မိူဝ်ႈၼႆႉ ဝၼ်းတီႈ 5/9/2023 ယူႇတီႈ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး (SHRF) ဢွၵ်ႇၽိုၼ်တၢမ်းငဝ်းလၢႆး သၢၼ်ၶတ်း လွင်ႈသိုၵ်းမၢၼ်ႈ ဢဝ်ၶိူင်ႈမိၼ်တိုၵ်း ၵွင်ႈလူင် လၢမ်းလိမ်းယိုဝ်းၵႂႃႇၵူႈႁူးၵူႈတၢင်း ၼႂ်းၸႄႈဝဵင်းၵူတ်ႉၶၢႆ – မူႇၸေႊ ၸိုင်ႈတႆး ပွတ်းႁွင်ႇသေ တိူဝ်ႉၺႃးၵူၼ်းဝၢၼ်ႈ 3 ၵေႃႉ ပႃးတင်းဢွၼ်ႇယိင်းသၢဝ် ဢႃယု 15 ပီ ၵေႃႉၼိုင်ႈ လူႉတၢႆလႄႈ ၵူၼ်းဝၢၼ်ႈ 7 ၵေႃႉ လႆႈတိူဝ်ႉမၢတ်ႇၸဵပ်းၸွမ်း။

ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး လၢတ်ႈတီႈၽူႈတွႆႇႁွၵ်ႈဝႃႈ – “ ပၢင်တိုၵ်းၼႆႉ မၼ်းတုမ်ႉတိူဝ်ႉၵူၼ်းဝၢၼ်ႈ ၵူၼ်းမိူင်းၸိူဝ်းဢၼ် ယူႇၼႂ်းပိုၼ်ႉတီႈတႄႉတႄႉ။ ဢၼ်ပူၼ်ႉပႅၼ်ႁႅင်းၼႃႇတႄႉ ပဵၼ်လွင်ႈဢၼ်ဢဝ် ၶိူင်ႈမိၼ်တိုၵ်း ပွႆႇမၢၵ်ႇလူင်ယိုဝ်းၵႂႃႇၵႃႈဝႃႈၵႃႈ ပဵၼ်ၼၼ်ႉသေ ၵႂႃႇတိူဝ်ႉၺႃး ႁိူၼ်းယေးၵူၼ်းဝၢၼ်ႈ ၶူဝ်းၶွင်ၵူၼ်းဝၢၼ်ႈ လႆႈလူႉသုမ်းၸွမ်းၼၼ်ႉယဝ်ႉ။ ဢမ်ႇမီးၸုမ်းလႂ် ႁပ်ႉ ဢဝ်ပုၼ်ႈၽွၼ်း တေသၢႆႈတႅၼ်းၶိုၼ်းၼၼ်ႉဢေႃႈ။ ၵွပ်ႈၼႆလႄႈ ႁဝ်းၶႃႈ ၸင်ႇဢွၵ်ႇလိၵ်ႈသၢၼ်ၶတ်းတေႃႇၶဝ်ဢေႃႈ”- ဝႃႈၼႆ။

ၽွင်းသိုၵ်းမၢၼ်ႈ ပဵၼ်ပၢင်တိုၵ်းၵၼ်တင်း သိုၵ်းတဢၢင်း TNLA လႄႈသိုၵ်းၶၢင် KIA  တင်ႈတႄႇဝၼ်းတီႈ 27/8/2023 ထိုင်ဝၼ်းတီႈ 1/9/2023 ၼႂ်းၸႄႈဝဵင်းၵူတ်ႉၶၢႆတင်းၸႄႈဝဵင်းမူႇၸႄႈ ၸိုင်ႈတႆးပွတ်းႁွင်ႇၼၼ်ႉ ၵူၼ်းဝၢၼ်ႈသၢမ်ၵေႃႉပႃး တင်း ဢွၼ်ႇယိင်းသၢဝ် ဢႃယု 15 ၵေႃႉၼိုင်ႈၺႃးၸၢၵ်ႇမၢၵ်ႇသေလႆႈလူႉတၢႆ၊ ၵူၼ်းဝၢၼ်ႈၸဵတ်းၵေႃႉ မၢတ်ႇၸဵပ်း၊ ဝတ်ႉၽြႃး ၶရိယၼ်ႇ၊ ဝတ်ႉဝႃး မုၼ်ၸဝ်ႈ ၸၢဝ်းပုတ်ႉလႄႈႁူင်းႁဵၼ်း ၸၼ်ႉဢွၼ် ၺႃးၸၢၵ်ႇမၢၵ်ႇလူႉၵွႆပႃး ၼႂ်းၽိုၼ်တၢမ်းငဝ်းလၢႆး SHRF ဢွၵ်ႇဝႆႉၼင်ႇၼႆ။

“ထႅင်ႈၾၢႆႇၼိုင်ႈၵေႃႈ ႁဝ်းၶႃႈ လဵပ်ႈႁဵၼ်းတူၺ်း တၢင်းၾၢႆႇမူႇၸေႊ – ၸေႊလၢၼ်ႉၼႆႉ မၼ်းမီးၽႅၼ်ၵၢၼ် ဢွင်ႈတီႈ တႃႇတေ ႁဵတ်းပၢႆးမၢၵ်ႈမီးၶႄႇ – မၢၼ်ႈၼႆႉ ဢၼ်ၼိုင်ႈ။ ထႅင်ႈဢၼ်ၼိုင်ႈၵေႃႈ ပဵၼ်ၽႅၼ်ၵၢၼ်သဵၼ်ႈတၢင်းရူတ်ႉၾႆး တင်းဝႆးတေမႃး သဵၼ်ႈတၢင်းၼႆႉလႄႈ ၵွပ်ႈၼႆ မၼ်းမိူၼ်ၸိူင်ႉၼင်ႇၶဝ် ႁိမ်ၵၼ်ဢဝ်တီႈယူႇဝႆႉ ၸိူင်ႉၼၼ်ၵေႃႈ ပဵၼ်လႆႈ”- ၸၢႆးႁေႃသႅင် သိုပ်ႇ လၢတ်ႈၼႄၼင်ႇၼႆ။

ပၢင်တိုၵ်း တီႈဢိူင်ႇၸေႊလၢၼ်ႉ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇၼႆႉ ႁဵတ်းႁႂ်ႈၵူၼ်းပိုၼ်ႉတီႈ ပၢႆႈၽေးသိုၵ်း မွၵ်ႈ 2,000 ၵေႃႉ ပၢႆႈမူၵ်းသွၼ်ႈၸွမ်း ႁိူၼ်းပီႈၼွင်ႉၽႂ်မၼ်း ဝတ်ႉၵျွင်းမုၼ်ၸဝ်ႈ ၼႂ်းၸႄႈဝဵင်းမူႇၸေႊ ၸိူဝ်းၼႆႉ။

ယၢမ်းလဵဝ် သိုၵ်းမၢၼ်ႈ သၢမ်တပ်ႉၵွင်ၸိူဝ်းပဵၼ် ၶမယ 421၊ 422 လႄႈ 577 ၸိူဝ်းၼႆႉတူင်ႉၼိုင်ၵၢၼ် သိုၵ်းယူႇၼႂ်းပိုၼ်ႉတီႈ ၸွမ်းတပ်ႉၵွင်ဢၼ် ယူႇပႃႈတႂ်ႈတပ်ႉၸုမ်းလူင် 99 ၵုမ်းၵမ် ၼႂ်းၸႄႈဝဵင်းမူႇၸေႈလႄႈၵူတ်ႉၶၢႆယူႇ ၸိုင်ႈတႆး ပွတ်းႁွင်ႇ။