သိုၵ်းတဢၢင်း TNLA 3 ၵေႃႉ ၵႂႃႇသၢႆႈတႅၼ်းယႃၸႂ်ပၼ်ပူႇၵႄႇဝၢၼ်ႈ ဢိူင်ႇမိူင်းပႃး ဝဵင်းသႅၼ်ဝီ ငိုၼ်းသီႇမိုၼ်ႇပျႃးပၢႆ ယွၼ်ႉပိူဝ်ႈပူၼ်ႉပႅၼ်ပေႃႉထုပ်ႉမၢတ်ႇၸဵပ်းႁႅင်း – ဝႃႈၼႆ။
ၸၢႆးၽူင်း ဢႃယု 43 ပီ ပူႇၵႄႇဝၢၼ်ႈမႂ်ႇၼမ်ႉႁူးပွတ်း ဢိူင်ႇမိူင်းပႃး ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်း ႁွင်ႇ ၺႃးၸုမ်းသိုၵ်းတဢၢင်း TNLA ၶဝ်ႈပေႃႉထုပ်ႉမၼ်းၸၢႆးထိုင်ၼႂ်းႁိူၼ်းယေးမိူဝ်ႈဝၼ်းတီႈ 16 လိူၼ်ၵျုၼ်ႊၼႆႉ၊ မၢတ်ႇၸဵပ်းထိုင်တီႈ ႁူဝ်တႅၵ်ႇ၊ ၼႃႈၵႂ်ႈ၊ ၶႃၸဵပ်း၊ ဢူၵ်းၸဵပ်း၊ တႃၶွၼ်ၼိုင်ႈ ဢမ်ႇမိုၼ်းလႆႈ ။ လွင်ႈၼႆႉသိုဝ်ႇၶၢဝ်ႇလၢႆလၢႆႁွင်ႈၵၢၼ် ဢွၵ်ႇၶၢဝ်ႇလွင်ႈပူၼ်ႉပႅၼ်သုၼ်ႇလႆႈၵူၼ်းသေ ဝၢႆးၼၼ်ႉဢမ်ႇႁိုင် သိုၵ်းတဢၢင်းၸင်ႇ ၶိုၼ်းၵႂႃႇ သၢႆႈတႅၼ်းပၼ်ၵႃႈယူတ်းယႃ တႃႇငိုၼ်း 46,000 ပျႃး ဝႃႈၼႆ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းလွႆၶဝ် ၶဝ်ႈမႃးထၢမ်ဝႃႈ တေသၢႆႈတႅၼ်းပၼ်ၶိုၼ်း၊ တေဢဝ်ၵႃႈႁိုဝ်၊ ပူႇၵႄႇသမ်ႉဝႃႈ ဢဝ်ၸေႇတၼႃႇ ဝႃႈ ၵူၺ်း ၼႆလႄႈ ၾၢႆႇသိုၵ်းလွႆ သၢႆႈပၼ်တႃႇငိုၼ်း 46,000 ပျႃးၵူၺ်း ”- ဝႃႈၼႆ။
မိူဝ်ႈဝၼ်းတီႈ 16/6/2023 ယၢမ်းဝၢႆးဝၼ်း 4 မူင်း သိုၵ်းတဢၢင်း TNLA တႃႉသူဝ်းပေႇ ဢွၼ်ႁူဝ် လုၵ်ႈၼွင်ႉ 2 ၵေႃႉ ၶဝ်ႈပေႃႉထုပ်ႉ ၸၢႆးၽူင်း ပူႇၵႄႇဝၢၼ်ႈမႂ်ႇၼမ်ႉႁူးပွတ်း ယွၼ်ႉပၼ်ႁႃ သိုၵ်းတဢၢင်း ယွၼ်းၵူၼ်းဝၢၼ်ႈတႃႇၼႄတၢင်း တႃႇလႄႇထိူၼ်ႇ 15 ၵေႃႉ ။ ပူႇၵႄႇဝႃႈ ပဵၼ်ၶၢဝ်းႁဵတ်းၵၢၼ် ဢမ်ႇမီးၽႂ်တၼ်းၼႆလႄႈ သွင်ၾၢႆႇမီးလွင်ႈထဵင်မေႃးၵၼ် ၊ၾၢႆႇသိုၵ်းတဢၢင်း 3 ၵေႃႉၼၼ်ႉ လုၵ်ႉပေႃႉထုပ်ႉသႂ်ႇ မၼ်းၸၢႆး တီႈႁိူၼ်းၼၼ်ႉ ၵမ်းလဵဝ်။
ၵဵဝ်ႇၵပ်း လွင်ႈသိုၵ်းတဢၢင်း သၢႆႈတႅၼ်း ပၼ်ၵႃႈယူတ်းယႃ ၸၢႆးၽူင်းၼႆႉသေ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ တိတ်းတေႃႇၸူး ၽူႈၶၢၼ်ပၢၵ်ႇ TNLA ၵေႃႈ ဢမ်ႇလႆႈ။
သိုၵ်းတဢၢင်း TNLA 3 ၵေႃႉ ဢၼ်တႃႉသူဝ်းပေႇ ဢွၼ်ႁူဝ်မႃးၼၼ်ႉ တပ်ႉၶဝ် ပၵ်းဝႆႉတီႈတႃႈၶၢႆ ၼႂ်းဢိူင်ႇမိူင်းပႃး ၼႆႉၵူၺ်း ၼင်ႇၵဝ်ႇ ဝႃႈၼႆ။
