ၵူၼ်းပၢႆႈၽေးသိုၵ်း တီႈဝဵင်းလၢႆးၶႃႈ ဢွၼ်ၵၼ်တုၵ်းယွၼ်း ႁႂ်ႈသိုၵ်း SSPP – RCSS ၸဵဝ်းၵိုတ်းတိုၵ်းၵၼ် ၶၼ်ၽႂ်း ယွၼ်ႉ ပဵၼ်ၶၢဝ်းႁဵတ်းၵၢၼ်လႄႈ သင်ဢမ်ႇလႆႈၽုၵ်ႇသွမ်ႈပီၼႆႉ တႃႇပီၼႃႈမႃး တေဢမ်ႇမီးသင်ၵိၼ် တေပႃးၵၼ်ယၢပ်ႇၽိုတ်ႇ ၵိၼ်းၸႂ်တုၵ်ႉၶ ဢမ်ႇႁၢင်ႉဝႃႈၼႆ။
တႄႇဢဝ် ဝၼ်းတီႈ 31/5/2023 ယၢမ်းၵၢင်ၼႂ် တေႃႇထိုင်ယၢမ်းလဵဝ် မီး 3 ဝၼ်းယဝ်ႉ ၵူၼ်းဝၢၼ်ႈၵုင်းၼိဝ်ႉ ဢိူင်ႇၼႃးမၢင်း ဢွၼ်ၵၼ်ငိူင်ႉပၢႆႈမႃးသွၼ်ႈဝႆႉ တီႈဝတ်ႉ/ ၵျွင်းပၢင်ႇ ဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်း ၸဵမ် သင်ၶၸဝ်ႈလႄႈ ၵူၼ်းဝၢၼ်ႈ ပၢႆႈမႃးႁူဝ်ၵူၼ်း 74 ၵေႃႉ ထေႃႈ 12 လမ်း ယွၼ်ႉသဵင်ၵွင်ႈမၢၵ်ႇလူင် တူၵ်းတႅၵ်ႇ ႁိမ်းဝၢၼ်ႈ လႄႈၵူဝ်ယဵၼ်းပဵၼ်ပၢင်တိုၵ်း ၵူဝ်ဢမ်ႇတၼ်းပၢႆႈပူၼ်ႉ ဝႃႈၼႆ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် မီးၵူၼ်းပႂ်ႉဝၢၼ်ႈ 8 ၵေႃႉ။ လိူဝ် ၼၼ်ႉ ပၢႆႈမႃးမူတ်း ၵူၼ်းဝၢၼ်ႈ 69 ၵေႃႉ သင်ၶၸဝ်ႈ 5 တူၼ် ႁူမ်ႈၵၼ် 74 ၵေႃႈ။ ယွၼ်ႉၶူဝ်းလၢႆး – ၶူဝ်းၶဵဝ်ၶဝ် ငႃၵၼ်ၸမ် ႁႅင်းၼႃႇ။ ယဝ်ႉၵေႃႈ မၢၵ်ႇလူင်တူၵ်းတႅၵ်ႉႁိမ်းဝၢၼ်ႈလႄႈ ၵူၼ်းဝၢၼ်ႈၵူဝ် ဢမ်ႇတၼ်းပၢႆႈလွတ်ႈလႄႈ ၸင်ႇဢွၼ်ၵၼ် ငိူင်ႉပၢႆႈ ဢွၵ်ႇမႃးထႃႈ”- ဝႃႈၼႆ။
ယၢမ်းလဵဝ် ပဵၼ်ၶၢဝ်းလူဝ်ႇၽုၵ်ႇသွမ်ႈ သူၼ်ႁႆႈၼႃးယဝ်ႉလႄႈ ၵွပ်ႈၼႆ တုၵ်းယွၼ်းထိုင် ႁႂ်ႈသိုၵ်းသွင်ၸုမ်း ၸဵဝ်း ၵိုတ်းတိုၵ်းၵၼ် ၶၼ်ၽႂ်းသေၵမ်း ဝႃႈၼႆ။
“ၵူၼ်းမိူင်းၼႆႉ ယၢမ်းလဵဝ် ပဵၼ်ၶၢဝ်းလူဝ်ႇၽုၵ်ႇသွမ်ႈၶဝ်ႈၶႄႇ မႅၼ်ႈၽွင်းလူဝ်ႇႁဵတ်းမၼ်းၼႃႇယဝ်ႉ။ လူဝ်ႇၶူၼ်ႉလူဝ်ႇထႆ ၽုၵ်ႇ ၵႂႃႇတိၵ်းတိၵ်းၼၼ်ႉယဝ်ႉ။ တုၵ်းယွၼ်းထိုင် ယႃႇႁႂ်ႈၶဝ် တိုၵ်းတေႃးၵၼ် ႁႂ်ႈပေႃႈမႄႈၵူၼ်းမိူင်းႁဝ်း လႆႈၽုၵ်ႇသွမ်ႈလွတ်ႈ လွတ်ႈလႅဝ်းလႅဝ်း ပေႃးဢမ်ႇလႆႈၽုၵ်ႇသွမ်ႈပီၼႆႉ ပီတေမႃး မၼ်းဢမ်ႇၸၢင်ႈၵိၼ်သင် တေတုၵ်ႉၶဢမ်ႇ ႁၢၼ်ႉ။ သင်ၶဝ်ယိုဝ်း ၵၼ်ၶိုၼ်ႈမႃးတႄႉ ၵူၼ်းမိူင်းယိုင်ႈၶႅၼ်းတေတုၵ်ႉၶ လိူဝ်ၵဝ်ႇထႅင်ႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼင်ႇၼႆ။
ဝၢၼ်ႈၵုင်းၼိဝ်ႉၼႆႉ တင်းမူတ်း မီးလင်ႁိူၼ်း 38 လင် ယူႇၼႂ်းဢိူင်ႇၼႃးမၢင်း ၾၢႆႇဢွၵ်ႇတဵင်း ယၢၼ်ဝဵင်းမွၵ်ႈ 8 လၵ်း။ ယၢမ်းလဵဝ် မီးၵူၼ်းပႂ်ႉဝၢၼ်ႈဝႆႉ 8 ၵေႃႉ ဝႃႈၼႆ။
တႄႇဢဝ် ဝၼ်းတီႈ 11/4/2023 ၼၼ်ႉမႃး သိုၵ်း SSPP တင်း RCSS ပိုတ်းယိုဝ်းၵၼ်မႃး ႁၢဝ်ႈႁႅင်းတၢင်းၾၢႆႇဢွၵ်ႇဝဵင်း လၢႆးၶႃႈ။ ႁၢၼ်ႉတေႃႇထိုင် ယၢမ်းလဵဝ် သဵင်ၵွင်ႈတိုၵ်ႉတႅၵ်ႇယူႇ မၢင်တီႈမၢင်ပွၵ်ႈ။ ယၢမ်းလဵဝ် သိုၵ်းမၢၼ်ႈ၊ RCSS ၊ SSPP ၊ သိုၵ်းဝႃႉ ၊ ပျီႇတူႉၸိတ်ႉမၢၵ်ႇၵႅင်း၊ ပျီႇတူႉၸိတ်ႉၼႃးယၢႆးလႄႈ ပျီႇတူႉၸိတ်ႉမၢၼ်ႈပၢင်ႇ 758 ၸိူဝ်းၼႆႉ တူင်ႉ ၼိုင်ၵႂႃႇမႃး ယူႇဝႆႉ တင်းၼမ် တၢင်းၾၢႆႇဢွၵ်ႇဝဵင်း ၼႂ်းၵႄႈသဵၼ်ႈတၢင်း လၢႆးၶႃႈ – ၶူဝ်လမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ