တပ်ႉၸုမ်း ၶလယ 123 ဢၼ်ပၵ်းသဝ်းဝႆႉတီႈၼမ်ႉၽၵ်းၵႃ လၢမ်းလိမ်းယိုဝ်းၵွင်ႈလူင် တူၵ်းသႂ်ႇဝၢင်းႁိူၼ်းလႄႈ ၵူၼ်းမိူင်း လူႉတၢႆ 1 မၢတ်ႇၸဵပ်း 2 ။

ၵူၼ်းမိူင်းၸိူဝ်းယူႇသၢင်ႈၵိၼ်သဝ်းၸွမ်းဝၢၼ်ႈၼမ်ႉၵႃ ၸႄႈဝဵင်းၵူတ်ႉၶၢႆၼႆႉ ၵမ်းၵမ်းၺႃးမၢၵ်ႇၵွင်ႈလူင်သိုၵ်းမၢၼ်ႈတူၵ်းသႂ်ႇ မီးလွင်ႈမၢတ်ႇၸဵပ်းလူႉတၢႆမႃးၶိူဝ်းယႂ်း မိူၼ်ၼင်ႇ မိူဝ်ႈဝၼ်းတီႈ 29/7/2023 ၼႆႉၵူၺ်းၵေႃႈ သိုၵ်းမၢၼ်ႈလၢမ်းလိမ်းယိုဝ်းၵွင်ႈလူင် တူၵ်းသႂ်ႇႁိမ်း ဝၢၼ်ႈလွႆၵုင်း ၼႂ်းပွၵ်ႉ 6 ဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႆၼၼ်ႉ မီးၵူၼ်းမၢတ်ႇၸဵပ်း 2 ၵေႃႉသေ ထဝ်ႈယိင်းၵေႃႉၼိုင်ႈ လူႉတၢႆ 1 ထင်တီႈ ၼႆယဝ်ႉ။

ၸုမ်းၸွႆႈတူင်ႇဝူင်းၵူၼ်းၼမ်ႉၽၵ်းၵႃ  ( မေတ္တာရှင် လူမူကူညီမူ အသင်း ) တႅမ်ႈတၢင်ႇဝႆႉတီႈၾဵတ်ႉသ်ပုၵ်ႉဝႆႉဝႃႈ  – “ မၢၵ်ႇလူင်တူၵ်းသႂ်ႇ ၼႂ်းဝၢင်းႁိူၼ်း တီႈဝၢၼ်ႈလွႆၵုင်း 3 ၵေႃႉၼၢႆးလၢၼ် တိူဝ်ႉၸၢၵ်ႇမၢၵ်ႇမၢတ်ႇၸဵပ်းႁၢဝ်ႈႁႅင်းသေ ၵေႃႉပဵၼ်ၼၢႆး လူႉတၢႆ ထင်တီႈ ” – ဝႃႈၼႆ။

ထဝ်ႈယိင်းၵေႃႉဢၼ်လူႉတၢႆၼႆႉ ၸိုဝ်ႈ ပႃႈဢေးဢၢႆႇ ဢႃယု 60 ပီ ။ သွင်ၵေႃႉ ဢၼ်မၢတ်ႇၸဵပ်းၼၼ်ႉ ပဵၼ်လုၵ်ႈယိင်း ၸိုဝ်ႈႁွင်ႉ ပႃႈဢေႇဝွမ်ႇသေ ထႅင်ႈၵေႃႉၼိုင်ႈ ပဵၼ်လၢၼ် ၸိုဝ်ႈႁွင်ႉ မပပဝိၼ်း ပဵၼ်လုၵ်ႈႁဵၼ်းၸၼ်ႉ 9 တီႈႁူင်းႁဵၼ်းၸၼ်ႉသုင် ၼမ်ႉၽၵ်းၵႃ ။

ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈၼႆႉ ဢမ်ႇပဵၼ်ပၢင်တိုၵ်းၵေႃႈ လၢမ်းလိမ်းယိုဝ်းမၢၵ်ႇလူင်မၢၵ်ႇဢွၼ်ႇၶဝ်ယူႇၵူႈဝၼ်း။မၢၵ်ႇမၢင်ႁူၺ်ႇ ဢမ်ႇတူၵ်းသႂ်ႇဝၢၼ်ႈ ၵႂႃႇတူၵ်းၸွမ်းၼႂ်းသူၼ်ၶဝ်ႈၵၢပ်ႇၸိူဝ်းၼၼ်ႉၵေႃႈမီး ။ တေဢွၼ်ၵၼ် ယူႇၵိၼ်ၸိူင်ႉႁိုဝ်ဢမ်ႇႁူႉယဝ်ႉ ၵိၼ်းၸႂ်ၼႃႇ ” –  ဝႃႈၼႆ။

ၼႂ်းလိူၼ်ၼႆႉၵူၺ်းၼင်ႇၵဝ်ႇ မိူဝ်ႈဝၼ်းတီႈ 24 ၼၼ်ႉ ၶွင်ႇသီႇသိုၵ်းမၢၼ်ႈ ယိုတ်းမိူင်း တပ်ႉၶလယ 123 ဢၼ်ပၵ်းဝႆႉ ၾၢႆႇ ႁွင်ႇဝၢၼ်ႈမႆႇသွင်ၵူင်း ၼႂ်းဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႇၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇၼၼ်ႉ လမ်းလိမ်း ယိုဝ်းၵွင်ႈလူင်ၵွင်ႈဢွၼ်ႇ သႂ်ႇႁိူၼ်းယေးၵူၼ်းဝၢၼ်ႈမႆႇသွင်ၵူင်း တိူဝ်ႉၺႃး ၽႃႁိူၼ်း၊ လင်ၶႃး ၸိူဝ်းၼႆႉ ယွၵ်းပွင်ႇလူႉၵွႆ 2 လင် ၼႆယဝ်ႉ။

ႁိူၼ်းၵူၼ်းဝၢၼ်ႈ တီႈၼမ်ႉၽၵ်းၵႃၼႆႉ ဢၼ်ၺႃးမၢၵ်ႇလူင်သိုၵ်းမၢၼ်ႈတူၵ်းသႂ်ႇ မီးလၢႆလင်ယဝ်ႉသေတႃႉ ထိုင်မိူဝ်ႈလဵဝ် ဢမ်ႇမီးၸုမ်းလႂ် ၶဝ်ႈၸွႆႈၵမ်ႉထႅမ်လႆႈတဵမ်တီႈ ၾၢႆႇသိုၵ်းမၢၼ်ႈၵေႃႈ ဢမ်ႇမီးလွင်ႈ သၢႆႈတႅၼ်းသင်ပၼ် ၵၢၼ်ႁႃၵိၼ်လဵင်ႉတွင်ႉၵေႃႈယၢပ်ႇၽိုတ်ႇ သင်ပဵၼ်လႆႈ ႁႂ်ႈၵိုတ်းလွင်ႈပိုတ်းယိုဝ်းဝႆးဝႆးၼႆ ၵူၼ်းပိုၼ်ႉတီႈၵေႃႉၼိုင်ႈ တုၵ်းယွၼ်းဝႆႉၼင်ႇၼႆ။