ဝၼ်းတီႈ 23 လိူၼ်ၵျူႊလၢႆႊ ဝၼ်းဢႃးတိတ့် ယၢမ်းႁူဝ်ၶမ်ႈ မွၵ်ႈ 5 မူင်းၼႆ့ ပျီႇတူ့သိတ့် တႂ်ႈသိုၵ်းမၢၼ်ႈယိုတ်းမိူင်း တင်း ၸုမ်းသိုၵ်းတဢၢင်း TNLA ပဵၼ်ပၢင်တိုၵ်းၵၼ် ႁိမ်းၶူဝ်ၼမ့်မွၼ်း ထုင့်ၸေႈလၢၼ့် ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ။ ယိုဝ်းပႃး ၶိူင်ႈၵွင်ႈယႂ်ႇလၢႆလၢႆၵမ်း ၊ ႁဵတ်းႁႂ်ႈၵူၼ်းမိူင်း တူၵ်းၸႂ်ၵူဝ်ႁႄ ။
“ၵႃးပျီႇတူႉၸိတ်ႉသမ်ႉဢၢၼ်းၶၢမ်ႈၶူဝ်ၼမ်ႉမွၼ်း ဢၼ်သိုၵ်း TNLA ပႂ်ႉဝႆႉ ။ သိုၵ်းတဢၢင်း တႄႉပိုတ်းယိုဝ်း။ ၽိူဝ်ႇငိၼ်းသဵင် ယိုဝ်းယဝ်ႉ သိုၵ်းမၢၼ်ႈၵေႃႈ ယိုဝ်းမႃးၸွမ်းလႄႈၸင်ႇပဵၼ်ပၢင်တိုၵ်း။ ပျီႇတူႉၸိတ်ႉတၢႆ 1 မၢတ်ႇၸဵပ်း 2 ၵေႃႉ”
ၸၢၵ်ႇမၢၵ်ႇၵေႃႈတိူဝ်ႉၺႃးႁိူၼ်းယေးၵူၼ်းဝၢၼ်ႈ ။ တုမ်ႉတိူဝ်ႉပႃးရူတ်ႉၵႃးၸိူဝ်းၼႆႉ။
“ၸႄႈလၢၼ်ႉၼႆႉ တိူဝ်ႉၺႃးႁိူၼ်းၵူၼ်းဝၢၼ်ႈ 2 လင်။ ၽၵ်းတူႁူးလႅင်းႁိူၼ်းယေးပေႃးပွင်ႇယွၵ်းမူတ်း။ ရူတ်ႉၵႃးၵေႃႈၵွႆ။ တုမ်ႉတိူဝ်ႉၼမ်ယူႇမိူၼ်ၵၼ် ” – ၵူၼ်းဝၢၼ်ႈလၢတ်ႈၼင်ႇၼႆ။
ယွၼ့်ပၢင်တိုၵ်းသေ ၵူၼ်းမိူင်း ဢိၵ်ႇ ၸဝ်ႈၵႃး ဢမ်ႇၸၢင်ႈလတ်းၵႂႃႇမႃး လႆႈၵိုတ်းယင့်ဝႆ့တၢင်းႁိုင်ၼႆ ၵူၼ်းပိုၼ့်တီႈၵေႃ့ၼိုင်ႈ လၢတ်ႈၼင်ႇၼႆ။
ႁိမ်းၶူဝ် ၼမ့်မွၼ်း ၼႆ့ မီးၸုမ်းသိုၵ်းတဢၢင်း TNLA တင်ႈလၢၼ်ႇ ၵဵပ်းၶွၼ်ႇ ၵူၼ်းမိူင်းၸိူဝ်းလတ်းၵႂႃႇမႃး ၵူႈဝၼ်း ၊ လိူဝ်ၼၼ့် မီးပႃး ၸုမ်းပျီႇတူ့သိတ့် တႂ်ႈသိုၵ်းမၢၼ်ႈထႅင်ႈ ။ တီႈပၢင်တိုၵ်းၼၼ့် ၾၢႆႇသိုၵ်းပျီႇတူ့သိတ့် တၢႆဢမ်ႇယွမ်း 3 ၵေႃႉ ။
ၼႂ်းပိုၼ့်တီႈၼၼ့် မီးဝႆ့ ၸုမ်းယိပ်းၵွင်ႈၵၢင်ႇတၢင်းၼမ် မိူၼ်ၼင်ႇ သိုၵ်းမၢၼ်ႈယိုတ်းမိူင်း၊ ပျီႇတူ့သိတ့် ၊ သိုၵ်းတႆး SSPP ၊ သိုၵ်းတဢၢင်း TNLA ၊ သိုၵ်းၶၢင် KIA ၸိူဝ်းၼႆ့ ။
ပူၼ့်မႃး မိူဝ်ႈဝၼ်းတီႈ 10 လိူၼ်ၵျူႊလၢႆႊၼႆ့ၵေႃႈ သိုၵ်းမၢၼ်ႈ တင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ၼႂ်းၸႄႈတွၼ်ႈၵျွၵ့်မႄး ၵိင်ႇၸႄႈဝဵင်းမိူင်းငေႃ့ ၊ ၵူၼ်းပိုၼ့်တီႈ 2 ၵေႃ့ မၢတ်ႇၸဵပ်းၸွမ်း ၼႆယဝ့်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ