း၊ ၵူၼ်းႁေႃႈရူတ်ႉၵႃးၶဝ် ဢမ်ႇၸၢင်ႈႁဵတ်းၵၢၼ်ႁႃၵိၼ်လဵင်ႉတွင်ႉၵူၺ်းဢမ်ႇၵႃး ၼင်ႇႁိုဝ် ၵၢၼ် ၽွင်းငမ်း ဢၼ်ၸုမ်းဢူၺ်းလီ 3 ၸုမ်းၶဝ် တေဢမ်ႇသိုပ်ႇယၢင်ႈ ၵႂႃႇလႆႈၶၢဝ်းမိူဝ်းၼႃႈ ၼႆယဝ်ႉ။