ယၢမ်းလဵဝ် ၸွမ်းသဵၼ်ႈတၢင်းလူင် ဝဵင်းသီႇပေႃႉ – ဝဵင်းၼမ်ႉလၼ်ႈ တီႈႁိမ်းဝၢၼ်ႈၼႃးမၢၵ်ႇၶေႃၼႆႉ သိုၵ်း မၢၼ်ႈတင်း သိုၵ်းၵဝ်ႈၵၢင်ႉ MNDAA ထႅမ်ႁႅင်းသိုၵ်း ၶဵင်ႈၶႅင်ၵၼ်ဝႆႉလႄႈ ၾၢႆႇသိုၵ်းမၢၼ်ႈ ပိၵ်ႉဢိုတ်းပႅတ်ႈ သဵၼ်ႈတၢင်းလႄႈ ႁဵတ်း ႁႂ်ႈၵူၼ်းမိူင်း ဢမ်ႇၸၢင်ႈၵႂႃႇမႃး ၼႆယဝ်ႉ။

ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ်ၼႆႉ တေလုၵ်ႉသီႇပေႃႉ ၵႂႃႇၼမ်ႉလၼ်ႈ ဢမ်ႇလႆႈယဝ်ႉၶႃႈ။ ပဵၼ်တီႈၼႂ်းၵႄႈ ဝၢၼ်ႈမွၼ်းလႄႈ ၼႃးမၢၵ်ႇၶေႃၶႃႈဢေႃႈ။ သိုၵ်းမၢၼ်ႈသမ်ႉ ယူႇၾၢႆႇ ၼိုင်ႈ သိုၵ်းၵဝ်ႈၵၢင်ႉသမ်ႉ ယူႇဝႆႉၾၢႆႇၼိုင်ႈ ၸိူင်ႉၼၼ်ဢေႃႈ။ ဢၼ်လႆႈႁူႉတႄႉ မိူဝ်ႈလဵဝ် သိုၵ်းသွင်ၾၢႆႇ ၶဵင်ႈၶႅင်ၵၼ်ဝႆႉလႄႈ ၵူဝ်ပဵၼ်ပၢင်တိုၵ်းဢေႃႈ”- ဝႃႈၼႆ။

သိုပ်ႇလၢတ်ႈဝႃႈ – “ၵွပ်ႈၼႆလႄႈ သိုၵ်းမၢၼ်ႈ ၸင်ႇပိၵ်ႉဢိုတ်းတၢင်းၶႃႈဢေႃ။ ၵူၼ်းဢၼ်လုၵ်ႉတၢင်း ၼႃး မၢၵ်ႇၶေႃမႃးၵေႃႈ ၶဝ်ဢမ်ႇပွႆႇၵႂႃႇတၢင်းၼမ်ႉလၼ်း။ ဢမ်ႇၸၢင်ႈသိုပ်ႇၶၢဝ်း တၢင်းလႄႈ မၢင်ဝၼ်းၵႃးၵိုတ်း ၶမ်သေ လႆႈၼွၼ်းပႂ်ႉၸွမ်းတၢင်းၸမ်ပႃႇႁဵဝ်ႈ၊ တီႈဝတ်ႉၵျွင်း ၸိူဝ်းၼႆႉ။ ၸူဝ်ႈသွင်သၢမ်ဝၼ်းၼႆႉ ဢမ်ႇမီး ၵႃးၽႂ်ၵႂႃႇမႃးယဝ်ႉ ႁဝ်းၶႃႈၵေႃႈ လႆႈလဵပ်ႈမႃးမႃးတၢင်းမိူင်းယႆ – ၵေးသီး ဢဝ်ၶႃႈဢေႃႈ”- ဝႃႈၼႆ။

ယွၼ်ႉပိၵ်ႉဢိုတ်းသဵၼ်ႈတၢင်းၼႆႉသေ ႁဵတ်းႁႂ်ႈၵူၼ်းမိူင်းပိုၼ်ႉတီႈၶဝ် ၵႂႃႇမႃးယၢပ်ႇၽိုတ်ႇႁႅင်း ယၢမ်းလဵဝ် ၵၢၼ်တေႃႉသူင်ႇၵေႃႈ ဢမ်ႇပဵၼ်ၵၢၼ်။ လိူဝ်ၼၼ်ႉ သင်မီးလွင်ႈၶိုၵ်ႉၶၵ်ႉသေ တေလႆႈၵႂႃႇမႃးၶိုတ်းတၼ်းၼႆၸိုင် ယင်းတေထူပ်းလွင်ႈယၢပ်ႇထႅင်ႈ။

“မၼ်းယၢပ်ႇၸႂ်ၶႃႈဢေႃႈ။ ပေႃးပဵၼ်ၼႆ ၽႂ်ၵေႃႈ ၵႂႃႇမႃးဢမ်ႇလႆႈလႄႈ ၶၼ်ၵုၼ်ႇၵေႃႈ ၶိုၼ်ႈထႅင်ႈ။ မိူဝ်ႈလဵဝ်ၼႆႉ ႁဝ်း ၵူၼ်းမိူင်းတႄႉ ပႆသေလိူဝ်ဢမ်ႇပဵၼ်ၵၢၼ် လွင်ႈၵႂႃႇမႃးသမ်ႉယၢပ်ႇထႅင်ႈ ၼမ်ႉမၼ်းရူတ်ႉ ၼမ်ႉမၼ်းၵႃး ၸိူဝ်းၼႆႉ ၵေႃႈ ၶိုၼ်ႈႁႅင်း။ တႃႇတေၵႂႃႇမႃးၵေႃႈ ဢမ်ႇငၢႆႈ တႃႇႁႃငိၼ်ႁႃယႅမ်ႉၵေႃႈ ဢမ်ႇငၢႆႈ ပေႃးဝႃႈ ယူႇဢမ်ႇလီမႃး ပဵၼ်မႃးသေ ၸိူဝ်ႉသေလွင်ႈ လူဝ်ႇဢွၵ်ႇတၢင်းၸိုင် မၼ်းတေယၢပ်ႇၵိၼ်းႁႅင်း တႄႉဢေႃႈ။ မၼ်းဢမ်ႇၸၢင်ႈႁဵတ်းႁိုဝ် ၸွမ်းႁူင်းယႃၵေႃႈ မိူဝ်ႈလဵဝ် မေႃယႃသမ်ႉ ဢမ်ႇမီးၼႆ တေယၢပ်ႇ ၸႂ်ၵူႈလွင်ႈယဝ်ႉ”- ၵူၼ်းပိုၼ်ႉတီႈ ဝဵင်းသီႇပေႃႉ သိုပ်ႇလၢတ်ႈၼႄၼင်ႇ ၼႆ။

ၼႂ်းဝဵင်းသီႇပေႃႉ – လႃႈသဵဝ်ႈၼႆႉ ဝၢႆးသိုၵ်းၵဝ်ႈၵၢင်ႉ MNDAA တင်း သိုၵ်းတဢၢင်း TNLA ပဵၼ်ပၢင်တိုၵ်း ၵၼ်တင်း သိုၵ်းမၢၼ်ႈယဝ်ႉ သိုၵ်းတင်းသွင်ၾၢႆႇ တူင်ႉၼိုင်ၵႂႃႇမႃးဝႆႉ။ မိူၼ်ၼင်ႇ ႁိမ်းႁွမ်းဝဵင်းၼမ်ႉလၼ်ႈၵေႃႈ ၾၢႆႇသိုၵ်းမၢၼ်ႈ လိူဝ်သေၵႆႉယိုဝ်း ၵွင်ႈလူင်ၵႂႃႇၵူႈႁူးၵူႈတၢင်းယဝ်ႉ။ ယင်းထႅမ်ႁႅင်းသိုၵ်း ၶဝ်ႈၵုမ်းၼႂ်း ပိုၼ်ႉတီႈ။ ယွၼ်ႉၼၼ် ၵူၼ်းမိူင်းၶဝ်မႆႈၸႂ် လွင်ႈႁူမ်ႇလူမ်ႈသၢႆၸႂ်ၸဝ်ႈၵဝ်ႇ ၽွင်းဢွၵ်ႇတႃႈဢွၵ်ႇတၢင်း ႁဵတ်းႁႆႈႁဵတ်းသူၼ် ၸိူဝ်းၼႆႉ ဝႃႈၼႆ။