သိုၵ်းပဢူဝ်း PNLO တီႈဝဵင်းသီႇသႅင်ႇ ၶဝ်ႈထိုင် ၼႂ်းဢိူင်ႇၼႂ်းဝၢၼ်ႈသေ ၵဵပ်းၶွၼ်ႇ ရူတ်ႉၵႃး၊ ထေႃႈလႃႈၵျီႈ လႄႈ ၶိူင်ႈၸၢၵ်ႈထႆၼႃးၶွင်ၵူၼ်းဝၢၼ်ႈ  ၼပ်ႉႁူဝ်သႅၼ်။

ၼႂ်းလိူၼ်ၵျူႊလၢႆႊ ပီ 2023 ၼႆႉ သိုၵ်းပဢူဝ်း PNLO လူင်းၵဵပ်းၶွၼ်ႇၵူၼ်းမိူင်းတီႈၸႄႈဝဵင်းသီႇသႅင်ႇ ႁိူၼ်းလႂ်မီးထေႃႈ ၊ ရူတ်ႉၵႃး ၊ ၸၢၵ်ႈထႆၼႃး ၸိူဝ်းၼႆႉၵေႃႈ တၵ်းလႆႈပၼ်ငိုၼ်း ၼပ်ႉသႅၼ်၊ သႅၼ်ပၢႆ ပေႃးဢမ်ႇမီးရူတ်ႉၵႃးၵေႃႈ ၼိုင်ႈႁိူၼ်းလႂ် ၵဵပ်းၶဝ်ႈသၢၼ် 16 ပႄႇ ၼႆယဝ်ႉ ။

ၵူၼ်းၼႂ်းပိုၼ်ႉတီႈသီႇသႅင်ႇၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းပဢူဝ်း PNLO  လၢတ်ႈတီႈၵူၼ်းလူင်ဝၢၼ်ႈ ဝႆႉဝႃႈ ပေႃးဝၼ်းထီႉ 4 လိူၼ်ၵျူႊလၢႆႊၼႆႉ တေလူင်းၵဵပ်းၶွၼ်ႇ ။ ထေႃႈၼိုင်ႈလမ်း  1 သႅၼ် ၊ရူတ်ႉၵႃး ၼိုင်ႈလမ်းလႂ် 2 သႅၼ်၊ လိူဝ်ၼၼ်ႉ ၶိူင်ႈၸၢၵ်ႈထႆၼႃးယႂ်ႇ လႆႈပၼ် 2 သႅၼ် ။ ပဵၼ်ဝၢၼ်ႈဢၼ်မီးၾၢႆႇဢွၵ်ႇဝဵင်းသီႇသႅင်ႇ မွၵ်ႈ 20 ဝၢၼ်ႈၼႆႉ ” – ဝႃႈၼႆ။

သိုၵ်းပဢူဝ်း PNLO သင်ႇၵူၼ်းမိူင်းဝႃႈ ၼႂ်းၶၢဝ်းတၢင်း 10 ဝၼ်း ႁႂ်ႈပၼ်ၶွၼ်ႇ ဢၼ်ယွၼ်းဝႆႉၸိူဝ်းၼၼ်ႉ တင်းသဵင်ႈ ၼႆလႄႈ ၵူၼ်းမိူင်း ယၢပ်ႇၸႂ် ၵူဝ်ပဵၼ်ၽေးဝႃႈၼႆ။

ၵူၼ်းပိုၼ်ႉတီႈသီႇသႅင်ႇၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မီးလွင်ႈယၢပ်ႇၽိုတ်ႇ၊ ယွၼ်ႉဝႃႈယၢမ်းလဵဝ်  ပဵၼ်ၶၢဝ်းလူင်းသူၼ်လူင်းၼႃးလႄႈ ၸဝ်ႈသူၼ်လူဝ်ႇၸႂ်ႉငိုၼ်း တႃႇၽုၵ်ႇသွမ်ႈ။  ၽႂ်ပႆႇမီးငိုၼ်းပၼ် ။ ထေႃႈလႃႈၵျီႈၵူၺ်းၵေႃႈလႆႈပၼ်ပဵၼ်သႅၼ်   ၊ ၵႃးလႄႈၸၢၵ်ႈထႆၼႃး သမ်ႉ လႆႈပၼ် 2 သႅၼ် ၼႆ ၶႂ်ႈလိူဝ်ႁႅင်းဝႆႉ ” – ဝႃႈၼႆ။

မိူၼ်ၼၼ်ၼင်ႇၵဝ်ႇ ႁိူၼ်းဢၼ်ဢမ်ႇမီး ရူတ်ႉၵႃး ၊ ထေႃႈလႄႈ ၸၢၵ်ႈထႆၼႃးလူင် ၸိူဝ်းၼၼ်ႉၵေႃႈ ၼိုင်ႈႁိူၼ်းလႂ် တေလႆႈပၼ် ၶဝ်ႈသၢၼ် 16 ပႄႇ ဝႃႈၼႆထႅင်ႈ။

ဢိင်ၼိူဝ်လွင်ႈၼႆႉ ၶုၼ်ဢူၵ်ႉၵႃႇ လၢတ်ႈတီႈၽူႈတွႆႇႁွၵ်ႈဝႃႈ – “ ၾၢႆႇတၢင်း သီႇသႅင်ႇၼႆႉ မီးၸုမ်း PNO/PNA ၶဝ်တူင်ႉၼိုင်ဝႆႉ ။ ၵူၼ်းႁဝ်းတႄႉ ဢမ်ႇပေႃးၵႂႃႇတၢင်းပုၼ်ႉ။ၸုမ်းႁဝ်းၼႆႉ တေတူင်ႉၼိုင် ၾၢႆႇမွၵ်ႇမႆႇၼႆႉ ၵမ်ႈၼမ်။ဢၼ်ၵဵပ်းငိုၼ်းၵူၼ်းမိူင်း မိူဝ်ႈလဵဝ်ၼႆႉ တေမီးလွင်ႈထၢင်ႇၽိတ်းၵၼ်ၽွင်ႈၵႂႃႇ ၸင်ႇႁၼ်ၵူၼ်းမိူင်းမႃး တိူင်ႇလၢတ်ႈဝႆႉ ၵေႃႈမီးယူႇ” – ဝႃႈၼႆ။

ဝၢၼ်ႈဢၼ်ၺႃး သိုၵ်းပဢူဝ်းသင်ႇႁႂ်ႈပၼ်ၶွၼ်ႇၼႆႉ မီးမွၵ်ႈ 20 ဝၢၼ်ႈၼႆႉသေ ၼႂ်းၼၼ်ႉပႃး ဝၢၼ်ႈလူင်ၸၢမ် ၊ ၼွင်ဝူဝ် ၊ ၼွင်ၵႅဝ်း ၸဵမ်ၸိူဝ်းၼႆႉ။

လွင်ႈၼႆႉ ၶတ်းၸႂ်တိတ်းတေႃႇၸူးတူၺ်း PNLO ယူႇၵေႃႈတိတ်းတေႃႇဢမ်ႇလႆႈ။

မိူဝ်ႈပူၼ်ႉမႃး လိူၼ်ဢေႊပရိူဝ်ႊ ပီ 2023 ၼၼ်ႉၵေႃႈ တႃႇသိုဝ်ႉမၢၵ်ႇၵွင်ႈၸိုၼ်းယၢမ်းၼႆသေ သိုၵ်းပဢူဝ်း PNO လူင်းၵဵပ်းငိုၼ်းၵူၼ်းမိူင်းတီႈသီႇသႅင်ႇ ၼပ်ႉမၢၵ်ႇလေႃႉၵႃးသေ ၵဵပ်းငိုၼ်း မိူၼ်ၼင်ႇ ၵႃးၼိုင်ႈလမ်း ၼႆႉ မီးမၢၵ်ႇလေႃႉလၢႆဢၼ်ၵေႃႈ လႆႈပၼ်ၸွမ်းၵႃႈၼၼ်ႉ။မၢၵ်ႇလေႃႉ ၼိုင်ႈလေႃႉ ၵဵပ်းငိုၼ်း 1 သႅၼ် လိူဝ်ၼၼ်ႉ ၼႂ်းလိူၼ်ၵျူႊလၢႆႊၼႆႉၵေႃႈ တႃႇသိုဝ်ႉၵွင်ႈၼႆသေ ၵဵပ်းငိုၼ်းၵူၼ်းမိူင်း ၼိုင်ႈႁိူၼ်းလႂ် 5 မိုၼ်ႇပျႃး လႆႈႁူႉၼင်ႇၼႆ။