ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃး ၵူၼ်းမိူင်းၽၵ်းၵႃႇ ၼႂ်းမိူင်းႁူမ်ႈတုမ် လူႉတၢႆယွၼ်ႉပၢင်တိုၵ်းသိုၵ်းသိူဝ် ဢမ်ႇယွမ်း 2 မိုၼ်ႇ ။
ပေႃးတူၺ်းၼႂ်းသဵၼ်ႈမၢႆဢၼ် ISP Myanmar ဢွၵ်ႇဝႆႉၼၼ်ႉၸိုင် တိူင်းၸႄႈၵႅင်းၼႆႉ လူႉတၢႆ 1,208 ၵေႃႉ ၼမ်သုတ်းၼႂ်းၸိုင်ႈမိူင်း၊ ၸႄႈမိူင်းယၢင်းလႅင်သမ်ႉၵူၼ်းမိူင်း လူႉတၢႆ 159 ၵေႃႉ ၼမ်သုတ်းထိ 3 သေ ၸိုင်ႈမိူင်းတႆးတႄႉ လူတၢႆ 152 ၵေႃႉ ၼမ်သုတ်းထိ 5 ၶွင်ပတ်းပိုၼ်ႉၸိုင်ႈမိူင်း ။
ပေႃးၼပ်ႉတူၺ်း လိူၼ်ၵျၼ်ႊၼိဝ်ႊရီႊ တေႃႇထိုင် လိူၼ်မေႊ ပီၼႆႉ ၶၢဝ်းတၢင်း 5 လိူၼ် ၵူၼ်းမိူင်းႁူမ်ႈတုမ်လူႉတၢႆ ယွၼ်ႉပၼ်ႁႃပၢင်တိုၵ်း မီး 748 ၵေႃႉၼႆယဝ်ႉ။
ထိုင်မိူဝ်ႈလဵဝ်ၵေႃႈ ၸုမ်းသိုၵ်းမၢၼ်ႈတင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်းလႄႈသင် ၸုမ်းသိုၵ်းၸၢဝ်းၶိူဝ်းၼင်ႇၵၼ်လႄႈသင် သိုၵ်းမၢၼ်ႈတင်း PDF လႄႈသင် တိုၵ်ႉၶဵင်ႈၶႅင်ၵၢၼ်သိုၵ်းၵၼ်ဝႆႉ။
ယွၼ်ႉပၢင်တိုၵ်းသေ ၵူၼ်းမိူင်းလႆႈတူၵ်းၵိၼ်းၸွမ်းႁၢဝ်ႈႁႅင်းသေဢမ်ႇၵႃး လူႉသုမ်းပႃးသၢႆၸႂ်တင်းၼမ်လႄႈ ၵူၼ်းမိူင်းၾၢႆၶုၼ်ၶဝ် တုၵ်းယွၼ်းႁႂ်ႈ ၵိုတ်းယိုတ်းပၢင်တိုၵ်းပၼ်ဝႆးဝႆးၼႆယဝ်ႉ။
ၵူၼ်းၸၢႆးၼႂ်းပိုၼ်ႉတီႈၸႄႈဝဵင်းၾၢႆၶုၼ်ၵေႃႉၼိုင်ႈ လၢတ်ႈတီႈတွႆႇႁွၵ်ႈဝႃႈ – “ ပေႃးပဵၼ်ပၢင်တိုၵ်းမႃးမိူဝ်ႈလႂ်ၵေႃႈ သိုၵ်းမၢၼ်ႈၶဝ်ၼႆႉ မႃးဢဝ်တီႈယူႇ ၸွမ်းၼႂ်းဝၢၼ်ႈၼႂ်းဝဵင်းတႃႇသေႇယဝ်ႉ ၊ ယဝ်ႉၵေႃႈ တီႉၺွပ်းၵူၼ်းမိူင်းပဵၼ်တူဝ်ယိူဝ်ႇၵေႃႈႁဵတ်း ။ မၢင်ၵေႃႉ ၺႃးယိုဝ်းတၢႆ။ၵူၼ်းမိူင်းႁဝ်း ဢမ်ႇႁူႉၸွမ်းလွင်ႈသင်လူး။ လႆႈၶၢမ်ႇတၢႆယွၼ်ႉၶဝ်လၢႆလၢႆ ။ပေႃးပဵၼ်လႆႈ ယႃႇႁႂ်ႈတိူဝ်ႉၶိူၵ်ႈပႃးၵူၼ်းမိူင်းတေလီဢေႃႈ” – ဝႃႈၼႆ။
မိူၼ်ၼင်ႇ လႅၼ်လိၼ်တႆး – ယၢင်းလႅင်ၼႆႉ ၵေႃႈ သိုၵ်းမၢၼ်ႈတင်း PDF ပိုတ်းယိုဝ်းၵၼ်ႁၢဝ်ႈႁႅင်းလႄႈ ၵူၼ်းမိူင်းၽၵ်ၵႃႇ လႆႈၶၢႆႉဢွၵ်ႇပၢႆႈၽေး ၼပ်ႉႁူဝ်မိုၼ်ႇ။
