သိုၵ်းမၢၼ်ႈလႄႈ တပ်ႉသိုၵ်းၵူၼ်းမိူင်းပျီႇတူႉၸိတ်ႉႁူမ်ႈၵၼ်ၶိုၼ်ႈယိုဝ်းတပ်ႉပၢင်သဝ်းသိုၵ်း TNLA ဢၼ်မီးတီႈတၢင်းမၢၼ်ႈၵၢင် ၸႄႈဝဵင်းမူႇၸေႊ ႁၢဝ်ႈႁႅင်း ၵူၼ်းမိူင်းပိုၼ်ႉတီႈဢမ်ႇႁတ်းပိုတ်ႇႁၢၼ်ႉ ပိုတ်ႇၵၢတ်ႇ ယၢပ်ႇၽိုတ်ႇၵိၼ်းၸႂ်။
သိုၵ်းသွင်ၾၢႆႇၼႆႉပိုတ်းယိုဝ်းၵၼ် တီႈလွႆတေးမိူင်း သၼ်လွႆၼမ်ႉမူၼ်း ဢိူင်ႇၸေႊလၢၼ်ႉ ၸႄႈဝဵင်မူႇၸေႊ ၸဵမ်မိူဝ်ႈဝႃး ဝၼ်းတီႈ 29/07/2023 ယၢမ်းၵၢင်ဝၼ်း ၊ သွင်ၾၢႆႇယိုဝ်းၵၼ်တင်းၶိုၼ်း တေႃႇထိုင်ၼႂ်ၼႆႉ တိုၵ်ႉၶဵင်ႈၶႅင်တေႃႇၵၼ်ယူႇ။
“မိူဝ်ႈသဵင်ၵွင်ႈပႆႇတႅၵ်ႇၼၼ်ႉလႆႈႁၼ် သိုၵ်း TNLA ၶိုၼ်ႈၵႂႃႇတၢင်းႁူၺ်ႈၼမ်ႉသွမ်ႇ ။ ဝၢႆးၼၼ်ႉဢမ်ႇႁိုင်သင်ၵေႃႉ သဵင်ၵွင်ႈတႅၵ်ႇ။ ယိုဝ်းၵၼ်တင်းၵွင်ႈလူင်လႄႈၵွင်ႈဢွၼ်ႇ ။ ၵူၼ်းပိုၼ်ႉတီႈ တၢင်းၸေႊလၢၼ်ႉၼႆႉ ဢမ်ႇႁတ်းပိုတ်ႇၽၵ်းတူႁိူၼ်း ၽၵ်းတူႁၢၼ်ႉ။ ဢမ်ႇၸၢင်ႈသိုဝ်ႉၶၢႆသင်ၵၼ် ” – ဝႃႈၼႆ။
သိုၵ်းမၢၼ်ႈဢၼ်ႁႅၼ်းသိုၵ်းၶိုၼ်ႈယိုဝ်း ပၢင်သဝ်း TNLA ၼႆႉပဵၼ်တပ်ႉၶလရ 261 လႄႈတင်း သိုၵ်းပျီႇတူႉၸိတ်ႉ မဵဝ်ႉမ ၼမ်ႉၶမ်း ႁူမ်ႈၵၼ် ။ လိူဝ်ၼၼ်ႉ မိူဝ်ႈဝႃးၼႆႉ သိုၵ်းမၢၼ်ႈဢၼ်ယူႇတၢင်း 105 လၵ်းလႄႈသိုၵ်းမၢၼ်ႈၼမ်ႉၽၵ်းၵႃ ၵေႃႈ ယိုဝ်းၵွင်ႈလူင်ၵႂႃႇတၢင်း ဝၢၼ်ႈလႄႈတၢင်းထိူၼ်ႇ ဢမ်ႇယွမ်း 20 ၵမ်း ၽူႈမီးပုၼ်ႈၽွၼ်း ၼႂ်းတပ်ႉသိုၵ်းတဢၢင်းလၢတ်ႈဝႆႉတီႈၶၢဝ်ႇ RFA ၼင်ႇၼႆ ။ လွင်ႈၼႆႉ တိူဝ်ႉၺႃးႁိူၼ်းယေးၵူၼ်းဝၢၼ်ႈ ၽွင်ႈယူႇ ဝႃႈၼႆသေတႃႉ ဢမ်ႇလႆႈႁူႉႁူဝ်ယွႆႈတႅတ်ႈတေႃး။
“ၶဝ်ၶဵင်ႈၶႅင်ၵၢၼ်သိုၵ်းၵၼ် ယိုဝ်းၵၼ်ယူႇၵူႈဝၼ်း ႁဝ်းၶႃႈဢမ်ႇၸၢင်ႈပိုတ်ႇၽၵ်းတူႁၢၼ်ႉမီး 5 ဝၼ်းယဝ်ႉ။ ၶူဝ်းၵုၼ်ႇမၢင်ၵၼ် ဝၼ်းမူတ်းဢႃယု ၼႆ ႁဝ်းၶႃႈၵူၼ်းမိူင်းၵူၺ်း သုမ်းယဝ်ႉသုမ်းထႅင်ႈ ”- ၸဝ်ႈႁၢၼ်ႉၵေႃႉၼိုင်ႈၵေႃႈလၢတ်ႈတီႈၽူႈတွႆႇႁွၵ်ႈၼင်ႇၼႆ။
သိုၵ်းမၢၼ်ႈလႄႈသိုၵ်းတဢၢင်းၼႆႉ ပိုတ်းယိုဝ်းတိုၵ်းတေႃးၵၼ်မႃးတၢင်းၸေႊလၢၼ်ႉၼႆႉ ၸဵမ်မိူဝ်ႈဝၼ်းတီႈ 23/07/2023 ။ ၵူၼ်းမိူင်း မီးလွင်ႈမၢတ်ႇၸဵပ်းလူႉတၢႆၸွမ်း။
