ပၢင်တိုၵ်း တီႈဝဵင်းသႅၼ်ဝီ တုမ်ႉတိူဝ်ႉ ၵၢၼ်ႁႃၵိၼ်လဵင်ႉတွင်ႉၵူၼ်းမိူင်းလိူဝ်ႁႅင်းလႄႈဢွၼ်ၵၼ် တုၵ်းယွၼ်းယႃႇႁႂ်ႈပဵၼ်ပၢင်တိုၵ်း ၼႂ်း ဝၢၼ်ႈၼႂ်းသူၼ်ထႅင်ႈ။  

တႄႇဢဝ် ႁူဝ်လိူၼ်ဢွၵ်ႊထိူဝ်ႊပိူဝ်ႊ 2023 ၼႆႉမႃး သိုၵ်းမၢၼ်ႈ ယိုတ်းမိူင်းတင်း သိုၵ်းၶၢင် KIA ပဵၼ်ပၢင်တိုၵ်းၵၼ်မႃး ႁၢဝ်ႈ ႁႅင်း ၼႂ်းဢိူင်ႇၵုၼ်ၵွၵ်ႇ ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ႁဵတ်းႁႂ်ႈၵူၼ်းဝၢၼ်ႈၵုၼ်ၵွၵ်ႇ၊ ဝၢၼ်ႈၽၢႆ ၶမ်း၊ ဝၢၼ်ႈတၢင်ႉၶၢၼ်၊ ဝၢၼ်ႈပဵင်းသၢင်းလႄႈ ဝၢၼ်ႈၼွင်မွင်း ၸိူဝ်းၼႆႉ လႆႈပၢႆႈၽေးသိုၵ်း မႃးသွၼ်ႈယူႇဝႆႉ တီႈဝတ်ႉႁူဝ်မိူင်း၊ ၸွမ်းႁိူၼ်းယေး ပီႈၼွင်ႉၽႂ်မၼ်း ၼႂ်းဢိူင်ႇၸေႈဢူလႄႈ ၼႂ်းဝဵင်း ၸိူဝ်းၼႆႉ ၼပ်ႉႁူဝ်ပၢၵ်ႇ။

ၵူၼ်းပၢႆႈၽေးသိုၵ်း တီႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ပၢႆႈၽေးသိုၵ်းမႃးၼႆႉ မီး 4-5 ဝၼ်းယဝ်ႉ ပႆႇလႆႈပွၵ်ႈ ႁိူၼ်း။ ယွၼ်ႉပၢင်တိုၵ်းၶဝ်ၼႆႉသေ ႁဝ်းၶႃႈ လႆႈၶၢတ်ႇၵၢၼ်ငၢၼ်း ယၢပ်ႇၽိုတ်ႇၸွမ်းၶဝ်တႄႉဢေႃႈ။ ယၢမ်းလဵဝ် ပဵၼ်ၶၢဝ်းလူဝ်ႇ ၵၢၼ်ႉၶဝ်ႈၵၢပ်ႇ မၢင်သူၼ် ၶဝ်ႈၵၢပ်ႇပေႃးလိူင်ႁႅင်းၼႃႇယဝ်ႉ။ ပေႃးပဵၼ်လႆႈတႄႉ ယွၼ်းတွင်းပၢၼ်ႇသေ ၶႂ်ႈႁႂ်ႈသိုၵ်းၶဝ် ငိူင်ႉဝႄႈ ပၼ်ၵႆၵႆ ႁႂ်ႈၶဝ်ၵႂႃႇယိုဝ်းၵၼ် တီႈၵႆဝၢၼ်ႈၵႆသူၼ် တီႈဢမ်ႇမီးၵူၼ်းယူႇၼၼ်ႉၶႃႈ။ ယႃႇႁႂ်ႈပၢင်တိုၵ်းၼႆႉ မႃးပဵၼ်ၼႂ်းဝၢၼ်ႈၼႂ်း သူၼ် ဢွင်ႈတီႈၵူၼ်းမိူင်းယူႇ ၸိူင်ႉၼႆၶႃႈ။ ႁႂ်ႈၵူၼ်းမိူင်း လႆႈႁဵတ်းၵၢၼ်ႁႃၵိၼ်လဵင်ႉတွင်ႉလီလီသေၵမ်း”- ဝႃႈၼႆ။

ယၢမ်းလဵဝ် ၵူၼ်းဝၢၼ်ႈ ၼႂ်းဢိူင်ႇၵုၼ်ၵွၵ်ႇ ပၢႆႈမႃးသွၼ်ႈဝႆႉ တီႈဝတ်ႉႁူဝ်မိူင်း ၵူၼ်းလူင် 70 ၵေႃႉ လုၵ်ႈဢွၼ်ႇ 30 ၵေႃႉ ႁူမ်ႈ 100 ၵေႃႉ။ ယဝ်ႉၵေႃႈ ပၢႆႈသွၼ်ႈယူႇၸွမ်းႁိူၼ်းယေး ပီႈၼွင်ႉၽႂ်မၼ်း ၼႂ်းဢိူင်ႇၸေႈဢူ ၸိူဝ်းၼႆႉ တင်းၼမ်။

“တီႈဝတ်ႉႁူဝ်မိူင်း ၸေႈဢူသမ်ႉ မီးႁူဝ်ၵူၼ်း 100 ၵေႃႉ တီႈၼၼ်ႈတႄႉ မီးပီႈၼွင်ႉ မႃးၸွႆႈထႅမ်ယူႇၶႃႈ ဢၼ်ပၢႆႈမႃးယူႇၸွမ်း ႁိူၼ်း ပီႈၼွင်ႉၽႂ်မၼ်း တီႈၸေႈဢူၵေႃႈမီး၊ မၢင်ၸိူဝ်း ပၢႆႈၸူးတီႈပီႈၼွင်ႉၽႂ်မၼ်း ၼႂ်းဝဵင်း ၸိူဝ်းၼၼ်ႉၵေႃႈ မီးတင်းၼမ်။ ႁူဝ်ၵူၼ်းတင်းမူတ်း မီးၵႃႈႁိုဝ်တႄႉ ပႆႇႁူႉၶႃႈ။ သင်ဝႃႈ ပၢင်တိုၵ်းၼႆႉ တိုၵ်ႉသိုပ်ႇပဵၼ်ၵႂႃႇထႅင်ႈ ၶၢဝ်းႁိုင်ၸိုင် တေမီး လွင်ႈယၢပ်ႇၽိုတ်ႇတႃႇႁဝ်းၶႃႈ ၵူၼ်းပၢႆႈၽေးတႄႉတႄႉဝႃႈဝႃႈၶႃႈယဝ်ႉ”- ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ်သမ်ႉ ပဵၼ်ၶၢဝ်းလူဝ်ႇၵၢၼ်ႉၶဝ်ႈၵၢပ်ႇ(ၶဝ်ႈၶႄႇ) ယဝ်ႉလႄႈ သူၼ်ၶဝ်ႈၵၢပ်ႇ မၢင်သူၼ် ပေႃးလိူင်ယဝ်ႉ ပႆႇၸၢင်ႈၵၼ်ႉ ယွၼ်ႉမီးသိုၵ်းတူင်ႉၼိုင် ယူႇဝႆႉ ။

ၸဝ်ႈသူၼ် ၼႂ်းဢိူင်ႇၵုၼ်ၵွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ႈၵၢပ်ႇၼႆႉ ႁဝ်းၶႃႈ လူဝ်ႇၵၢၼ်ႉယဝ်ႉ မၢင်သူၼ်ၽုၵ်ႇဝႆႉ ၸွမ်းလွႆ ၼၼ်ႉ မၼ်းဢမ်ႇၸၢင်ႈၵၢၼ်ႉ မီးသိုၵ်းတူင်ႉၼိုင်ယူႇဝႆႉႁိမ်းႁွမ်းလႄႈၼႂ်းသူၼ်ဝႆႉ။ မၢင်သူၼ်သမ်ႉ မီးမၢၵ်ႇတူၵ်းဝႆႉ ပႆႇ တႅၵ်ႇၵေႃႈမီး ။ မၢင်တီႈသမ်ႉ မီးမၢၵ်ႇႁၢင်ႈၵၢင်ဝႆႉလႄႈ ၸဝ်ႈသူၼ် ဢမ်ႇႁတ်းၶဝ်ႈသူၼ်။ သင်ပၢင်တိုၵ်း ယဵၼ်လူင်းယဝ်ႉၵေႃႈ ၵူၼ်းမိူင်း ၸွင်ႇတေပႃႈႁတ်းၵႂႃႇၵၢၼ်ႉၶဝ်ႈၵၢပ်ႇၵမ်းလဵဝ် ယင်းဢမ်ႇၸၢင်ႈလၢတ်ႈ ”- ဝႃႈၼႆ။

သိုၵ်းၶၢင် KIA ပႂ်ႉ တီႈႁိမ်းဝၢၼ်ႈၵုၼ်ၵွၵ်ႇတင်း ဝၢၼ်ႈတၢင်ႉၶၢၼ် ပႂ်ႉၵဵပ်းၶွၼ်ႇၵႃးတၢင်ႇၵုၼ်ႇ ၸိူဝ်းၶိုၼ်ႈ ၵႂႃႇတၢင်း ၵုၼ်လူင် –  ဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) လႄႈ တႄႇဢဝ်ႁူဝ်လိူၼ်ၼႆႉမႃး သိုၵ်းမၢၼ်ႈၸင်ႇႁႅၼ်းသိုၵ်းလေႃႇတိုၵ်း သိုၵ်းၶၢင် KIA မႃးႁၢဝ်ႈႁႅင်း ႁၢၼ်ႉတေႃႇထိုင် ဝၼ်းမိူဝ်ႈၼႆႉ။

ၽူႈတူင်ႉၼိုင် ၵၢၼ်သိုၵ်း တၢင်းထုင်ႉသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် သိုၵ်းမၢၼ်ႈၶဝ် မီးၸွမ်းဝၢၼ်ႈ ၵုၼ်ၵွၵ်ႇ၊ ဝဵင်းၵၢင်း၊ ၵုင်းၺွင်ႇ ၸိူဝ်းၼႆႉ ။ တီႈၵျွင်းမုၼ်ၸဝ်ႈ ၵုၼ်ၵွၵ်ႇၵေႃႈ မီးသိုၵ်းမၢၼ်ႈ ယူႇဝႆႉ ။ သိုၵ်းၶၢင်တႄႉ ၶဝ်ငိူင်ႉဢွၵ်ႇဝႆႉ ၼွၵ်ႈ ဝၢၼ်ႈသေတႃႉ ပႆႇထွႆတႄႉတႄႉ ပၢင်တိုၵ်းတႄႉ တေလႅပ်ႈပဵၼ်ႁႅင်းထႅင်ႈယူႇ တင်းသွင်ၾၢႆႇ ၵေႃႈ တိုၵ်ႉထႅမ်ႁႅင်းသိုၵ်း ၼင်ႇၵၼ်။ ၵူၼ်းပၢႆႈၽေးသိုၵ်းတႄႉ ပႆႇပွၵ်ႈ ၊ တိုၵ်ႉမီးမိူၼ်ၵဝ်ႇၵူၺ်း” – ဝႃႈၼႆ။

ယၢမ်းလဵဝ် မူႇဝၢၼ်ႈ ဢၼ်လႆႈပၢႆႈၽေးတင်းဝၢၼ်ႈသေ ၵိုတ်းဝႆႉ ၵူၼ်းပႂ်ႉႁိူၼ်း 1 ႁိူၼ်းလႂ် 1 ၵေႃႉ ၼၼ်ႉသမ်ႉ ပဵၼ်ဝၢၼ်ႈၼွင်မွင်း၊ ဝၢၼ်ႈတၢင်ႉၶၢၼ်လႄႈ ဝၢၼ်ႈၽၢႆၶမ်း ၸိူဝ်းၼႆႉ။