သိုၵ်းမၢၼ်ႈ ယိုတ်းမိူင်း တင်ႈၸႂ်ပိၵ်ႉသဵၼ်ႈတၢင်းလူင် မိူင်းမိတ်ႈ – မိူင်းၵုတ်ႈ ဢမ်ႇပၼ်ၵူၼ်းမိူင်းၵႂႃႇမႃး ႁဵတ်းႁႂ်ႈတုမ်ႉတိူဝ်ႉ ၵူၼ်းပိုၼ်ႉတီႈထူပ်းတၢင်းယၢပ်ႇၽိုတ်ႇႁႅင်း လွင်ႈၵႂႃႇမႃး။
တႄႇဢဝ် ၵၢင်လိူၼ်သႅပ်ႊထႅမ်ႊပိူဝ်ႊ 2023 ၼႆႉမႃး သိုၵ်းမၢၼ်ႈ ယိုတ်းမိူင်း မၢႆတပ်ႉ 148 တင်း တပ်ႉမ 88 ႁူမ်ႈၵၼ် ပိၵ်ႉ ဢိုတ်းသဵၼ်ႈတၢင်း မိူင်းမိတ်ႈ – မိူင်းၵုတ်ႇ ဢမ်ႇပၼ် ၵူၼ်းမိူင်းၵႂႃႇမႃး ယွၼ်ႉၵူဝ်ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၽၢမ်းႁဵတ်း ၵူၼ်းပိုၼ်ႉတီႈၵႂႃႇမႃးလႄႈ ၵူဝ်ၸုမ်း PDF ၶိုၼ်ႈမႃးတူင်ႉၼိုင်ၼမ် ဝႃႈၼႆ။
ၽူႈတူင်ႉၼိုင် ၵၢၼ်သိုၵ်း တၢင်းပွတ်းထုင်ႉ မိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ တႄႇပိၵ်ႉတၢင်းမႃးၼႆႉ ပဵၼ်ၼႂ်း လိူၼ်ၼႆႉၶႃႈ။ ၶဝ်တိုၼ်းပိၵ်ႉဢိုတ်း ဢမ်ႇပၼ်ၽႂ်ၵႂႃႇမႃးသေဢိတ်းၼၼ်ႉယဝ်ႉ။ ၶဝ်ၵူဝ်သိုၵ်းၶၢင် KIA ၊ သိုၵ်းတဢၢင်း TNLA လႄႈ ၸုမ်း PDF ၸိူဝ်းၼႆႉ ၽၢမ်းႁဵတ်းၵူၼ်းမိူင်းယူဝ်းယူဝ်းသေၵႂႃႇမႃး။ ယဝ်ႉၵေႃႈ ၶဝ်ၵူဝ် PDF ၶိုၼ်ႈမႃးတူင်ႉၼိုင်ၼမ်ၶႃႈ ယူဝ်ႉ။ ဢၼ်ၶဝ်ပိၵ်ႉတၢင်းၼႆႉ မၼ်းႁဵတ်းႁႂ်ႈတုမ်ႉတိူဝ်ႉၵူၼ်းမိူင်း ၵႂႃႇမႃးႁႃၵိၼ်လဵင်ႉတွင်ႉယၢပ်ႇၽိုတ်ႇတႄႉတႄႉၶႃႈဢေႃႈ”- ဝႃႈ ၼႆ။
ဝဵင်းမိူင်းမိတ်ႈၼႆႉ ပဵၼ်ဝဵင်းၸႄႈတွၼ်ႈႁင်းၵူၺ်းမၼ်းၶေႃၶေႃ ယူႇဝႆႉၼႂ်းၸိုင်ႈတႆးပွတ်းႁွင်ႇ ဝဵင်းမိူင်းၵုတ်ႈသမ်ႉ ယူႇဝႆႉ ၼႂ်းတိူင်း ဝဵင်းလိူဝ်ႇ (မၼ်းတလေး)။ မိူင်းမိတ်ႈတင်း မိူင်းၵုတ်ႈၼႆႉ ယၢၼ်ၵႆၵၼ် 27 လၵ်း 1 ၽႃႇလူင်ႇ ၊ ၵူၺ်းၵႃႈ ပဵၼ်ပီႈၼွင်ႉတႆးယူႇသဝ်းၵိၼ်သၢင်ႈၼမ်တင်း 2 ဝဵင်း။
ၵူၼ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈသိုၵ်းမၢၼ်ႈၶဝ် မႃးပိၵ်ႉ သဵၼ်ႈတၢင်း ၸိူင်ႉၼႆ ၼႆႉ မၼ်း တုမ်ႉတိူဝ်ႉႁဝ်းၶႃႈ ၵူၼ်းမိူင်းၵႂႃႇမႃးႁႃၵိၼ်လဵင်ႉတွင်ႉတႄႉတႄႉဝႃႈဝႃႈၶႃႈယဝ်ႉ ႁဝ်းၶႃႈ ဢမ်ႇႁတ်းၵႂႃႇမႃး ၵူၼ်းမိူင်းၵႂႃႇမႃး ပေႃး ယဵၼ်လူင်ဝႆႉၶႃႈဢေႃႈ ယၢမ်းလဵဝ်ၼႆႉ”- ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 10/9/2023 ၼၼ်ႉ သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ၸွမ်း သၢပ်ႇဝဵင်းမိူင်းၵုတ်ႈႁၢဝ်ႈႁႅင်း ထိုင်မႃး ဝၼ်းတီႈ 15-17/9/2023 ၶၢဝ်းတၢင်း 3 ဝၼ်းမႃးၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်ယိုဝ်းၸွႆႈ ပွႆႇမၢၵ်ႇလူင်သႂ်ႇ ဢမ်ႇယွမ်း 100 လုၵ်ႈ ဝႃႈၼႆ။
ဢိင်ၼိူဝ် သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ်မႃး ၼႂ်းၵႄႈၵျွၵ်ႉမႄး – မိူင်းၵုတ်ႈၼႆႉ ဢမ်ႇယွမ်း 6 ပွၵ်ႈ ၵူၼ်းမိူင်းပၢႆႈၽေးသိုၵ်း ၶဝ်ႈမူၵ်းသွၼ်ႈၸွမ်းႁိူၼ်းယေး ပီႈၼွင်ႉၽႂ်မၼ်း ၼႂ်းမိူင်းၵုတ်ႈလႄႈ ၸွမ်းထိူၼ်ႇ ၸိူဝ်း ၼႆႉၼမ် တီႈသိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။
တႄႇဢဝ် ဝၼ်းတီႈ 23/7/2023 ၼၼ်ႉမႃး ႁၢၼ်ႉတေႃႇထိုင် ဝၼ်းတီႈ 17/9/2023 ၼႆႉ သိုၵ်းမၢၼ်ႈ ယိုတ်းမိူင်းတင်း သိုၵ်း တဢၢင်း TNLA ပဵၼ်ပၢင်တိုၵ်းၵၼ်မႃး ဢမ်ႇယွမ်း 40 ပွၵ်ႈ ယူႇတီႈႁွင်ႈၵၢၼ် ၾၢႆႇပိုၼ်ၽၢဝ်ႇ တပ်ႉသိုၵ်း TNLA ဢွၵ်ႇဝႆႉ ၼင်ႇၼႆ။
လိူဝ်ၼၼ်ႉ သိုၵ်းမၢၼ်ႈ ယိုတ်းမိူင်းတင်း ပျီႇတူႉၸိတ်ႉ ႁူမ်ႈၵၼ် လေႃႇတိုၵ်း တပ်ႉသိုၵ်းတဢၢင်း TNLA တၢင်းပွတ်းဝဵင်းမူႇၸေႊ ၸိုင်ႈတႆးပွတ်းႁွင်ႇ ႁၢဝ်ႈႁႅင်း တင်ႈတႄႇ ဝၼ်းတီႈ 17-19/9/2023 ၶၢဝ်းတၢင်း 3 ဝၼ်းမႃးၼႆႉ။
