ၽူႈလၵ်ႉၸၵ်ႉၶုတ်ႈလိူင်ႇၼမ် ၶဝ်ႈၵျွင်းမုၼ်ၸဝ်ႈၼွင်ၸၢင်ႉ တီႈထုင်ႉပူင်း ယွၼ်းထႅမ်ႁႅင်းၾူၼ်းသေ လၵ်ႉဢဝ်ၾူၼ်းမုၼ်ၸဝ်ႈ ၸဝ်ႈသၢင်ႇၵႂႃႇ 6 လုၵ်ႈ ။
ဝၼ်းတီႈ 4/10/2023 ၵူၼ်းၸၢႆးပႅၵ်ႇၼႃႈပႅၵ်ႇတႃၵေႃႉၼိုင်ႈ ၶီႇရူတ်ႉၶိူင်ႈ ၶဝ်ႈဝၢင်းၵျွင်းမုၼ်ၸဝ်ႈဝၢၼ်ႈၼွင်ၸၢင်ႉ၊ ၽွင်းသင်ၶႃၸဝ်ႈၵႂႃႇသုင်းသွမ်းၼၼ်ႉ မၼ်းၸၢႆးဢဝ်ပႃးၾူၼ်းတီႈၵျွင်းမုၼ်ၸဝ်ႈသေဢွၵ်ႇမိူဝ်းၵႂႃႇ ဝႃႈၼႆ။
တၵ်ႉၵႃႇသတ်ႉထႃး ၵူၼ်းဝၢၼ်ႈၼွင်ၸၢင်ႉ ၼၢင်းယိင်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ မၼ်းၶဝ်ႈမႃးၼႂ်းၵျွင်းသေ ထၢမ်ႁႃထၢင်ၶီႈ၊ သမ်ႉလၢတ်ႈဝႃႈၶႂ်ႈထႅမ်ႁႅင်းၾူၼ်းၼႆ ၸဝ်ႈသၢင်ႇပေႃးၼိုင်ႈၵႂႃႇဢဝ်သၢႆထႅမ်ႁႅင်းၾူၼ်းမႃးပၼ်မၼ်းထႅမ်။ ၽွင်းၼၼ်ႉပဵၼ်ၶၢဝ်းသုင်းသွမ်းလႄႈ သင်ႇၶႃႇၸဝ်ႈၶဝ် ၵႂႃႇသုင်းသွမ်းမူတ်း။ မၼ်းၵေႃႈၸင်ႇဝႃႈ ဢဝ်ၾူၼ်းၼိူဝ်ၵျွင်းၼၼ်ႉၵႂႃႇမူတ်း ”- ဝႃႈၼႆ။
တီႈဢၼ်ထႅမ်ႁႅင်းၾူၼ်းၼၼ်ႉ ၸဝ်ႈသၢင်ႇလႄႈသင်ႇၶႃႇၸဝ်ႈၶဝ်ထႅမ်ႁႅင်းဝႆႉ ၾူၼ်း 6 လုၵ်ႈ။ ၵူၼ်းၸၢႆးၵေႃႉၼၼ်ႉ ၸင်ႇပူတ်းဢဝ်ၵႂႃႇပႃးမူတ်းဝႃႈၼႆ။
ၵူၼ်းၸၢႆးၵေႃႉၼၼ်ႉ ပဵၼ်ၽႂ်လုၵ်ႉလႂ်မႃးၵေႃႈဢမ်ႇႁူႉ။ ဢမ်ႇယၢမ်ႈႁၼ်ၼႃႈတႃ ၸဝ်ႈသၢင်ႇဢွၼ်ၵၼ်လၢတ်ႈၼင်ႇၼႆ။
ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ ၵူၼ်းပႅၵ်ႇၼႃႈပႅၵ်ႇတႃ ၶဝ်ႈဢွၵ်ႇတီႈထုင်ႉပူင်းၵူႈဝၼ်း။ ပဵၼ်ၽႂ်လုၵ်ႉလႂ်မႃးၵေႃႈဢမ်ႇႁူႉ။ ၶူဝ်းၶွင်ၵူၼ်းမိူင်းၵေႃႈ ႁၢႆၵူႈဝၼ်း- ၵူၼ်းထုင်ႉပူင်းလၢတ်ႈၼင်ႇၼႆ။
ဢမ်ႇဝႃႈၶၢဝ်းၼမ်ႉႁႅင်ႈၵူၺ်း ၽွင်းၶၢဝ်းၼမ်ႉသုင်ၵေႃႈ ၽူႈလၵ်ႉယင်းၶဝ်ႈလၵ်ႉၶူဝ်းၶွင်။
ဝၼ်းတီႈ 7-8-9 ၼႆႉသမ်ႉ ပီႈၼွင်ႉၵူၼ်းမိူင်းထုင်ႉပူင်း တေႁူမ်ႈၵၼ်ၸတ်းပၢင်ၶေႉၶဵင်ႇႁိူဝ်း။ ယၢမ်းလဵဝ်ၶႅၵ်ႇတီႈၸမ်တီႈၵႆ သမ်ႉပေႃးလင်ႇလႆႁွတ်ႈထိုင်ထုင်ႉပူင်းဝႆႉယူႇၽွင်ႈယဝ်ႉလႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ