မိူဝ်ႈၼႆႉ ဝၼ်းတီႈ 27/2/2024 ယၢမ်းၵၢင်ဝၼ်း 11 မူင်း သိုၵ်းမၢၼ်ႈ ယိုတ်းမိူင်းတင်း ပျီႇတူႉၸိတ်ႉပဢူဝ်း PNO ပိၵ်ႉ ဢိုတ်း သဵၼ်ႈတၢင်း ပၢင်လူင် – ၵျွၵ်ႉတၢၼ်း – ႁူဝ်ပူင်း ဝႆႉၸူဝ်ႈၶၢဝ်း ႁဵတ်းႁႂ်ႈၵူၼ်းမိူင်း – ၸဝ်ႈရူတ်ႉၵႃး ၵႂႃႇမႃးထူပ်းတၢင်းယၢပ်ႇၽိုတ်ႇထႅင်ႈ။

ၸဝ်ႈရူတ်ႉၵႃး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ပိၵ်ႉတၢင်းထႅင်ႈယဝ်ႉၶႃႈ တီႈတၢင်းၽႄထမ်ႈၸၢင်ႉၼၼ်ႉ ၶႃႈဢေႃႈ။  ပဵၼ်သိုၵ်းမၢၼ်ႈတင်း ပျီႇတူႉၸိတ်ႉပဢူဝ်းၶႃႈဢေႃႈ။ ၶဝ်ဝႃႈ ပိၵ်ႉၸူဝ်ႈၶၢဝ်းၼႆၶႃႈဝႃႇ။ ႁဵတ်းသင်လႄႈ ပိၵ်ႉတႄႉ ဢမ်ႇႁူႉၶႃႈ။ မီးသဵၼ်းတၢင်းၼႆႉၵူၺ်းၶႃႈၼႃႇ ဢၼ်တိုၵ်ႉၵႂႃႇမႃးလႆႈ။ မိူၼ်ၼင်ႇ သဵၼ်ႈတၢင်းလူင် လွႆလႅမ် – မိူင်းပွၼ် – ႁူဝ်ပူင်း ၸိူဝ်းၼၼ်ႉ သမ်ႉ ဢမ်ႇၸၢင်ႈၵႂႃႇမႃးလႆႈၶႃႈလူး”- ဝႃႈၼႆ။

သဵၼ်ႈတၢင်းလတ်း ပၢင်လူင် – ပၢင်မူင်ႈ – ၵျွၵ်ႉတၢၼ်း – ႁူဝ်ပူင်း – တူၼ်ႈတီးၼႆႉ လႆႈၸႂ်ႉၶၢဝ်းယၢမ်းၵႂႃႇမႃးမွၵ်ႈ 2 ၸူဝ်ႈမူင်း။ သဵၼ်ႈတၢင်းၼႆႉ တေၸၼ်း၊ ၵူတ်ႉ၊ ၵႅပ်ႈ။ ပေႃးပဵၼ်သဵၼ်ႈတၢင်းလူင် မိူၼ်ၼင်ႇ – ပၢင်လူင် – လွႆလႅမ် – မိူင်းပွၼ် – ႁူဝ်ပူင်း – တူၼ်ႈတီးၼၼ်ႉသမ်ႉ တေၸႂ်ႉၶၢဝ်းယၢမ်းၵႂႃႇမႃး မွၵ်ႈ 3 ၸူဝ်ႈမူင်းၶိုင်ႈ။ ၵူၺ်းၵႃႈ သဵၼ်ႈတၢင်းၼၼ်ႉတႄႉ ထုၵ်ႇသိုၵ်းမၢၼ်ႈ တင်း ပျီႇတူႉၸိတ်ႉပဢူဝ်း ပိၵ်ႉဢိုတ်းပႅတ်ႈ တီႈတၢင်းၶဝ်ႈဢွၵ်ႇဝဵင်းမိူင်းပွၼ် ႁိုင်မႃး 7 ဝၼ်းယဝ်ႉ ပႆႇပိုတ်ႇ။

ၸဝ်ႈၵုၼ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပေႃးသဵၼ်ႈတၢင်းၼႆႉ ပိၵ်ႉဢိုတ်းထႅင်ႈၸိုင် ႁဝ်းၶႃႈ ၵူၼ်းမိူင်းတႄႉ တုၵ်ႉၶယဝ်ႉ။ တေဢမ်ႇၸၢင်ႈၵႃႉၶၢႆသင်ယဝ်ႉ။ ၵမ်ႈၼမ် ၼႂ်းၸိုင်ႈတႆးပွတ်းၸၢၼ်းလႄႈ ပွတ်းႁွင်ႇတႄႉ လႆႈၸႂ်ယႂ်ႇ ပႂ်ႉၶူဝ်းၵုၼ်ႇ၊ ၼမ်ႉ မၼ်းၸၢၵ်ႈ တၢင်းတူၼ်ႈတီး ၸိူဝ်းၼၼ်ႉမႃးၶၢႆ”- ဝႃႈၼႆ။

ၸူဝ်ႈသိုၵ်းမၢၼ်ႈ ယိုတ်းမိူင်းတင်း ၸုမ်းပျီႇတူႉၸိတ်ႉပဢူဝ်း PNO ပိၵ်ႉဢိုတ်းသဵၼ်ႈတၢင်းလူင် လွႆလႅမ် – မိူင်းပွၼ် – ႁူဝ်ပူင်း – တူၼ်ႈတီး ၼႂ်းၶၢဝ်းတၢင်း 7 ဝၼ်းမႃးၼႆႉ ၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ) 1 ပီႇပႃႇလႂ် 9 သႅၼ်ပျႃးယဝ်ႉ တၢင်းဝဵင်းပၢင် လူင် – လွႆလႅမ်ၼႆႉ။ ၵွၼ်ႇသဵၼ်ႈတၢင်းပႆႇပိၵ်ႉဢိုတ်းၼၼ်ႉတႄႉ 1 ပီႇပႃႇလႂ် 6 သႅၼ်ပျႃး။ ၼမ်ႉမၼ်း ၸၢၵ်ႈ 1 ပီႇပႃႇသမ်ႉ မီး 225 လိတ်ႊတႃႊ ၼႆယဝ်ႉ။

ဢိင်ၼိူဝ် လွင်ႈသဵၼ်ႈတၢင်း ပၢင်လူင် – ၵျွၵ်ႉတၢၼ်း – ႁူဝ်ပူင်းၼႆႉ ရူတ်ႉၵႃး ပိၼ်ႈၶွမ်ႈတူၵ်းတၢင်း ဢမ်ႇယွမ်း 10 လမ်းယဝ်ႉ။ ၵမ်ႈၼမ် ပဵၼ်ရူတ်ႉၵႃးဢွၼ်ႇ ၵႃးသုၼ်ႇတူဝ်။ မိူၼ်ၼင်ႇ ရူတ်ႉၵႃးလူင် 10 လေႃႉ ၶိုၼ်ႈၼိူဝ် ၸိူဝ်းၼႆႉတႄႉ ဢမ်ႇၸၢင်ႈၵႂႃႇမႃး ယွၼ်ႉတၢင်းၸၼ်း၊ ၵူတ်ႉ၊ ၵႅပ်ႈ –  ၸဝ်ႈရူတ်ႉၵႃးလၢတ်ႈ။