ဢမ်ႇမီးပၢင်တိုၵ်းသင်ၵေႃႈ သိုၵ်းမၢၼ်ႈတိုၵ်ႉၶဝ်ႈဢဝ်တီႈယူႇလႄႈ ႁၢင်ႈၵၢင်မၢၵ်ႇၸွမ်းဝၢၼ်ႈၸွမ်းသူၼ် ၵူၼ်းမိူင်းပၢႆးပႆႇၸၢင်ႈပွၵ်ႈၶိုၼ်းႁိူၼ်း။

ပၢင်တိုၵ်းတဵတ်ႇယဵၼ်ၵႂႃႇ ၶၢဝ်းတၢင်း 4 လိူၼ်ယဝ်ႉသေတႃႉ သိုၵ်းမၢၼ်ႈယိုတ်းမိူင်းတိုၵ်ႉ ၶဝ်ႈဢဝ်တီယူႇၼႂ်းပွၵ်ႉၼႂ်းဝၢၼ်ႈသေဢမ်ႇၵႃး ပၢႆႁၢင်ႈၵၢင်မၢၵ်ႇဝႆႉထႅင်ႈလႄႈ ၵူၼ်းပၢႆႈၽေးသိုၵ်းမိူင်းပၢႆး ဢမ်ႇထၢင်ႇႁၢင်ႈပွၵ်ႈၶိုၼ်းႁိူၼ်းယေး။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းၸၵၸၶဝ်ၼႆႉ တေႃႇထိုင်မိူဝ်ႈလဵဝ် တိုၵ်ႉယူႇၸွမ်းဝၢၼ်ႈၸွမ်းသူၼ်။ ၼင်ႇႁိုဝ်ၵူၼ်းမိူင်းတေဢမ်ႇၸၢင်ႈၶဝ်ႈမိူဝ်းယူႇႁိူၼ်းၶိုၼ်းၼၼ်ႉၵေႃႈ ၶဝ်ႁၢင်ႈမၢၵ်ႇဝႆႉထႅင်ႈ။ၶဝ်ႈဝႃႈတႄႉ ႁၢင်ႈမၢၵ်ႇႁေႉၸုမ်းလုၵ်ႉၽိုၼ်ႉ ၵူၺ်းၼႃႇ ႁဝ်းၵူၼ်းမိူင်းၼႆႉဢေႃႈလႆႈယၢပ်ႇ။ၾၢႆႇတူၵ်းမိူင်းၾၢႆၶုၼ်ၼၼ်ႉၵေႃႈ မီးပၢင်သဝ်းၵဝ်ႇၶဝ်ဝႆႉ ၼၼ်ႉၵေႃႈ ၶဝ်ႁၢင်ႈၵၢင်မၢၵ်ႇသေ ဢွၵ်ႇၵႂႃႇတၢင်ႇတီႈယဝ်ႉ ” – ဝႃႈၼႆ။

တႄႇဢဝ် လိူၼ်ၵျူၼ်ႊ ထိုင်မိူဝ်ႈလဵဝ် ပၢင်တိုၵ်းယဵၼ်ဝႆႉ ၶၢဝ်းတၢင်း 4 လိူၼ်ဝႃႈၼႆသေတႃႉ ၾၢႆႇသိုၵ်းမၢၼ်ႈတင်ႈၸႂ်ယိုဝ်းၵွင်ႈလူင်ၵွင်ႈဢွၼ်ႇ လွၵ်ႇငိုတ်ႈႁႂ်ႈၵူၼ်းမိူင်းၵူဝ်ႁႄ။

ၽူႈၶဝ်ႈၸုမ်းၸွႆႈၵူၼ်းပၢႆႈၽေးသိုၵ်းလၢတ်ႈတီႈၽူႈတွႆႇႁွၵ်ႈဝႃႈ – “ ဢမ်ႇမီးပၢင်တိုၵ်းၵေႃႈ ၶဝ်ယိုဝ်းလွၵ်ႇယူႇႁဵတ်းၼၼ်ယဝ်ႉ။တေႃႈၼင်ႇ ႁူင်းယႃႈလူင် သွင်းၽူၺ်း( ဆောင်းဖွေးဆေးရုံ) တီႈၾၢႆၶုၼ်ၼၼ်ႉ ဢၢင်ႈပိုတ်ႇၶိုၼ်းၼႆ ပႆႇၸၢင်ႈႁဵတ်းႁိုဝ်။မၢၵ်ႇလူင်မႃးတူၵ်းသႂ်ႇ ၼႂ်းသူၼ်ၶဝ်ႈၵၢပ်ႇၵူၼ်းဝၢၼ်ႈလႄႈ ၼၢင်းယိင်းၵေႃႉၼိုင်ႈ တိူဝ်ႉၸၢၵ်ႇမၢၵ်ႇ လိူဝ်ၸႂ်ဝႆႉၵေႃႉၼိုင်ႈဢေႃႈ ” – ဝႃႈၼႆ။

လႅၼ်လိၼ်တႆး – ယၢင်းလႅင်ၼႆႉ ၸုမ်းသိုၵ်းလုၵ်ႉၽိုၼ်ႉၵေႃႈ တိုၵ်ႉၶဵင်ႈၶႅင် ၾၢႆႇသိုၵ်းမၢၼ်ႈၵေႃႈ တိုၵ်ႉထႅမ်ႁႅင်းသိုၵ်းထႅင်ႈလႄႈ ဢမ်ႇလိူၵ်ႈၶိင်ႇၶၢဝ်း ၸၢင်ႈၶိုၼ်းပဵၼ်ပၢင်တိုၵ်း ၼႆယဝ်ႉ။