ပၢင်တိုၵ်း တီႈဝဵင်းၵူတ်ႉၶၢႆ ၶၢဝ်းတၢင်း 10 ဝၼ်းမႃးၼႆႉ တုၵ်းယွၼ်းႁႂ်ႈသိုၵ်းမၢၼ်ႈ ႁပ်ႉဢဝ်ပုၼ်ႈၽွၼ်း သၢႆႈတႅၼ်းၶူဝ်းၶွင် ၵႃႈယူတ်းယႃတူဝ် ပၼ်ၵူၼ်းမိူင်း ၸိူဝ်းၺႃးၸၢၵ်ႇမၢၵ်ႇလူႉတၢႆမၢတ်ႇၸဵပ်း ယွၼ်ႉသိုၵ်းၶဝ်ၼၼ်ႉ ဝႃႈၼႆ။
မိူဝ်ႈဝႃး ဝၼ်းတီႈ 26/7/2023 ယူႇတီႈ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆး လွင်ႈသိုၵ်း မၢၼ်ႈ ယိုဝ်းၵွင်ႈလူင် ၽွင်းပဵၼ်ပၢင်တိုၵ်းၸွမ်းသိုၵ်းၶၢင် KIA တီႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ ႁဵတ်းႁႂ်ႈၵူၼ်းမိူင်းၺႃးၸၢၵ်ႇလူႉတၢႆၸွမ်း 2 ၵေႃႉ မၢတ်ႇၸဵပ်း 6 ၵေႃႉ ၵွပ်ႈၼႆလႄႈ တုၵ်းယွၼ်းႁႂ်ႈသိုၵ်းမၢၼ်ႈ ႁပ်ႉပုၼ်း ၽွၼ်း တူၺ်းထိုင်ၵူၼ်းမိူင်း ၸိူဝ်းလႆႈမၢတ်ႇၸဵပ်းလူႉတၢႆ ယွၼ်ႉသိုၵ်းၶဝ်ၸိူဝ်းၼၼ်ႉ ၼႆယဝ်ႉ။
ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈလႆႈဢွၵ်ႇၽိုၼ်တၢမ်းငဝ်းလၢႆးၼႆႉ ၶႂ်ႈပိုတ်ႇၼႄတၢင်း မိူၵ်ႈလိူင်းသိုၵ်းမၢၼ်ႈ ဢၼ်ၽိတ်းမေႃႈသမ်ႉပေႃႉၵၢၵ်ႇ ယိုဝ်းမၢၵ်ႇလူင်ၶဝ်ၵႂႃႇၵႃႈဝႃႈၵႃႈပဵၼ်သေ ဢမ်ႇမေႃယွမ်းႁပ်ႉတၢင်း ၽိတ်းၸဝ်ႈၵဝ်ႇၼၼ်ႉၶႃႈ။ လၢႆးႁဵတ်းၸိူင်ႉၼၼ် ၶဝ်ၸႂ်ႉမႃးပၢၼ်သိုပ်ႇပၢၼ်။ ယူႇတီႈႁဝ်းၶႃႈတႄႉၶႂ်ႈတုၵ်းယွၼ်းႁႂ်ႈၶဝ်ႁပ်ႉ ဢဝ် ပုၼ်ႈၽွၼ်း သၢႆႈတႅၼ်းၶူဝ်းၶွင်၊ ၵႃႈယူတ်းယႃတူဝ်ၵူၼ်းမိူင်းၸိူဝ်းၺႃးၸၢၵ်ႇမၢၵ်ႇၶဝ်လႄႈ ႁပ်ႉဢဝ်ပုၼ်ႈၽွၼ်း တူၺ်းထိုင် ပီႈၼွင်ႉၵူၼ်းမိူင်းၸိူဝ်းလႆႈလုတၢႆယွၼ်ႉၶဝ်ၸိူဝ်းၼၼ်ႉဢေႃႈ”- ဝႃႈၼႆ။
ၼႂ်းၽိုၼ်တၢမ်းငဝ်းလၢႆးၼၼ်ႉ ဢွၵ်ႇဝႆႉဝႃႈ ၽွင်းသိုၵ်းမၢၼ်ႈပဵၼ်ပၢင်တိုၵ်းၵၼ် တင်းၸွမ်းသိုၵ်းၶၢင် KIA ၼႂ်းၸႄႈဝဵင်းၵူတ်ႉ ၶၢႆ ၸိုင်ႈတႆးပွတ်းႁွင်ႇ တင်ႈတႄႇ ဝၼ်းတီႈ 8/7/2023 – 18/7/2023 ၼၼ်ႉ ယွၼ်ႉသိုၵ်းမၢၼ်ႈဢဝ်ၵွင်ႈလူင်ယိုဝ်းၵႂႃႇၵူႈႁူး ၵူႈတၢင်းလႄႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းတၢႆ 2 ၵေႃႉ မၢတ်ႇၸဵပ်းထႅင်ႈ 6 ၵေႃႉ ဝႃႈၼႆ။
ပၢင်တိုၵ်း တႄႇၵိူတ်ႇၶိုၼ်ႈ ၼႂ်းဝၼ်းတီႈ 8/7/2023 ဝၢႆးဝၼ်း ၽွင်းသိုၵ်းၶၢင် မူၵ်းယိုဝ်းသိုၵ်းမၢၼ်ႈတပ်ႉၶမယ 507 လႃႈသဵဝ်ႈလႄႈၶလယ 69 သႅၼ်ဝီဢၼ်မီးဢဵၼ်ႁႅင်းမွၵ်ႈ 100 ၸွမ်းသဵၼ်ႈတၢင်းလူင်ဝဵင်းလိူဝ်ႇ-မူႇၸႄႈ ၸိုင်ႈတႆးပွတ်းႁွင်ႇ။
ဝၼ်းတီႈ 9/7/2023 ၶၢဝ်းယၢမ်းမွၵ်ႈႁူဝ်ၶမ်ႈ 6 မူင်းၼၼ်ႉ ပဵၵ်ႉသမ်ႉဢမ်ႇမီးပၢင်တိုၵ်းသင်သေတႃႉ သိုၵ်း မၢၼ်ႈ တပ်ႉၶလယ 123 ဢၼ်ပၵ်းတီႈၼမ်ႉၽၵ်းၵႃ ယိုဝ်းၵွင်ႈလူင်ၶဝ်ၵႂႃႇၼႂ်းဝၢၼ်ႈၼႃးၽၢႆ ဢိူင်ႇဢူႇယႃႇ ၽုၼ်ႇ ၵွင်းလိၼ်။ မၢၵ်ႇလူင်လုၵ်ႈ ၼိုင်ႈတူၵ်းသႂ်ႇႁိူၼ်းၵူၼ်းဝၢၼ်ႈလင်ၼိုင်ႈသေ ႁဵတ်းႁႂ်ႈၼၢင်းယိင်းသွင်ပီႈ ၼွင်ႉဢႃယု 30 ပၢႆမၢတ်ႇၸဵပ်းၼႂ်းႁိူၼ်း။ ၼၢင်း ယိင်းၵေႃႉၼိုင်ႈတႄႉ ယွၼ်ႉၸဵပ်းႁႅင်းလႄႈ လႆႈဢဝ်ၵႂႃႇ ၶဝ်ႈႁူင်းယႃ။
ဝၼ်းတီႈ 10-11/7/2023 ပၢင်တိုၵ်းသိုပ်ႇၽႄႈလၢမ်းထိုင်မၢၼ်ႈပဵင်း ၼႂ်းသႅၼ်ဝီ လႄႈဝၢၼ်ႈၼမ်ႉၽၵ်းၵႃ ၼႂ်းဝဵင်းၵူတ်ႉၶၢႆ။
ဝၼ်းတီႈ 10/7/2023 ၶၢဝ်းယၢမ်းၵၢင်ၼႂ်မွၵ်ႈ 10 မူင်းပဵၵ်ႉသမ်ႉဢမ်ႇမီးပၢင်တိုၵ်း ၼႂ်း ဝဵင်းၵူတ်ႉၶၢႆ သင်သေတႃႉသိုၵ်းမၢၼ်ႈ တပ်ႉ ၵွင်ႈလူင်ဢၼ်ပၵ်းတီႈၵူတ်ႉၶၢႆၼၼ်ႉ ယိုဝ်း မၢၵ်ႇလူင် ၶဝ်ၵႂႃႇၵူႈႁူး ၵူႈ တၢင်းၼႂ်း ဝဵင်း။ မၢၵ်ႇလူင်လုၵ်ႈၼိုင်ႈတႅၵ်ႇ ႁိမ်း ၼၢင်းယိင်း ၵူၼ်းမိူင်းယု ဢွၼ်ႇ ၵေႃႉၼိုင်ႈ ဢၼ်တိုၵ်ႉၶီႇလူတ်ႉၶိူင်ႈ တေၵႂႃႇၵၢတ်ႇ ၼႂ်းဝဵင်းၵူတ်ႉၶၢႆ။ ၸၢၵ်ႇမၢၵ်ႇလူင်ၼၼ်ႉ တိူဝ်ႉသႂ်ႇတီႈၶႃလူင်မၼ်းၼၢင်းလႄႈလႆႈဢဝ် ၵႂႃႇၶဝ်ႈႁူင်းယႃၵူတ်ႉၶၢႆ ယူတ်းယႃတူဝ်။
ပၢင်တိုၵ်းယႂ်ႇသိုပ်ႇပဵၼ်ၵႂႃႇ တၢင်းႁွင်ႇလႄႈတၢင်းၸၢၼ်း ၼမ်ႉၽၵ်းၵႃ ၼႂ်းဝၢၼ်ႈၶူဝ်မုင်းလႄႈ ဝၢၼ်ႈၽႃၶၢတ်ႈ။ မိူဝ်ႈဝၼ်းတီႈ 16/7/2023 ၼၼ်ႉၵေႃႈ မၢၵ်ႇလူင်သိုၵ်းမၢၼ်ႈ တူၵ်းတႅၵ်ႇၼႂ်း ႁူင်းလဵင်ႉ ဝူဝ်းၼႂ်း ဝၢၼ်ႈ ၶူဝ်မုင်း။ မၢၵ်ႇတႅၵ်ႇ ၼၼ်ႉ ႁဵတ်း ၼၢင်းယိင်းၵေႃႉၼိုင်ႈ ဢႃယု 50 ယူႇႁိမ်းႁူင်းလဵင်ႉဝူဝ်းၼၼ်ႉ တူၵ်းၸႂ်လိုမ်းတူဝ်သေတၢႆၵႂႃႇ။ မၢၵ်ႇလူင် ၼၼ်ႉ ႁဵတ်းႁႂ်ႈဝူဝ်း တၢႆၸွမ်းထႅင်ႈ 5 တူဝ်။
ဝၼ်းတီႈ 18/7/2023 ပၢင်တိုၵ်းလူင်ပဵၼ်တီႈ ႁိမ်းဝၢၼ်ႈၶူဝ်မုင်း။ သိုၵ်းမၢၼ်ႈတပ်ႉၶမယ 88 ဢၼ်ပၵ်းတီႈလွႆၵွင်းယႃႈ ၼၼ်ႉ ယိုဝ်းမၢၵ်ႇလူင်ၶဝ်ၶဝ်ႈၵႂႃႇၼႂ်းဝၢၼ်ႈၵွင်းယႃႈလႄႈမၢၼ်ႈပဵင်း။ မၢၵ်ႇလူင်ၼၼ်ႉ ၵႂႃႇတိူဝ်ႉ ၺႃးႁိူၼ်းၵူၼ်းဝၢၼ်ႈၵွင်းယႃႈ သွင်လင် လႄႈၼႂ်းမၢၼ်ႈပဵင်းထႅင်ႈၼိုင်ႈလင်သေ ႁဵတ်းႁႂ်ႈၾႆးမႆႈ။ ဝၼ်းၼၼ်ႉ မွၵ်ႈၶၢဝ်းယၢမ်း 5 မူင်းဝၢႆးဝၼ်း သိုၵ်းမၢၼ်ႈ တပ်ႉၶလယ 123 ၼမ်ႉၽၵ်းၵႃ ယိုဝ်းမၢၵ်ႇလူင် ၶဝ် ၵႂႃႇတူၵ်း ၼႂ်းဝၢၼ်ႈၸီးတပၢၼ်ႇ ဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ။ ၸၢၵ်ႇမၢၵ်ႇလူင်တိူဝ်ႉၺႃးတေႃႇ ၶၼ်ႇၼၼ်ႇ ဢႃယု 47 ပီ၊ မွင်ႇပရႃႇၸိတ်ႉ ဢႃယု 16 ပီ၊ မွင်ႇပရႃႇသၢၼ်ႇ ဢႃယု 9 ပီ လႄႈ မႄႇရီႇ ဢႃယႃ 21 ပီ။ မွင်ႇပရႃႇၸိတ်ႉ တႄႉတၢႆ ၽွင်းဢဝ် တူဝ်ၵႂႃႇႁူင်းယႃၵူတ်ႉၶၢႆ။
ယၢမ်းလဵဝ် ၵူၼ်းဝၢၼ်ႈၵွင်းယႃႈ ဢၼ်မီးလင် ႁိူၼ်းမွၵ်ႈ 30 လင်လႄႈမၢၼ်ႈပဵင်းဢၼ်မီးလင် ႁိူၼ်းမွၵ်ႈ 20 လင် ႁူမ်ႈႁူဝ် ၵူၼ်းတင်းသွင်ဝၢၼ်ႈမွၵ်ႈ 220 ၵေႃႉ ၵႂႃႇပိုင်ႈႁူမ်ႈဝႆႉတီႈၵျွင်းၽြႃးၶရိယၼ်ႇ ၼႂ်းဝၢၼ်ႈၶူဝ်မုင်း။ သိုၵ်းမၢၼ်ႈ ဢဝ်တီႈယူႇပၵ်း တပ်ႉဝႆႉ ၼႂ်းဝၢၼ်ႈၵွင်းယႃႈ – SHRF ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ