ၶွင်ႇသီႇၾႅတ်ႊတရႄႊၸိူဝ်ႉၸၢတ်ႈပဢူဝ်း PNFC တင်း ၸုမ်းႁူမ်ႈၽၢၵ်ႈဢူၺ်းလီၵၼ် ပိုၼ်ၽၢဝ်ႇဢွၵ်ႇမႃးဝႃႈ ၼႂ်းပီ 2026 ၼင်ႇႁိုဝ်ၸဝ်ႈဢႃႇၼႃႇသိုၵ်းတေၵူၼ်ႇပင်းၼၼ်ႉ တေသိုပ်ႇၶဝ်ႈပၢင်တိုၵ်း လုၵ်ႉၽိုၼ်ႉသိုၵ်းမၢၼ်ႈၵႂႃႇ ဝႃႈၼႆ။
ပၢင်တိုၵ်းၼႆႉ ပဵၼ်တႃႇတေမီးမႃး မိူင်းႁူမ်ႈတုမ်မႂ်ႇ ၾႅတ်ႊတရႄႊ တီႊမူဝ်ႊၶရေႊသီႊ လႄႈ လွင်ႈၽဵင်ႇပဵင်းပဵၼ်ထမ်း၊ ၶေႃႈပိုၼ်ၽၢဝ်ႇၼႆႉသမ်ႉ ပိုၼ်ၽၢဝ်ႇဢွၵ်ႇမႃး မိူဝ်ႈဝႃး ဝၼ်းတီႈ 4 လိူၼ်တီႊသႅမ်ႊပိူဝ်ႊ။
ၼႂ်းၶေႃႈပိုၼ်ၽၢဝ်ႇၼၼ်ႉ ပႃးဝႆႉထႅင်ႈဝႃႈ – ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်း ယႅၵ်ႈ 3 ၵမ်းသေ ၸတ်းႁဵတ်းၼႆႉ ပဵၼ်လၢႆးလၢႆႈသိူဝ်ႈၶူဝ်းသေ သိုပ်ႇယိပ်းဢႃႇၼႃႇၽွင်းငမ်းၵႂႃႇၵူၺ်း။ ဢိင်ၼိူဝ်ၶေႃႈယၼ်ႇၸႂ်ဢၼ်မီးဝႆႉသေ တေသိုပ်ႇယိပ်းၵမ်ၵၢၼ်လုၵ်ႉၽိုၼ်ႉ ယိုဝ်းတိုၵ်းသိုၵ်းမၢၼ်ႈၵႂႃႇထႅင်ႈ။
လိူဝ်ၼၼ်ႉ တိုၵ်းသူၼ်းဝႆႉပႃး ၶွင်ႇသီႇၾၢႆႇၵိူဝ်းၵုမ် လွင်ႈၽွမ်ႉႁူမ်ႈၸိူဝ်ႉၸၢတ်ႈ NUCC၊ လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG၊ ဢိၵ်ႇပႃးၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလုၵ်ႉၽိုၼ်ႉသိုၵ်းမၢၼ်ႈယူႇၼၼ်ႉ ႁႂ်ႈႁူမ်ႈႁွမ်းၵၼ်သေ ၵေႃႇသၢင်ႈၵၢၼ်လုၵ်ႉၽိုၼ်ႉၵႂႃႇထႅင်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ