ထေႃႈလႃႈၵျီႈလမ်းၼိုင်ႈ ပဵၼ်ၽေးၵိုင်ႉၵၢင်ႉပိၼ်ႈ တီႈသႅၼ်ဝီ မီးၵူၼ်းမၢတ်ႇၸဵပ်း 3 လူႉတၢႆ 1။
မိူဝ်ႈဝႃး ဝၼ်းတီႈ 21/6/2023 ၶၢဝ်းယၢမ်းၵၢင်ၼႂ် 8 မူင်းၶိုင်ႈ ထေႃႈလမ်းၼိုင်ႈ ပိၼ်ႈ ၽွင်းၵႂႃႇႁဵတ်းသူၼ် ႁိမ်းဝၢၼ်ႈႁူဝ်မိူင်း ဢိူင်ႇၸႄႈဢူ ၼႂ်းၸႄႈဝဵင်းသဵၼ်ဝီ မီးၵူၼ်းမၢတ်ႇၸဵပ်း 3 ၵေႃႉ လူ့တၢႆထင်တီႈ 1 ၵေႃႉ ။
ၽူႈၶဝ်ႈၸုမ်းၸွႆႈထႅမ်တူင်ႇဝူင်းၵူၼ်း ဝဵင်းသႅၼ်ဝီ ( အနှိုင်းမဲ့ကုသိုလ်) ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ပဵၼ်သဵၼ်ႈတၢင်းၵႂႃႇ ႁူဝ်မိူင်း ႁူဝ်မိၼ် ပဵၼ်ၼႂ်းၵႄႈၼၼ့်ၶႃႈဢေႃႈ။ ၶဝ်လုၵ့်တီႈဝၢၼ်ႈသေ တေၵႂႃႇသူၼ်ႁဵတ်းၼၼ်ၶႃႈဢေႃႈ။ လႆႈဝႃႈၵႂႃႇပဵၼ်ၽေးတီႈ တၢင်းၵႂႃႇသူၼ်ၶႃႈဢေႃႈ။ တေမီးမွၵ်ႈ 4 ၵေႃ့ၼႆ့ၶႃႈ ။ 3 ၵေႃ့တႄ့ဢမ်ႇပေႃးပဵၼ်သင်ၶႃႈ။ ၵေႃ့ၼိုင်ႈတႄ့လူတၢႆၵႂႃႇၶႃႈဢေႃႈ။ ၺႃးၵွၵ်းႁူဝ်မၼ်းဢေႃႈ။ တေမီးမွၵ်ႈ ဢႃယု 60 ပၢႆ ပဵၼ်ၼၢင်းယိင်းၶႃႈဢေႃႈ။ မၼ်းပဵၼ်သဵၼ်ႈတၢင်းၵႂႃႇသူၼ် ပဵၼ်တၢင်းလိၼ် တၢင်းမၼ်းၵေႃႈ ၾူၼ်တူၵ်းဝႆ့သေ ၶႂ်ႈၵွႆဝႆ့ၶႃႈဢေႃႈ။ မၼ်းတေပဵၼ်တၢင်းမိုၼ်ႈၶႃႈ ငိၼ်းၶဝ်ဝႃႈတႄ့ ယွၼ့်ထေႃႈၶိုၼ်းမႄးႁူၼ်တၢင်းလင် လႄႈၸင်ႇပဵၼ်ၽေးၵိုင်ႉၵၢင်ႉ ၼႆၶႃႈဢေႃႈ ” – ဝႃႈၼႆ။
ၽွင်းၶၢဝ်းၼႆ့ ပဵၼ်ၽွင်းၸဝ်ႈသူၼ်ၸဝ်ႈၼႃးၶဝ် ၽုၵ်ႇမၢၵ်ႇၶဝ်ႈတဝ်ႈၼမ့်။ ၵမ်ႈၼမ် တေဢွၼ်ၵၼ်ၶီႇထေႃႈတဵမ်လမ်းသေၵႂႃႇႁႆႈၼႃးသူၼ်။ မၢင်တီႈ သဵၼ်ႈတႃႈသၢႆတၢင်း ဢမ်ႇလီသေ ပဵၼ်ၽေးၵိုင်ႉၵၢင်ႉ ထိုင်မီးၵူၼ်း မၢတ်ႇၸဵပ်းလူႉတၢႆ။
မိူဝ်ႈဝၼ်းတီႈ 14/6/2023 ၼၼ်ႉၵေႃႈ ၵႃးတၢင်ႇၶဝ်ႈၵၢပ်ႇလမ်းၼိုင်ႈ ပိၼ်ႈၶႂမ်ႈၼိူဝ် သဵၼ်ႈတၢင်းလူင် ၼွင်ၶဵဝ် – လွၵ်ႉၸွၵ်ႇ ႁိမ်ႈၵုင်းမၢၵ်ႇမူင်ႈ( သရက်ကုန်းရွာ) ဢၼ်ယၢၼ်ၵႆ ဝဵင်းၼွင်ၶဵဝ် 6 လၵ်း ၼၼ်ႉသေ ၵူၼ်းႁေႃႈၵႃး လူႉတၢႆထင်တီႈ။
