လႅၼ်လိၼ် တႆး-ယၢင်းလႅင် ပဵၼ်ပၢင်တိုၵ်းႁၢဝ်ႈႁႅင်းလႄႈ ၵူၼ်းပၢႆႈၽေး ယၢပ်ႇၽိုတ်ႇ ယႃႈယႃလႄႈၶဝ်ႈၼမ်ႉတၢင်းၵိၼ်။
တႄႇဢဝ် ႁၢင်လိူၼ် ၾႅပ်ႊပိဝ်ႊရီႊၼၼ်ႉမႃး သိုၵ်းမၢၼ်ႈတင်း PDF ပိုတ်းယိုဝ်းၵၼ် တီႈလႅၼ်လိၼ် တႆး-ယၢင်းလႅင် ႁၢဝ်ႈႁႅင်းလႄႈ ၵူၼ်းပၢႆႈၽေးတီႈၸႄႈဝဵင်းၾၢႆၶုၼ် ထူပ်းတၢင်းယၢပ်ႇၽိုတ်ႇ ယွၼ်ႉဢမ်ႇလႆႈႁပ်ႉ လွင်ႈၵမ်ႉထႅမ်ၶိုတ်းတၼ်း။ ၸုမ်းၸွႆႈတူင်ႇဝူင်းၵူၼ်းၵေႃႈ ဢမ်ႇၶဝ်ႈထိုင်လႆႈငၢႆႈငၢႆႈလႄႈ မိူဝ်ႈလဵဝ် ယၢပ်ႇၽိုတ်ႇ ၶဝ်ႈၼမ်ႉတၢင်းၵိၼ်လႄႈ ယႃႈယႃ ၼႆယဝ်ႉ။
ၽူႈတူင်ႉၼိုင် ၼႂ်းၵေႃႇမတီႇၸုမ်းၸွႆႈၵူၼ်းပၢႆႈၽေးၾၢႆၶုၼ်ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ မိူဝ်ႈလဵဝ် သဵၼ်ႈတၢင်းၼၼ်ႉ ၵူၼ်းယၢမ်ႈၵႂႃႇမႃးတႃႇသေႇၵေႃႈ ဢမ်ႇၶႂ်ႈႁတ်းၵႂႃႇယဝ်ႉ။တေႃႈၼင်ႇ မီးၸုမ်းၸွႆႈတူင်ႇဝူင်းၵူၼ်းၵႂႃႇယူႇၵေႃႈ လွင်ႈပိုတ်းယိုဝ်းၵၼ် ဢမ်ႇၵိုတ်းလူင်။ယဝ်ႉၵေႃႈ ပိၵ်ႉ ပႅတ်ႈသဵၼ်ႈတၢင်းႁေၵွၼ်ႇဢေႃႈ။ပေႃးမိူၼ်ၼၼ် ၵူၼ်းတႃႇတေၵႂႃႇသူင်ႇ ၵမ်ႉထႅမ်ပၼ် ၶဝ်ႈၼမ်ႉတၢင်းၵိၼ်ၶဝ်ၵေႃႈ ႁိုဝ်တေငၢႆႈ ။ထႅင်ႈလွင်ႈၼိုင်ႈၵေႃႈ ၶဝ်ႈသၢၼ်ၼႆႉ လႆႈသူင်ႇပၼ်ၸွမ်းၼင်ႇ ၸုမ်းသိုၵ်းၶဝ် တတ်းမၵ်းပၼ်ၵူၺ်းဢေႃႈ။ယွၼ်ႉၼၼ်လႄႈ ဢမ်ႇၵုမ်ႇထူၼ်ႈၵၼ်ၶႃႈ ” – ဝႃႈၼႆ။
ၵူၼ်းပၢႆႈၽေး တီႈၸႄႈဝဵင်းၾၢႆၶုၼ်ၼႆႉ ႁူဝ်ၼပ်ႉၵူၼ်း မီး 7 ႁဵင်ပၢႆသေ ပၢႆႈသွၼ်ႈယူႇဝႆႉ တၢင်းတူၵ်းၸႄႈဝဵင်းၾၢႆၶုၼ် ၼႆယဝ်ႉ။
ၽူႈတူင်ႉၼိုင် ၼႂ်းၵေႃႇမတီႇၸုမ်းၸွႆႈၵူၼ်းပၢႆႈၽေးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈလဵဝ် ၵူၼ်းပၢႆႈၽေးၼႆႉ တေမီးမွၵ်ႈ ၸဵတ်းႁဵင်ၼႆႉဢေႃႈ။ပေႃးၼပ်ႉတူၺ်း ဝၢၼ်ႈၶဝ်ၼႆ တေမီးမွၵ်ႈ 8 ဝၢၼ်ႈၼႆႉၵႂႃႇ။ထိုင်မိူဝ်ႈလဵဝ် ပႆႇႁတ်းမိူဝ်းတူၺ်းတီႈႁိူၼ်းၶဝ်ၶိုၼ်း။ယဝ်ႉၵေႃႈ တၢင်းဢွၵ်ႇၾၢႆၶုၼ်လႄႈ မိူင်းပၢႆးၵေႃႈ မီးၽွင်ႈဢေႃႈ ၵူၼ်းပၢႆးၽေးၼႆႉ ” – ဝႃႈၼႆ။
ပၢင်တိုၵ်း တီႈလႅၼ်လိၼ်တႆး-ယၢင်းလႅင် မိူၼ်ၼင်ႇ ပၢင်လွင်း ၊ ၾၢႆၶုၼ် လႄႈ မိူင်းပၢႆး ၸိူဝ်းၼႆႉ ၾၢႆႇသိုၵ်းမၢၼ်ႈ ၸႂ်ႉၶိူင်ႈမ်ိၼ် လေႃႇတိုၵ်းႁၢဝ်ႈႁႅင်းလႄႈ ႁဵတ်းႁႂ်ႈ တီႈယူႇတၼ်းသဝ်းၵူၼ်းမိူင်း မိူၼ်ၼင်ႇ ႁူင်းႁဵၼ်း ၊ႁူင်းယႃ ၊ ႁိူၼ်းယေး ၊ဝတ်ႉဝႃးၽႃသိူဝ်ႇ လႄႈ ဢွင်ႈတီႈၵူၼ်းပၢႆႈၽေး ၸိူဝ်းၼႆႉ မီးလွင်ႈတုမ်ႉတိူဝ်ႉ လူႉသုမ်းတင်းၼမ်။
