သိုၵ်းမၢၼ်ႈပွႆႇမၢၵ်ႇ တီႈဝဵင်းမိူင်းၵုတ်ႈ ၸိုင်ႈတႆးပွတ်းႁွင်ႇ ႁဵတ်းႁႂ်ႈ မၢၵ်ႇလူင်တူၵ်းတႅၵ်ႇတိူဝ်ႉသႂ်ႇ ၸဝ်ႈသၢင်ႇတူၼ်ၼိုင်ႈ လႄႈ ၼၢင်းယိင်းၼိုင်ႈၵေႃႉ မၢတ်ႇၸဵပ်း လူႉတၢႆ   ။

မိူဝ်ႈဝႃးဝၼ်းတီႈ 4 /1/2026 ယၢမ်းၵၢင်ၼႂ် 8 မူင်း မၢၵ်ႇတူၵ်းတႅၵ်ႇ တီႈၵျွင်းမုၼ်ႇၸဝ်ႈရတၼႃႇသီႇရိ ၼႂ်းပွၵ်ႉလႄႇဢူး ႁဵတ်းႁႂ်ႈၸဝ်ႈသၢင်ႇတူၼ်ၼိုင်ႈလူႉလွၼ်ႇၵႂႃႇ ဝႃႈၼႆ ။ လိူဝ်ၼၼ်ႉ မၢၵ်ႇတူၵ်းတႅၵ်ႇ ထႅင်ႈ တီႈႁူင်းႁဵၼ်းၸၼ်ႉသုင် ဢထၵ (4)  ႁဵတ်းႁႂ်ႈ ၼၢင်းယိင်းလႄႈလုၵ်ႈဢွၼ်ႇပၢႆးၽေးသိုၵ်းလူႉတၢႆ မၢတ်ႇၸဵပ်း   ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ –“မိူဝ်ႈဝႃးမၢၵ်ႇတူၵ်းတီႈၼႂ်းပွၵ်ႉလႄႇဢူး လႄႈ ႁူင်းႁဵၼ်းသွၼ်လိၵ်ႈ ။ တိူဝ်ႉသႂ်ႇ ၸဝ်ႈသၢင်ႇ တီႈၵျွင်းရတၼႃႇသီႇရိ တူၼ်ၼိုင်ႈ လႄႈ ဢၼ်တူၵ်းတီႈဝၢင်းႁူင်းႁဵၼ်းၼၼ်ႉတႄႉ တိူဝ်ႉၼၢင်းယိင်းလႄႈ လုၵ်ႈဢွၼ်ႇ ၊ ၼၢင်းယိင်းတႄႉ မၢတ်ႇၸဵပ်းလူႉတၢႆၵႂႃႇ ၊ လုၵ်ႈဢွၼ်ႇတႄႉ သူင်ႇၵႂႃႇယူတ်းယႃတူဝ်တီႈလႂ် ဢမ်ႇႁူႉ၊ မိူဝ်ႈဝႃးတႄႉ ဢမ်ႇပဵၼ်ပၢင်တိုၵ်းသင်”– ဝႃႈၼႆ ။  

ၵျွင်းမုၼ်ၸဝ်ႈ ရတၼႃႇသီႇရိ ဢၼ်သိုၵ်းမၢၼ်ႈဢဝ်မၢၵ်ႇပွႆႇမိူဝ်ႈဝႃးၼႆႉ ပဵၼ်ဢွင်ႈတီႈ PDFယူႇသဝ်း ၊ ပူၼ်ႉမႃးလၢႆဝၼ်းၼႆႉ PDF ၶၢႆႉဢွၵ်ႇယဝ်ႉ သိုၵ်းမၢၼ်ႈၸင်ႇဢဝ်တရူၼ်ႊပွႆႇမၢၵ်ႇ- ၵူၼ်းပိုၼ်ႉတီႈလၢတ်ႈ ။

ၵဵဝ်ႇၵပ်းလွင်ႈၼႆႉ ၵူၼ်းၵမ်ႉထႅမ်သိုၵ်းမၢၼ်ႈတႄႉ တႅမ်ႈတၢင်ႇပိုၼ်ၽၢဝ်ႇဝႆႉတီႈ Telegram တႄႉလၢတ်ႈဝႆႉဝႃႈ သိုၵ်းPDFဢဝ်မၢၵ်ႇတရူၼ်ႊပွႆႇမၢၵ်ႇတီႈၵျွင်းမုၼ်ၸဝ်ႈရတၼႃႇသီႇရိလႄႈ ႁဵတ်းႁႂ်ႈၸဝ်ႈသၢင်ႇတူၼ်ၼိုင်ႈလႄႈ ၼၢင်းယိင်းၵေႃႉၼိုင်ႈမၢတ်ႇၸဵပ်းလူႉတၢႆ လၢတ်ႈဝႆႉၼင်ႇၼႆ ။

ဝၢႆးလင်လူင်ပွင်ၸိုင်ႈမိူင်းၶႄႇၶဝ်ႈၵၢင်ဢူပ်ႇဢူဝ်း ငူပ်ႉငီပၼ် သိုၵ်းမၢၼ်ႈတင်းသိုၵ်းတဢၢင်း တူၵ်းလူင်းၵိုတ်းတိုၵ်းၵၼ်ယဝ်ႉ သိုၵ်းတဢၢင်းထွႆသၢႆသိုၵ်းဢွၵ်ႇပၼ်ၶိုၼ်း ၼႂ်းၸႄႈဝဵင်းမိူင်းၵုတ်ႈ – မိူင်းမိတ်ႈၼႆ သိုၵ်းတဢၢင်း ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉ မိူဝ်ႈဝၼ်းတီႈ 29 /10/ 2025 ဝႆႉၼႆသေတႃႉ မိူဝ်ႈႁူဝ်လိူၼ်တီႊသႅမ်ႊပိူဝ်ႊၼႆႉ သိုၵ်းမၢၼ်ႈ တင်း ၸုမ်းသိုၵ်းလုၵ်ႉၽိုၼ်ႉ ယိုဝ်းၵၼ် သဵင်ၵွင်ႈယင်းတိုၵ်ႉတႅၵ်ႇ ၸွမ်းၼႂ်းပွၵ်ႉဝၼ်းဢွၵ်ႇ ၸႄႈဝဵင်းမိူင်းၵုတ်ႈဝႃႈၼႆ ။

ပၢင်တိုၵ်းပဵၼ်ႁၢဝ်ႈႁႅင်းၵႆႉပဵၼ်ၸွမ်းၾၢႆႇၼွၵ်ႈဝဵင်းမိူင်းၵုတ်ႈ ႁိမ်းႁွမ်းဝၢၼ်ႈ တိတ်ႉသဵင်ႉၵူင်း (သစ်ဆိမ့်ကုန်း ရွာ)၊ ဝၢၼ်ႈမေႃႇမႃႉ (ဘော်မားရွာ) ၼႆ ၵူၼ်းမိူင်းၵုတ်ႈ လၢတ်ႈၼႄၼင်ႇၼႆ။

ပိုၼ်ႉတီႈဢၼ်သိုၵ်းတေဢမ်ႇလႆႈယိုဝ်းလႃးလႃး ႁိုဝ် တေဢမ်ႇလႆႈတိူဝ်ႉလႃးလႃးၼႆႉပဵၼ် -ႁိူၼ်းယေး ၵူၼ်းမိူင်း၊ ႁူင်းယႃ ႁွင်ႈယႃ၊ ႁူင်းႁဵၼ်း၊ ဝတ်ႉဝႃး ၽႃသိူဝ်ႇ ဢွင်ႈတီႈၵိူဝ်းယမ်၊ သိင်ႇဝႅတ်ႉလွမ်ႉဝၢၼ်ႈသူၼ်၊ ႁႆႈၼႃးမၢၵ်ႇၶဝ်ႈတဝ်ႈၼမ်ႉ၊ ႁူင်းၵၢၼ်ႁူင်းၸၢၵ်ႈဢၼ်ၸၢင်ႈတႅၵ်ႇပဵၼ်ၵွင်ႉငူၼ်ႉမီးၽေးတေႃႇၵူၼ်းမိူင်း ၸဵမ်ၸိူဝ်းၼႆႉ – ပႃးၼႂ်းလိၵ်ႈၵိၼ်ၵႅၼ်ႇ ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊ ၼင်ႇၼႆ။