ၵူၼ်းပၢႆႈၽေးသိုၵ်း ဝဵင်းၵျွၵ်ႉမႄး 5 ႁဵင်ပၢႆ ပႆႇၸၢင်ႈပွၵ်ႈၶိုၼ်းႁိူၼ်းယေးၵၼ် မီးၶၢဝ်းတၢင်း 2 ပီယဝ်ႉ ယွၼ်ႉပၼ်ႁႃ ၸုမ်း ဢူၺ်းလီပွတ်းႁွင်ႇ TNLA, SSPP လႄႈ RCSS ပိုတ်းယိုဝ်းၵၼ်ႁၢဝ်ႈႁႅင်း။
တႄႇဢဝ်ႁူဝ်ပီ 2021 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် မီးၶၢဝ်းတၢင်း 2 ပီယဝ်ႉ ၵူၼ်းပိုၼ်ႉတီႈ ၸဵင်ႇႁွင်ႇဝၼ်းတူၵ်း ဝဵင်း ၵျွၵ်ႉမႄး ၸိုင်ႈတႆးပွတ်းႁွင်ႇ ပၢႆႈၽေးသိုၵ်းမႃး ႁူဝ်ၵူၼ်း 5,300 ပၢႆ ပႆႇၸၢင်ႈပွၵ်ႈၶိုၼ်းႁိူၼ်းယေးၵၼ် ယွၼ်ႉၼႂ်းပိုၼ်ႉတီႈ ပႆႇ မီးလွင်ႈၼိမ်သဝ်း။
ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈၶိုၼ်းႁိူၼ်းယေးၵၼ် တိုၵ်ႉဢွၼ်ၵၼ်ၶၢတ်ႈယူႇ ၼႂ်းဝဵင်းၶႃႈ။ ယၢပ်ႇၽိုတ်ႇလိူဝ်ႁႅင်း လွင်ႈၵႃႈၶၢတ်ႇႁိူၼ်း၊ ၵႃႈၵိၼ်ယႅမ်ႉ ၸိူဝ်းၼႆႉၶႃႈဢေႃႈ။ ၸုမ်း ယိပ်းၵွင်ႈၵၢင်ႇ ၼႂ်းပိုၼ်ႉတီႈၵေႃႈ ၸုမ်းၼိုင်ႈဝႃႈ ပွၵ်ႈမႃးလႃႈ။ ၸုမ်းၼိုင်ႈသမ်ႉဝႃႈ ယႃႇၼႅတ်ႈပွၵ်ႈ ပေႃးပွၵ်ႈမႃး ပႆႇၸၢင်ႈဢဝ် ပုၼ်ႈၽွၼ်း လႆႈတဵမ်ထူၼ်ႈ။ ၶဝ်တေဢုပ်ႇဢူဝ်းငူပ်ႉငီႉၵၼ်ထႅင်ႈၵွၼ်ႇၼႆၶႃႈဝႃႇ”- ဝႃႈၼႆ။
ယွၼ်ႉၵႃႈၶၢတ်ႇႁိူၼ်း လွင်ႈၵိၼ်ယႅမ်ႉ ၸိူဝ်းၼႆႉသမ်ႉ ၵပ်ႉၵိၼ်းယၢပ်ႇၽိုတ်ႇလိူဝ်ႁႅင်းမႃး ၵူႈလိူၼ်လႄႈ ၵူၼ်းပၢႆႈၽေးသိုၵ်း မၢင် ၸိူဝ်း ဢမ်ႇပွင်ပဵၼ်လႆႈသေ ဢွၼ်ၵၼ်ပွၵ်ႈၶိုၼ်းမိူဝ်း ၵမ်ႈၽွင်ႈ ၸိူဝ်းၼႆႉၵေႃႈ မီးယူႇ။ ယွၼ်ႉဝႃႈ ၵႃႈၶၢတ်ႈႁိူၼ်းသမ်ႉ တေႃႇ လိူၼ် လႆႈပၼ် တီႈဢေႇသုတ်း ဢမ်ႇယွမ်း 3 မိုၼ်ႇပျႃး၊ ပေႃးပဵၼ်ႁိူၼ်းလီသမ်ႉ မွၵ်ႈ 1 သႅၼ်ပျႃး ၸိူဝ်းၼႆႉ လႆႈပၼ်ယူႇၵူႈ လိူၼ် ဝႃႈၼႆ။
ယၢမ်းလဵဝ် သဵၼ်ႈမၢႆ ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး ဢၼ်ပႆႇၸၢင်ႈပွၵ်ႈၶိုၼ်းႁိူၼ်းယေး ၽႂ်မၼ်းၼၼ်ႉ မိူၼ်ၼင်ႇ ဢိူင်ႇ ၶိုမ်းသမ်ႉ တေပဵၼ်ဝၢၼ်ႈၶိုမ်းၵဝ်ႇ လင်ႁိူၼ်း 122 လင် ၽူႈၸၢႆး 178 ၵေႃႉ ယိင်း 268 ၵေႃႉ ႁူမ်ႈ 446 ၵေႃႉ။ ဝၢၼ်ႈၶိုမ်းမႂ်ႇ လင်ႁိူၼ်း 103 လင် ၽူႈၸၢႆး 202 ၵေႃႉ ယိင်း 275 ၵေႃႉ ႁူမ်ႈ 477 ၵေႃႉ။ ဝၢၼ်ႈႁိူၼ်းဝူဝ်း လင်ႁိူၼ်း 51 လင် ၸၢႆး 121 ၵေႃႉ ယိင်း 136 ၵေႃႉ ႁူမ်ႈ 257 ၵေႃႉ။ ဝၢၼ်ႈၼမ်ႉၽဵတ်ႇ လင်ႁိူၼ်း 29 လင် ၸၢႆး 51 ၵေႃႉ ယိင်း 62 ၵေႃႉ ႁူမ်ႈ 113 ၵေႃႉ ။
ဢိူင်ႇပုင်းလူင်သမ်ႉ ဝၢၼ်ႈပုင်းလူင် လင်ႁိူၼ်း 135 လင် ၸၢႆး 234 ၵေႃႉ ယိင်း 295 ၵေႃႉ ႁူမ်ႈ 529 ၵေႃႉ။ ပဵင်းသၢႆး လင် ႁိူၼ်း 14 လင် ၸၢႆး 25 ၵေႃႉ ယိင်း 28 ၵေႃႉ ႁူမ်ႈ 53 ၵေႃႉ။ ပုင်းၼွႆႉ လင်ႁိူၼ်း 26 လင် ၸၢႆး 64 ၵေႃႉ ယိင်း 65 ၵေႃႉ ႁူမ်ႈ 129 ၵေႃႉ။ ၼမ်ႉမင်း လင်ႁိူၼ်း 23 ၵေႃႉ ၸၢႆး 57 ၵေႃႉ ယိင်း 67 ၵေႃႉ ႁူမ်ႈ 124 ၵေႃႉ။ ဝၢၼ်ႈပွၵ်ႈ လင်ႁိူၼ်း 61 လင် ၸၢႆး 174 ၵေႃႉ ယိင်း 202 ၵေႃႉ ႁူမ်ႈ 376 ၵေႃႉ။ ဝၢၼ်ႈပၢင်ႁုင်း လင်ႁိူၼ်း 70 လင် ၸၢႆး 167 ၵေႃႉ ယိင်း 201 ၵေႃႉ ႁူမ်ႈ 368 ၵေႃႉ။
ဢိူင်ႇႁူးသူၼ်သမ်ႉ ဝၢၼ်ႈၼႅမ်းသႆး လင်ႁိူၼ်း 86 လင် ၸၢႆး 170 ၵေႃႉ ယိင်း 206 ၵေႃႉ ႁူမ်ႈ 376 ၵေႃႉ။ ဝၢၼ်ႈႁူးသူၼ် လင်ႁိူၼ်း 180 လင် ၸၢႆး 259 ၵေႃႉ ယိင်း 345 ၵေႃႉ ႁူမ်ႈ 604 ၵေႃႉ။ ဝၢၼ်ႈတူၼ်ႈႁိူၵ်ႈ လင်ႁိူၼ်း 85 လင် ၸၢႆး 167 ၵေႃႉ ယိင်း 195 ၵေႃႉ ႁူမ်ႈ 362 ၵေႃႉ။ ဝၢၼ်ႈၵဵင်ၵၢႆႇ လင်ႁိူၼ်း 63 လင် ၸၢႆး 117 ၵေႃႉ ယိင်း 164 ၵေႃႉ ႁူမ်ႈ 281 ၵေႃႉ။ ၵဵင်းလေႃး လင်ႁိူၼ်း 63 လင် ၸၢႆး 118 ၵေႃႉ ယိင်း 149 ၵေႃႉ ႁူမ်ႈ 267 ၵေႃႉ။
ဢိူင်ႇပၢင်ႁူႈသမ်ႉ ဝၢၼ်ႈပၢင်ႁူႈ လင်ႁိူၼ်း 43 လင် ၸၢႆး 82 ၵေႃႉ ယိင်း 86 ၵေႃႉ ႁူမ်ႈ 168 ၵေႃႉ။ ပၢင်တွင်းၼိူဝ် လင်ႁိူၼ်း 10 လင် ၸၢႆး 32 ၵေႃႉ ယိင်း 20 ၵေႃႉ ႁူမ်ႈ 52 ၵေႃႉ။ ပၢင်တွင်းတႂ်ႈ လင်ႁိူၼ်း 17 လင် ၸၢႆး 28 ၵေႃႉ ယိင်း 37 ၵေႃႉ ႁူမ်ႈ 65 ၵေႃႉ။ ဢိူင်ႇလွႆၵူင်သမ်ႉ ဝၢၼ်ႈမွၵ်ႇငႃးၸၢင်ႉ လင်ႁိူၼ်း 78 လင် ၸၢႆး 145 ၵေႃႉ ယိင်း 184 ၵေႃႉ ႁူမ်ႈ 329 ၵေႃႉ။
ႁူဝ်ႁုပ်ႈတင်းမူတ်း ႁူမ်ႈၵၼ် လင်ႁိူၼ်း 1,259 လင် ၸၢႆး 2,391 ၵေႃႉ ယိင်း 2,985 ၵေႃႉ ႁူမ်ႈၵၼ် 5,376 ၵေႃႉ ၼႆယဝ်ႉ။
ဢၼ်ပွၵ်ႈမိူဝ်းၶိုၼ်းယူႇၵမ်ႈၽွင်ႈၼၼ်ႉသမ်ႉ ဝၢၼ်ႈၶိုမ်းၵဝ်ႇ လင်ႁိူၼ်း 12 လင် ၸၢႆး 22 ၵေႃႉ ယိင်း 22 ၵေႃႉႁူမ်ႈ 44 ၵေႃႉ။ ဝၢၼ်ႈၶိုမ်းမႂ်ႇ လင်ႁိူၼ်း 16 လင် ၸၢႆး 11 ၵေႃႉ ယိင်း 14 ၵေႃႉ ႁူမ်ႈ 25 ၵေႃႉ။ ဝၢၼ်ႈႁိူၼ်းဝူဝ်း လင်ႁိူၼ်း 1 လင် ၸၢႆး 1 ၵေႃႉ ယိင်း 2 ၵေႃႉ ႁူမ်ႈ 3 ၵေႃႉ။ ဝၢၼ်ႈႁူးသူၼ် လင်ႁိူၼ်း 5 လင် ၸၢႆး 3 ၵေႃႉ ယိင်း 2 ၵေႃႉ ႁူမ်ႈ 5 ၵေႃႉ ၼႆယဝ်ႉ။
ၼွၵ်ႈလိူဝ်ၼၼ်ႉ ၸွမ်းၼင်ႇ ဝၢၼ်ႈတႆး တၢင်းၶဝ်ႈဢွၵ်ႇဝၢၼ်ႈ ၸိူဝ်းၼႆႉ သိုၵ်းတဢၢင်း TNLA ႁဵတ်းၵဵၵ်ႉ တင်ႈဝႆႉထႅင်ႈ မိူၼ် ၼင်ႇ ဝၢၼ်ႈတွင်ႇပလူဝ်ႉ 1 တီႈ၊ ဝၢၼ်ႈၵဵင်ၵၢႆႇ 2 တီႈ၊ ဝၢၼ်ႈႁူၼ်းသူၼ် 3 တီႈ၊ ဝၢၼ်ႈၶိုမ်းၵဝ်ႇ 2 တီႈ၊ ဝၢၼ်ႈၵိဝ်ႇလွႆ 1 တီႈ လႄႈ ဝၢၼ်ႈပွၵ်ႈ 2 တီႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ