လွၵ်းၵၢတ်ႇ သိုဝ်ႉၶၢႆပိင် တီႈထုင်ႉပူင်း ၸႄႈဝဵင်းတူၼ်ႈတီး ပဵၼ်ၵၢၼ်မႃးလႄႈ ၸဝ်ႈသူၼ်ၸဝ်ႈၼႃး ဢွၼ်ၵၼ်ႁႃပိင်ၶၢႆ  ။

ၼႂ်းလိူၼ်ၵျုၼ်ႊၼႆႉ ၼၢႆးၼႃႈ(ပွႆးၸႃး) မႃး ၵပ်းသိုပ်ႇသိုဝ်ႉပိင် တီႈထုင်ႉပူင်း ၸႄႈဝဵင်းတူၼ်ႈတီး ၸဝ်ႈသူၼ် ၸဝ်ႈၼႃး  ဢွၼ်ၵၼ် လူင်းတူင်ႈလူင်းၼႃးသေ ႁႃပိင်ၶၢႆ  လႆႈငိုၼ်းၶဝ်ႈၼိုင်ႈၾၢႆႇၼိုင်ႈတၢင်း။

ၼၢင်းယိင်းၵူၼ်း ထုင်ႉပူင်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၵူႈပွၵ်ႈ ပိင်ၼႆႉမီးၶၢဝ်ႇမၼ်းဝႃႈ ၼိုင်ႈၸွႆႉလႂ် 6 မိုၼ်ႇပျႃး။  ၵမ်းၼႆႉတႄႉ ပဵၼ်ၵႂႃႇ 8 မိုၼ်ႇပျႃး။ ၵွပ်ႈၼၼ် ၵူၼ်းႁႃပိင်ၶၢႆ ၼမ်မႃးၼႃႇယဝ်ႉ။ ပိင်ပေႃး ၶႂ်ႈမူၺ်ႉ ယဝ်ႉ ဢေႃႈ ။ မိူဝ်ႈဢွၼ်တၢင်း ၼိုင်ႈၵေႃႉ ႁႃလႆႈမွၵ်ႈ ၸွႆႉ ၸွႆႉပၢႆ ၸိူဝ်းၼႆႉဢေႃႈ။  ” – ဝႃႈၼႆ။

မိူဝ်ႈလဵဝ် တီႈထုင်ႉပူင်းၼႆႉ မီးၼၢႆးၼႃႈ လႄႇႁႃသိုဝ်ႉပိင် ပေႃးလႆႈမႃးၵေႃႈ ၶိုၼ်းသိုပ်ႇၶၢႆပၼ် ၵူၼ်းၸိူဝ်းလုၵ်ႉတၢင်ႇဝၢၼ်ႈတၢင်ႇဝဵင်းမႃးသိုဝ်ႉၸိူဝ်းၼၼ်ႉ ၼႆယဝ်ႉ။

ၼွၵ်ႈလိူဝ် ထုင်ႉပူင်းယဝ်ႉ မိူၼ်ၼင်ႇ  ထုင်ႉႁၢႆးယႃႈ လႄႈ ထုင်ႉၸၢမ်ၵႃး ၸိူဝ်းၼႆႉၵေႃႈ ၵူၼ်းပိုၼ်ႉတီႈ ႁႃပိင်ၶၢႆ တႃႇငိုၼ်းၶဝ်ႈ ၾၢႆႇၼိုင်ႈတၢင်းၼိုင်ႈ လႆႈႁူႉၼင်ႇၼႆ။  

ပိင်ၼႆႉ ၵူၼ်းမိူင်းၶႄႇ လႄႇႁႃသိုဝ်ႉၼႂ်းမိူင်းတႆးမႃးၸဵမ်မိူဝ်ႈပၢၼ်လႂ်။ ပီပူၼ်ႉမႃး ၶဝ်ႁႃသိုဝ်ႉတၢင်းမိူင်းတႆးပွတ်းႁွင်ႇ ပွတ်းဢွၵ်ႇၵူၺ်းသေတႃႉ ပီၼႆႉတႄႉ လူင်းမႃးသိုဝ်ႉထိုင်ပွတ်းၸၢၼ်းလၢမ်းထိုင်ထုင်ႉၼွင်ႁၢႆးယႃႈ။

ပီႈၼွင်ႉၶႄႇဢဝ်မိူဝ်းၶၢႆၶိုၼ်းမိူင်းၶႄႇ – ဢဝ်ႁဵတ်းၵိၼ်ၽၵ်း၊ ဢဝ်ႁဵတ်းယႃႈယႃတႃႇတၢင်းပဵၼ်လိူတ်ႈၶိုၼ်ႈ၊ တၢင်းပဵၼ်ယဵဝ်ႈဝၢၼ်၊ တၢၵ်ႇႁႅင်ႈတမ်ၽွင်ႁဵတ်းၼမ်ႉၽၵ်းၵိၼ်တွၼ်ႈတႃႇၵူၼ်းပဵၼ်ႁိူဝ်ႉမူၺ်ႈႁႅင်းဢႄႇ  ဝႃႈၼႆ။

မိူင်းတႆးၼႆႉ ၼမ်ႉလိၼ်ႁိၼ်ၽႃၶႅမ်ႉ တူင်ႈႁႆႈလွၵ်းၼႃး ဢၼ်မီးပိင်ၼၼ်ႉပွင်ႇဝႃႈ ပဵၼ်လွၵ်းၼႃးဢၼ်မီးၾုၼ်ႇငႂ်ႈၶႅမ်ႉ၊ မၢၵ်ႇၶဝ်ႈတဝ်ႈၼမ်ႉ ပူင်းၶွၼ်ႈ မီးၼမ်ႉလႅမ်ႉဝၢၼ်၊ ၼႃးဢၼ်ၺႃးၾုၼ်ႇထၢတ်ႇ ၸႂ်ႉယႃႈၶႃႈမူင်ႈ ၶႃႈမႅင်းၼမ်ၼၼ်ႉ ပိင်ၵေႃႈႁၢႆ ပႃၵေႃႈတၢႆ ၊ ၾုၼ်ႇငႂ်ႈလိၼ်သူၼ်ႁႆႈၼႃးၵေႃႈဢမ်ႇမီး ။