ၵႃးလမ်းလုၵ်ႉမိူင်းမၢၼ်ႈတူင်ႈပဵင်းဝဵင်းလိူဝ်ႇမၼ်းတလေးၶိုၼ်ႈမႃးမိူင်းတႆး မႃးပိၼ်ႈတူၵ်းႁူၺ်ႈလိုၵ်ႉတီႈဝဵင်းၵျွၵ်ႉမႄး  ၊ တၢင်ႇၵူၼ်းမႃး 6 ၵေႃႉ မၢတ်ႇၸဵပ်းဢိတ်းဢွတ်းၵူၺ်း ဢမ်ႇမီးလွင်ႈလူႉတၢႆ။

မိူဝ်ႈဝႃး ဝၼ်းတီႈ 27/8/2023 ယၢမ်းဝၢႆးဝၼ်း 3 မူင်းၼၼ်ႉ ၵႃးလမ်းၼၼ်ႉ မႃးပိၼ်ႈတူၵ်းႁူၺ်ႈ တီႈတၢင်းလူင်း ႁူၺ်ႈၵိုတ်ႈ ၾၢႆႇၸႄႈဝဵင်းၵျွၵ်ႉမႄး ။

ၸုမ်းၸွႆႈတူင်ႇၵူၼ်း(ကမ်းလင့်လက်များ လူမူကူညီရေးအသင်း) လၢတ်ႈတီႈၽူႈတွႆႇႁွၵ်ႈဝႃႈ – “ ၽေးၵိုင်ႉၵၢင်ႉပွၵ်ႈၼႆႉ လႆႈဝႃႈလီဢၢမ်းၼႃႇ တူၵ်းလူင်းတၢင်းလိုၵ်ႉမၼ်း မီးမွၵ်ႈ 70 ထတ်း။  ၵူၺ်းၼႃႇဢမ်ႇပဵၼ်သင်တေႉတေႉ ဝႃႈဝႃႈသေၵေႃႉ။ လုၵ်ႈဢွၼ်ႇၸၢႆးၵေႃႉၼိုင်ႈတႄႉ ဝူတူၵ်းၵႂႃႇ ၶၢင်ႉဝႆႉ ၼိူဝ်ယုမ်းၼၼ်ႉ။   မႄႈပႃႈၵေႃႉၼိုင်ႈၵေႃႈ မိူၼ်ၼၼ်။ ၵၢမ်ႇလီ ၵူၼ်းၼႆႉ ၵႂႃႇတူၵ်းမႅၼ်ႈၼိူဝ်ယုမ်းၵမ်ႈၼမ် ” – ဝႃႈၼႆ။

ၼႂ်းၵႃးဢၼ်မႃးပိၼ်ႈတူၵ်းႁူၺ်ႈၼၼ်ႉ  မီးၵူၼ်းၶီႇမႃးၸွမ်း 6 ၵေႃႉ၊ ပဵၼ်ၸၢႆး 4 ၵေႃႈ ယိင်း 2 ၵေႃႉ ။  ၼႂ်းၼၼ်ႉ ပႃး လုၵ်ႈဢွၼ်ႇၸၢႆး 3 ၶူပ်ႇၵေႃႉၼိုင်ႈ။  တင်းသဵင်ႈ ပဵၼ်ၵူၼ်း ဝဵင်းလိူဝ်ႇ သေ မႃးဢႅဝ်ႇယဵမ်ႈပီႈၼွင်ႉတီႈၸႄႈဝဵင်းသီႇပေႃႉ  လႆႈႁူႉၼင်ႇၼႆ။

ၸုမ်းၸွႆႈတူင်ႇၵူၼ်း(ကမ်းလင့်လက်များ လူမူကူညီရေးအသင်း) သိုပ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ ၼႂ်းၵႃးဢၼ်ပိၼ်ႈတူၵ်းႁူၺ်ႈၼၼ်ႉ ပႃးၵူၼ်းမႃး 6 ၵေႃႉ ၼႂ်းၼၼ်ႉ ၼၢင်းယိင်းမေးၸဝ်ႈၵႃးၼၼ်ႉ မၢတ်ႇၸဵပ်းတီႈႁူဝ်လႄႈဢႅဝ်မၼ်းဢိတ်းဢိတ်းၵွႆး ” – ဝႃႈၼႆ။

ၽေးၵိုင်ႉၵၢင်ႉပွၵ်ႈၼႆႉ ၵူၼ်းဢၼ်မၢတ်ႇၸဵပ်း ဢၼ်ထိုင်တီႈမႆႈၸႂ် ဢမ်ႇမီးလႄႈ ၸုမ်းၸွႆႈတူင်ႇၵူၼ်း ၸွႆႈသူင်ႇထိုင်ႁိူၼ်းယေးၽႂ်မၼ်းလီငၢမ်းၼႆယဝ်ႉ။

မိူဝ်ႈဝၼ်းတီႈ 18/08/2023 ၼၼ်ႉၵေႃႈ ဝၼ်းလဵဝ်ၵူၺ်း ရူတ်ႉၵႃးၽႃႇၵၼ် 3 ၵမ်း တီႈၼႂ်းၸႄႈဝဵင်းလႃႈသဵဝ်ႈ ၵူၼ်းမၢတ်ႇၸဵပ်းမီး 6 ၵေႃႉ ၊ ၸုမ်းၸွႆႈထႅမ်တူင်ႇဝူင်းၵူၼ်းတႄႉလၢတ်ႈဝႃႈပဵၼ်ယွၼ်ႉ ႁေႃႈရူတ်ႉႁေႃႈၵႃးဝႆး ဢမ်ႇၸွမ်းမၢႆမီႈႁေႃႈရူတ်ႉၵႃးၼႆယဝ်ႉ။