သိုၵ်းတဢၢင်း TNLA ၵဵပ်းသိုၵ်းမႂ်ႇ ၼႂ်းဝၢၼ်ႈၵွင်းသႃႇဢိူင်ႇသၢႆးၶၢဝ် ၼႂ်းၸႄႈဝဵင်းၼမ်ႉတူႈ လုၵ်ႈဢမ်ႇယူႇဢဝ်ပေႃႈ ၽူဝ်ဢမ်ႇယူႇဢဝ်မေးၵႂႃႇဝႃႈၼႆ ။
သိုၵ်းတဢၢင်း ၶဝ်ႈၵဵပ်းသိုၵ်း ၼႂ်းဝၼ်းတီႈ 19 လႄႈဝၼ်းတီႈ 23 လိူၼ်သႅပ်ႉထႅမ်ႇပိူဝ်ႇၼႆႉ။ ပေႃးလုၵ်ႈၸၢႆးဢမ်ႇယူႇႁိူၼ်း ဢဝ်ၵူၼ်းႁိူၼ်းၵႂႃႇတႅၼ်းလႄႈ ၵူၼ်းဝၢၼ်ႈဢွၼ်ၵၼ်ပၢႆႈၽွင်ႈယဝ်ႉဝႃႈၼႆ ။
ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ -“ပေႃးဝႃႈလုၵ်ႈၸၢႆး ဢမ်ႇယူႇႁိူၼ်းၼႆ လၢၵ်ႈဢဝ်ပေႃႈပိူၼ်ႈၵႂႃႇ ဢမ်ႇၼၼ် ဢဝ်ၼွင်ႉယိင်းပိူၼ်ႈၵႂႃႇ ၸိူင်ႉၼႆၵေႃႈမီး ။ ၵွပ်ႈၼႆ ၵူၼ်းဝၢၼ်ႈပၢႆႈဢွၵ်ႇဝၢၼ်ႈၽွင်ႈယဝ်ႉ ” ဝႃႈၼႆ။
ဝၼ်းတီႈ 23/09/2023 သိုၵ်း TNLA ၶဝ်ႈဝၢၼ်ႈၵွင်းသႃႇ မႃးႁိူၼ်းၼၢင်းဢေးမူၼ်းၶဝ်သေ ထၢမ်ႁႃၸဝ်ႈၽူဝ်မၼ်းၼၢင်း။ ၵေႃႉပဵၼ်ၽူဝ်ဢမ်ႇယူႇႁိူၼ်းလႄႈ ၸုမ်းသိုၵ်းဢဝ်တူဝ်ၼၢင်းဢေးမူၼ်းၵႂႃႇတႅၼ်း။
မိူဝ်ႈဝၼ်းတီႈ 19/09/2023 ၼၼ်ႉၵေႃႈ သိုၵ်း TNLA ၶဝ်ႈၵဵပ်းၵူၼ်းသိုၵ်းမႂ်ႇၼႂ်းဝၢၼ်ႈ ၵွင်းသႃႇၼၼ်ႉ ၼင်ႇၵဝ်ႇ။ သိုၵ်း TNLA မွၵ်ႈ 10 ၵေႃႉ တီႉၺွပ်းဢဝ်လုင်းယီႈ ဢႃယု 50 ပီ ၼၼ်ႉၵႂႃႇ။
ၽူႈၸၢႆး ၸၢဝ်းတဢၢင်း ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ႁၼ်ၽႂ်ၵေႃႈဢဝ်ၵႂႃႇတႅၼ်းသေ ႁႂ်ႈဢဝ်ၽူႈၸၢႆးမႃးလႅၵ်ႈၶိုၼ်းႁဵတ်းၼၼ်ႉတိၵ်းတိၵ်းလႄႈ ပိူၼ်ႈၵေႃႈဢွၼ်ၵၼ်ပၢႆႈၼမ်ၼႃႇယဝ်ႉ။ ပေႃးပၢႆႈသမ်ႉလႆႈဢဝ်လုၵ်ႈလၢင်းၵေႃႉလဵၵ်ႉ ၸိူဝ်းယူႇႁူင်းႁဵၼ်း ၼၼ်ႉၵႂႃႇပႃးၸွမ်းလႄႈ လုၵ်ႈဢွၼ်ႇၵေႃႈဢမ်ႇလႆႈႁဵၼ်းလိၵ်ႈလၢႆး။ ၶူဝ်းႁႆႈၶူဝ်းသူၼ် ထူဝ်ႇ၊ ၶဝ်ႈၵၢပ်ႇ ၶဝ်ႈႁႆႈၵေႃႈလႆႈပႅတ်ႈသေၵႂႃႇ”- ဝႃႈၼႆ။
ဝၢၼ်ႈၵွင်းသႃႇ ဢိူင်ႇသၢႆးၶၢဝ်ၼႆႉ ပဵၼ်ၸၢဝ်းတႆးလႄႈ ၸၢဝ်းတဢၢင်းယူႇႁူမ်ႈၵၼ်။ လင်ႁိူၼ်းတေမီးမွၵ်ႈ 50 ။ ႁူဝ်ၵူၼ်းမီး 222 ၵေႃႉပဵၼ်ၽူႈၸၢႆး 99 လႄႈ ၽူႈယိင်း 123 ၵေႃႉ။
ၵဵဝ်ႇၵပ်းလွင်ႈၼႆႉ ၽူႈတွႆႇႁွၵ်ႈလႆႈၵပ်းသိုပ်ႇတွင်ႈထၢမ် ၽူႈၶၢၼ်ပၢၵ်ႇ တပ်ႉသိုၵ်း TNLA ၸဝ်ႈသိုၵ်းတႃႉဢၢႆႈၵျေႃႇလၢတ်ႈဝႃႈ – ၼႂ်းမူႇပိူင်တပ်ႉသိုၵ်းတဢၢင်းတိုၼ်းမီးဝႆႉဝႃႈ ၽူႈၸၢႆးဢၼ်မီး ဢႃယု 18 ၶိုၼ်ႈၼိူဝ် တေလႆႈႁၢပ်ႇၵၢၼ်ၸိူဝ်ႉၸၢတ်ႈ ၼႆဝႆႉလႄႈ ၸင်ႇလႆႈၵဵပ်းဝႃႈၼႆ။
“မူႇပိူင်တပ်ႉသိုၵ်းတဢၢင်းမီးဝႆႉဝႃႈ ႁိူၼ်းတဢၢင်း ဢၼ်မီးလုၵ်ႈၸၢႆး 2 ၵေႃႉၼၼ်ႉ တေလႆႈပၼ်လုၵ်ႈၸၢႆးဢၼ်ဢႃယုတဵမ် 18 ပီၵေႃႉၼိုင်ႈ။ ဢၼ်ပဵၼ်ၽူႈယိင်း လုၵ်ႈယိင်းတႄႉႁဝ်းဢမ်ႇဢဝ်။ ပေႃးၶဝ်မီးၵၢင်ၸႂ်ၶႂ်ႈႁဵတ်းသိုၵ်းႁင်းၵူၺ်းတႄႉ ႁဝ်းၶႃႈႁပ်ႉၾိုၵ်းၵၢၼ်ပၼ်ယူႇ။ ပၼ်ႁႃတီႉၺွပ်းၵူၼ်းႁိူၼ်းတၢင်ႇၵေႃႉသေၸင်ႇႁႂ်ႈဢဝ်လုၵ်ႈၸၢႆးမႃးလႅၵ်ႈ ၼႆ ဢၼ်ပဵၼ်ၵႂႃႇတီႈၼမ်ႉတူႈၼၼ်ႉတႄႉ ႁဝ်းၶႃႈဢမ်ႇလႆႈငိၼ်းၸွမ်း” – တႃးဢၢႆႈၵျေႃႇ လၢတ်ႈၼင်ႇၼႆ။
ၼႂ်းးၸိုင်ႈတႆးပွတ်းႁွင်ႇၼႆႉ သိုၵ်းမၢၼ်ႈလႄႈ သိုၵ်းတဢၢင်း ၶဵင်ႈၶႅင်ၵၢၼ်သိုၵ်း၊ ပိုတ်းယိုဝ်းတိုၵ်းတေႃးၵၼ်မႃး လႆႈ 2 လိူၼ်ၼႆႉယဝ်ႉ ။ တၢင်းၸႄႈလၢၼ်ႉ ၸႄႈဝဵင်းမူႇၸေႊ ၊ တၢင်းၵူတ်ႉၶၢႆ ၸိူဝ်းၼႆႉပၢင်တိုၵ်း တိုၵ်ႉပဵၼ်တေႃႇထိုင်ဝၼ်းမိူဝ်ႈၼႆႉ ယင်းပႆႇယဝ်ႉတူဝ်ႈ။ လိူဝ်ၼၼ်ႉ ၼႂ်းဝူင်ႈဝၢင်ႈၼႆႉ မီးၶၢဝ်ႇဝႃႈ သိုၵ်းတဢၢင်း ပိုတ်းယိုဝ်းတိုၵ်းတေႃးၵၼ်တင်း လုၵ်ႈၸုမ်းဢူၺ်းလီၼင်ႇၵၼ်ဢၼ်ပဵၼ် SSPP/SSA ၼၼ်ႉယူႇ။
