ၼၢင်းယိင်းၵူၼ်းမိူင်းသၢတ်ႇၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ ႁိမ်ရူတ်ႉၶိူင်ႈလႄႈၾူၼ်း ၽွင်းၵႂႃႇၵၢတ်ႇ။

 ဝၼ်းတီႈ 28/8/2023 ယၢမ်းၼႂ်ၸဝ်ႉ 4 မူင်း ၼၢင်းယိင်းၵူၼ်းမိူင်းသၢတ်ႇၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ ပႂ်ႉႁိမ်ဢဝ်ရူတ်ႉၶိူင်ႈၸွမ်းတၢင်း တီႈႁိမ်းၶူင်ႇႁိူဝ်းမိၼ် ၽွင်းမၼ်းၼၢင်းၵႂႃႇၵၢတ်ႇ ။

ၼၢင်းယိင်းဢၼ်ၺႃးၸူၼ်ၼႆႉ လၢတ်ႈတီႈၽူႈတွႆႇႁွၵ်ႈဝႃႈ – “ ၵူႈပွၵ်ႈတႄႉ ၵႂႃႇၵၢတ်ႇၸွမ်းၵၼ်လၢႆၵေႃႉလႄႈ ဢမ်ႇတွၼ်ႉၺႃး။ မိူဝ်ႈၵွၼ်ႇ လႆႈငိၼ်းၶၢဝ်ႇယူႇ ဝႃႈတၢင်းၼႆႉမီး ၵူၼ်းလၵ်ႉၵူၼ်းၸူၼ်လိူင်ႇ ။    ၼႂ်ၼၼ်ႉ ႁိပ်ႈၵႂႃႇၵၢတ်ႇၵေႃႉလဵဝ် တႃႇၶၢႆ ၽၵ်းၵၢတ်ႇၽၵ်းၵီး ။  မီးၵူၼ်းသွင်ၵေႃႉ ၶီႇရူတ်ႉၶိူင်ႈသွၼ်ႉၵၼ်လမ်းမႃးၸွမ်း။ ဢွၼ်တၢင်း ထၢင်ႇဝႃႈ ပဵၼ်ၵူၼ်းၵႂႃႇၵၢတ်ႇၼင်ႇၵၼ်ၼႆလႄႈ ၶႃႈၵေႃႈ ဢမ်ႇတၼ်းၾၢင်ႉ ။ ႁဵတ်းၼၼ်သေ ၶဝ်ဢဝ်ရူတ်ႉၶိူင်ႈ မႃးလေႃႇပၼ်ၶႃႈ လူမ်ႉႁေ။ၶႃႈၵေႃႈ ပဵၼ်ၼၢင်းယိင်းၵေႃႉလဵဝ်ၵူၺ်း ၵူဝ်ၼႃႇလႄႈ လႅၼ်ပၢႆႈပေႃးဢမ်ႇတၼ်းတူၺ်းၼႃႈၶဝ်ၶႃႈဢေႃႈ။ၽိူဝ်ႇဝၢႆႇတူၺ်း ၶဝ်ပေႃးဢဝ်ရူတ်ႉၶိူင်ႈၶႃႈ လႅၼ်ပႅတ်ႈယဝ်ႉ  ” – ဝႃႈၼႆ။

ၼၢင်းယိင်းဢၼ်ၺႃးၸူၼ်ႁိမ်ရူတ်ႉၶိူင်ႈၵႂႃႇၼႆႉ ၸိုဝ်ႈၼၢင်းသူၺ်ႇၸိင်ႇ ယူႇပွၵ်ႉႁူဝ်ၼႃး ၸေႊဝဵင်းမိူင်းသၢတ်ႇ လိူဝ်သေ သုမ်းရူတ်ႉၶိူင်ႈယဝ်ႉ ၾူၼ်းၵပ်းတူဝ်မၼ်းၼၢင်းၵေႃႈ ပႃးၵႂႃႇၸွမ်းၼႆယဝ်ႉ။

ၼၢင်းယိင်းဢၼ်ၺႃးၸူၼ်ၼႆႉ သိုပ်ႇလၢတ်ႈတီႈၽူႈတွႆႇႁွၵ်ႈဝႃႈ – “ ၾူၼ်းၶႃႈဢၼ်တူၵ်းၵႂႃႇတီႈၼၼ်ႈၵေႃႈ လႅပ်ႈၶဝ်တေဢဝ်ၵႂႃႇၵူၺ်းဢေႃႈ။ၵူၺ်ၽၵ်းၵၢတ်ႇၽၵ်းၵီးဢၼ်ၶႃႈ တၢင်ႇၸွမ်းတၢင်းလင်ရူတ်ႉၶိူင်ႈၼၼ်ႉၵေႃႈ ၶဝ်ဢဝ်မိူဝ်းပွႆႇပႅတ်ႈဝႆႉ တီႈပွၵ်ႉဝဵင်းၵွင်းၼၼ်ႉၼႆဢေႃႈ ” – ဝႃႈၼႆ။

ၼႂ်းၸႄႈဝဵင်းမိူင်းသၢတ်ႇၼႆႉ ၵူၼ်းသူႇသမ်းၵိၼ်ယႃႈၵေႃႈလိူင်ႇၼမ် ၽူႈလၵ်ႉၸၵ်ႉၶုတ်ႈၵေႃႈ မီးၵူႈဝၼ်း ႁိူၼ်းယေးၵူၼ်းဝၢၼ်ႈၵူၼ်းမိူင်းၵေႃႈ ပေႃးဢမ်ႇမီးၽႂ်ပႂ်ႉဝႆႉ တႃႇဢွၵ်ႇၼွၵ်ႈႁိူၼ်းယေး ပဵၼ်ယၢပ်ႇဝႆႉ။ပေႃးပဵၼ်ၼၢင်းယိင်း တႃႇတေၵႂႃႇတႃႈပႆတၢင်း ၽွင်းၶၢဝ်းၶမ်ႈၶိုၼ်းၵေႃႈ ဢမ်ႇမီးလွင်ႈႁူမ်ႇလူမ်ႈ။ႁႂ်ႈမေႃ ၾၢင်ႉၵိၼ်ၾၢင်ႉယူႇၵၼ် ၵူၺ်းယဝ်ႉ ၼႆ ၵူၼ်းပိုၼ်ႉတီႈ လၢတ်ႈၼႄၼင်ႇၼႆ။

ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃးၼႆႉ ၵူၼ်းသူႇသမ်းၵိၼ်ယႃႈ လိူင်ႇၽႄႈမႃး ၵူႈဝၢၼ်ႈၵူႈဝဵင်း မိူၼ်ၼင်ႇ ၼႂ်းၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၼႆႉၵေႃႈ ၵူၼ်းသူႇသမ်းၵိၼ်ယႃႈ ၵႂႃႇမႃးတူင်ႉၼိုင် ဢမ်ႇယွမ်း 10 မၢင်ၸိူဝ်း ၶဝ်ႈယူႇထင်သဝ်းၸွမ်းဝတ်ႉဝႃးၽႃသိူဝ်ႇ ။