ၵူၼ်းၸၢႆးၵေႃႉၼိုင်ႈ ၵူၼ်းဝၢၼ်ႈပွၵ်ႉ 8 လွႆပဝ်း ဝဵင်းၵျွၵ်ႉမႄး ၵႂႃႇႁဵတ်းၵၢၼ်မႃးသေ ၶီႇရူတ်ႉၶိူင်ႈပွၵ်ႈႁိူၼ်း၊ ၽွင်းလူင်းၵွင်း ၼႂ်းဝၢၼ်ႈမႃးၼၼ်ႉ ႁိုၵ်ႉၺႃးရူတ်ႉၶိူင်ႈထႅင်ႈလမ်းၼိုင်ႈသေ ယၢတ်ႇတူၵ်းႁိုၵ်း မၢတ်ႇၸဵပ်းႁၢဝ်ႈႁႅင်း။
မိူဝ်ႈဝႃး ဝၼ်းတီႈ 24/7/2023 ယၢမ်းႁူဝ်ၶမ်ႈ ၵူၼ်းၸၢႆးၵေႃႉၼိုင်ႈ ၶီႇရူတ်ႉၶိူင်ႈလူင်းၵွင်းမႃးႁိုၵ်ႉ ၺႃးရူတ်ႉထႅင်ႈ လမ်းၼိုင်ႈ၊ မၼ်းၸၢႆးငႅၵ်းဝႄႈလႄႈ တင်းရူတ်ႉၶိူင်ႈတင်းၵူၼ်း ယၢတ်ႇတူၵ်းႁိုၵ်း ဢၼ်မီးတၢင်းသုင်မီးမွၵ်ႈ 10 ပေႇ တီႈလွႆပဝ်း ပွၵ်ႉ 8 ၸႄႈဝဵင်းၵျွၵ်ႉမႄးမၼ်းၸၢႆး မၢတ်ႇၸဵပ်းႁၢဝ်ႈႁႅင်း ဝႃႈၼႆ။
ၵူၼ်းၼႂ်းပိုၼ်ႉတီႈ ဝဵင်းၵျွၵ်ႉမႄးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သဵၼ်ႈတၢင်းၼႂ်းဝၢၼ်ႈသမ်ႉ ၵူတ်ႉငွၵ်းငႅၵ်း သေဢမ်ႇၵႃး ပဵၼ်ၵုင်း ပဵၼ်ၵွင်း ပဵၼ်ႁူၺ်ႈ ပဵၼ်ႁွင်ႈ၊ ႁိူၼ်းလႂ် ႁိူၼ်းၼၼ်ႉ သိူဝ်ႇဝႆႉမႄးဝႆႉၼႃႈႁိူၼ်းၽႂ်မၼ်းၵူၺ်း၊ သဵၼ်ႈတၢင်းဢမ်ႇလီလႄႈ ၽွင်းၸၢႆးၼုမ်ႇၶီႇရူတ်ႉၶိူင်ႈ ပွၵ်ႈၵၢၼ်မႃးႁိူၼ်းၶိုၼ်းၼၼ်ႉ မၼ်းၸၢႆးလူင်းၵုင်းမႃး ႁိုၵ်ႉၺႃး ရူတ်ႉၶိူင်ႈလမ်းၼိုင်ႈတိုၵ်ႉၶိုၼ်ႈၵုင်းမႃး။ မၼ်းတင်ႈၸႂ်ႈဝႄႈတၢင်းပၼ်သေၵႂႃႇၽႃႇသႂ်ႇ ႁူဝ်ႉဢုတ်ႇ ။ ႁူဝ်ႉဢုတ်ႇ သမ်ႉ ၵူၼ်ႇ တင်းရူတ်ႉတင်းၵူၼ်း တူၵ်းႁိုၵ်းၵႂႃႇ ၼႂ်းဝၢင်းႁိူၼ်းပိူၼ်ႈ ဢၼ်ပဵၼ်ၾင်ႇႁိုၵ်းလူင်းၵႂႃႇတၢင်းတႂ်ႈ ။ တၢင်းသုင် မီးမွၵ်ႈ 10 ပေႇ ။ ၵေႃႉတူၵ်းၵႂႃႇၼၼ်ႉ မၢတ်ႇၸဵပ်းႁႅင်း ၸၢႆး 2 ၵေႃႉဢၼ်ၶိုၼ်ႈၵုင်းမႃးၼၼ်ႉတႄႉ ၼိူဝ်ႉၼင် လွၵ်ႈလၢၼ်ႉဢိတ်းဢွတ်းၵူၺ်း ” – ဝႃႈၼႆ။
ၵေႃႉတူၵ်းႁိုၵ်းမၢတ်ႇၸဵပ်းၼၼ်ႉ ဢႃယုမီး 30 ပၢႆ ၊ ပဵၼ်ၵူၼ်းယူႇၶႅပ်ႇဝဵင်းသေ မႃးႁႃၵိၼ်ၸၢင်ႈႁဵတ်း ၵၢၼ်ႁႃၵိၼ်လဵင်ႉတွင်ႉ ၼႂ်းဝဵင်း။ မိူဝ်ႈလဵဝ်ၸုမ်းၸွႆႈ ၶႅၵ်ႇလီပၢင်ၸႃႉ ၸွႆႈသူင်ႇယူတ်းယႃတူဝ်ဝႆႉ တီႈႁူင်းယႃလူင်ၵျွၵ်ႉမႄး လႆႈႁူႉၼင်ႇၼႆ။
ႁူဝ်ပဝ်ႈၸုမ်းၸွႆႈ ၶႅၵ်ႇလီပၢင်ၸႃႉၼမ်ႉၶူင်းၵျွၵ်ႉမႄး သင်ႇလၢတ်ႈဝႃႈ – “ မိူဝ်ႈလဵဝ် ၶၢဝ်းၾူၼ် သဵၼ်ႈတၢင်းသမ်ႉမိုၼ်ႈ။ ၵူၼ်းႁေႃႈရူတ်ႉၶိူင်ႈရူတ်ႉၵႃး ႁႂ်ႈၸွမ်းပၵ်းပိူင်ၵၢၼ်ၶပ်းႁေႃႈ။ တိုဝ်းမၢၵ်ႇႁူဝ်ရူတ်ႉၶိူင်ႈ ၊ ပေႃးပဵၼ်ၽေးမႃး တေဢမ်ႇတိူဝ်ႉႁူဝ်။ ပေႃးႁေႃႈရူတ်ႉႁေႃႈၵႃး ႁႂ်ႈၾၢင်ႉ ယႃႇႁိပ်ႈၼႅတ်ႈ ၊ ၵႆႉၸႅတ်ႈတူၺ်း ၶိူင်ႈရူတ်ႉၵႃးၽွင်ႈ ဢၼ်လႂ်လီဢမ်ႇလီ ႁႂ်ႈႁူႉဝႆႉ ၊ ၶိူင်ႈၶူဝ်းဢၼ် လူဝ်ႇလၢႆႈၵေႃႈ ႁႂ်ႈလၢႆႈပၼ် တႃႇလွတ်ႈၽေး ” – ဝႃႈၼႆ။
မိူဝ်ႈဝၼ်းတီႈ 15/7/2023 ၼၼ်ႉၵေႃႈ ၵႃးတၢင်ႇၵုၼ်ႇလမ်းၼိုင်ႈ ၵွႆသေ ၵိုတ်းဝႆႉ ၼိူဝ်သဵၼ်ႈတၢင်းလူင်ပျီႇထွင်ႇၸု(သဵၼ်ႈတၢင်းၵႂႃႇမႃး ဢွင်ႇပၢၼ်း – တူၼ်ႈတီး) တၢင်းၶဝ်ႈဢွၵ်ႇဝဵင်း ႁိမ်းႁူင်းႁဵၼ်းပိတ်ႉၸုပၼ်ႇ (ပစ္စုပ္ပန်ကျောင်း) တီႈၸႄႈဝဵင်းဢွင်ႇပၢၼ်း သမ်ႉမီးရူတ်ႉၶိူင်ႈလမ်းၼိုင်ႈ ဢမ်ႇၾၢင်ႉမႅၼ်ႈ ႁေႃႈမႃးၽႃႇၺႃးၵႃး၊ ၵူၼ်းႁေႃႈလူႉတၢႆထင်တီႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ