ၾႆးမႆႈၵႃးတၢင်ႇမၢၵ်ႇၵွင်ႈၸိုၼ်းယၢမ်းလမ်းၼိုင်ႈ ၼႂ်းၵႄႈ ၵေးသီး- မိူင်းၵၢဝ်

ၵႃးတၢင်ႇမၢၵ်ႇၵွင်ႈၸိုၼ်းယၢမ်းလမ်းၼိုင်ႈ ၾႆးမႆႈတီႈၼိူဝ်သဵၼ်ႈတၢင်း ၼႂ်းၵႄႈၵေးသီး – မိူင်းၵၢဝ် ၵူၼ်းႁေႃႈၵႃး ႁၢႆဝႆႉ။

မိူဝ်ႈဝၼ်းတီႈ 3/7/2023 ပူၼ်ႉမႃးၼႆႉ ၵႃးသႅၼ်း ဢႅဝ်လ်ႊၽၢတ်ႊ Alphard လမ်းၼိုင်ႈ ဢၼ်တၢင်ႇမၢၵ်ႇၵွင်ႈၸိုၼ်းယၢမ်းဝႆႉၼၼ်ႉ ၾႆးမႆႈယူႇၼိူဝ်သဵၼ်ႈတၢင်း ၼႂ်းၵႄႈ မိူင်းၵၢဝ် – ၵေးသီး ၸႄႈဝဵင်းၵေးသီး ၸႄႈတွၼ်ႈလွႆလႅမ် ၵူၼ်းႁေႃႈၵႃးတႄႉ ႁၢႆဝႆႉၼႆယဝ်ႉ။

ၵူၼ်းၼႂ်းပိုၼ်ႉတီႈၵေးသီးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၾႆးမႆႈႁူဝ်ၵႃးဝႆႉ။ လႆႈႁၼ်မီးပႃးမၢၵ်ႇၵွင်ႈ။ မၢင်ဢၼ်ၵေႃႈ ၾႆးမႆႈၽွင်ႈယဝ်ႉ။မႆႈပႃး ၶိူင်ႈၸၢၵ်ႈၵႃးလႄႈ ဢမ်ႇၸၢင်ႈၼူဝ်း။လႆႈႁၼ် ၸုမ်းၶႄၾႆးၶဝ် မႃးမွတ်ႇၾႆးယူႇ ” – ဝႃႈၼႆ။

ၶိူင်ႈၶူဝ်းဢၼ်ၵိုၵ်းၸွမ်း ၵႃးဢၼ်ထုၵ်ႇၾႆးမႆႈၼႆႉ ပလိၵ်ႈလႄႈသိုၵ်းမၢၼ်ႈ ယိုတ်း ဝႆႉတင်းသဵင်ႈ ၶိူင်ႈၶူဝ်းၸိူဝ်းၼႆႉ ပႆႇမီးၸုမ်းလႂ် ယိုၼ်ယၼ်ဝႃႈ ပဵၼ်ၶွင်ၽႂ်။

ဢိင်ၼိူဝ်လွင်ႈၼႆႉ ၵူၼ်းၼႂ်းပိုၼ်ႉတီႈၵေးသီးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၵႃးၼႆႉ ပႆႇႁူႉဝႃႈ ပဵၼ်ၶွင်ၽႂ်။ၵူၼ်းႁေႃႈၵႃးၵေႃႈ ႁၢႆဝႆႉ ။ သိုၵ်းဢၼ်တူင်ႉၼိုင်ႈတၢင်းၼႆႉတႄႉ မီးဝႆႉ သိုၵ်းမၢၼ်ႈ ၊ သိုၵ်း SSPP , သိုၵ်း RCSS ၸိူဝ်းၼႆႉ ၼၼ်ႉၼႃႇ” – ဝႃႈၼႆ။

ဝၢႆးသေ တပ်ႉသိုၵ်းတႆးသွင်ၸုမ်း တိုၵ်းတေႃးၵၼ်တီႈၸႄႈဝဵင်းလွႆလႅမ်ယဝ်ႉၼၼ်ႉ ၾၢႆႇသိုၵ်းမၢၼ်ႈယိုတ်းမိူင်း သင်ႇႁႂ်ႈ တပ်ႉၸုမ်း SSPP/SSA ထွႆဢွၵ်ႇ လၢႆပွၵ်ႈလၢႆၵမ်းယဝ်ႉ။