မိူဝ်ႈၼႆႉ ဝၼ်းတီႈ 16/8/2023 ယၢမ်းၵၢင်ၼႂ် 9 မူင်းပၢႆ သိုၵ်းမၢၼ်ႈတင်းသိုၵ်းတဢၢင်း TNLA ၶဵင်ႈၶႅင်ၵၢၼ်သိုၵ်းတေႃႇၵၼ်ထႅင်ႈ တီႈဝဵင်းၸေႊလၢၼ်ႉ ၸႄႈဝဵင်းမူႇၸေႊ ႁဵတ်းႁႂ်ႈၵူၼ်းမိူင်းမႆႈၸႂ်ၵူဝ်ႁႄ ။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းမိူင်းလႆႈၾၢင်ႉယူႇၾၢင်ႉၵိၼ် တူၵ်းၸႂ်ၵူဝ်ႁႄ။ ၵႃးၵႂႃႇမႃး ၸွမ်းတႃႈၸွမ်းတၢင်း ပေႃးလႆႈၵိုတ်းၶမ်ႈဝႆႉ ပဵၼ်ထႅဝ် ။ ႁႅင်းသိုၵ်းမၢၼ်ႈ တေမီးမွၵ်ႈ 20 -30 ထႅမ်ႁႅင်းသိုၵ်းဝႆႉယူႇတင်းဝၼ်း။ မိူၼ်ၼင်ႇ TNLA ၵေႃႈဢဵၼ်ႁႅင်း တေမီးမွၵ်ႈ 100 ။ သွင်ၾၢၵ်ႇၶဝ်ႈၸမ်ၵၼ်သမ်ႉ ပေႃးမုင်ႈႁၼ်ၵၼ်ဝႆႉယူႇယဝ်ႉ ” – ဝႃႈၼႆ။
ၸုမ်းသိုၵ်းမၢၼ်ႈ ဢဝ်တီႈယူႇဝႆႉ တၢင်းဢိူင်ႇၼွင်သႅင်သေ ၾၢႆႇၸုမ်းသိုၵ်းတဢၢင်း ဢဝ်တီႈယူႇဝႆႉ တၢင်းဢိူင်ႇၵၢႆးတူဝ်ႇ တင်းသွင်ၾၢႆႇ ၶဵင်ႇထႅမ်ႁႅင်းသိုၵ်းၵၼ်ဝႆႉ ၼႆယဝ်ႉ ။
ဢိင်ၼိူဝ်လွင်ႈၼႆႉ ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်း TNLA ၵေႃႈ ထႅမ်ႁႅင်းသိုၵ်းမႃး လၢႆပႃႈလၢႆၾၢႆႇ မိူၼ်ၼင်ႇ တီႈလွႆတေးမိူင်းၼၼ်ႉၵေႃႈ ပၵ်းသဝ်းဝႆႉဢမ်ႇၵႂႃႇတၢင်းလႂ် ယင်းပၢႆၶဝ်ႈယူႇသဝ်းတူင်ႉၼိုင်ၼႂ်းဝၢၼ်ႈလူးၵွၼ်ႇ။ သိုၵ်းမၢၼ်ႈ ၵေႃႈ ထႅမ်ႁႅင်းသိုၵ်း ယူႇတိၵ်းတိၵ်း မိူဝ်ႈလဵဝ် ငႃၵၼ်ဝႆႉယူႇတီႈၼွင်သႅင် လႄႈ ၵၢႆးတူဝ်ႇ ၶႅၼ်ႈၵၼ်တူင်ႈၼႃး ၵူၺ်း ” – ဝႃႈၼႆ။
လိူဝ်ၼၼ်ႉ ၸုမ်းသိုၵ်းမၢၼ်ႈတင်း ၸုမ်းသိုၵ်းတဢၢင်း TNLA ၶဝ်ႈဢဝ်တီႈယူႇဝႆႉၸွမ်း ၼႂ်းဝၢၼ်ႈႁၢႆး ၊ ဝၢၼ်ႈလိၼ် ၸိူဝ်းၼႆႉထႅင်ႈသေ ပိၵ်ႉဢိုတ်းသဵၼ်ႈတႃႈတၢင်း ၸိူဝ်းၵူၼ်းဝၢၼ်ႈၵႂႃႇမႃးဝႆႉ ၼႆယဝ်ႉ။
မိူဝ်ႈႁူဝ်လိူၼ်ဢေႃႊၵတ်ႉသ်ၼႆႉၵေႃႈ သိုၵ်းမၢၼ်ႈ ယူႇၾၢႆႇ 105 လၵ်းသေ ဝၢႆႇပၢၵ်ႇၵွင်ႈလူင် ယိုဝ်းသႂ်ႇ တၢင်းဝဵင်းၸေႊလၢၼ်ႉ ပွတ်းၼႂ်ၵူၺ်း ဢမ်ႇယွမ်း 10 ၵမ်း ။
ၼႂ်းႁၢင်လိူၼ်ၵျူႊလၢႆႊ ပူၼ်ႉမႃးၼႆႉၵေႃႈ သိုၵ်းမၢၼ်ႈ လႄႈ တပ်ႉသိုၵ်း ၵူၼ်းမိူင်း ပျီႇတူႉၸိတ်ႉႁူမ်ႈ ၵၼ်ၶိုၼ်ႈယိုဝ်း TNLA တီႈလွႆတေးမိူင်း သၼ်လွႆၼမ်ႉမူၼ်း ဢိူင်ႇၸေႊလၢၼ်ႉ ၸႄႈဝဵင်မူႇၸေႊၼၼ်ႉသေ ၵူၼ်းဝၢၼ်ႈ ၸိူဝ်းယူႇတိၼ်လွႆ လႆႈၶၢႆႉပၢႆႈ သွၼ်ႈယူႇဝႆႉ ၼႂ်းဝတ်ႉၵျွင်းဢၼ်မီးၼႂ်းၸႄႈလၢၼ်ႉၼႆယဝ်ႉ။
