သိုၵ်းမၢၼ်ႈလမ်းတီႉပေႃႈမႄႈလုၵ်ႈဢွၼ်ႇ ၼႂ်းၸိုင်ႈတႆးပွတ်းႁွင်ႇလႄႈပွတ်းၸၢၼ်း ဢၼ်သူင်ႇလုၵ်ႈလၢင်း ၸဝ်ႈၵဝ်ႇႁဵၼ်းလိၵ်ႈတၢင်းဢွၼ်ႇလၢႆး ၸွမ်း ပၢႆးပၺ်ႇၺႃႇတႂ်ႈ လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG။

တင်ႈတႄႇလိူၼ်ဢေႊပရိူဝ်ႊပူၼ်ႉမႃးတေႃႇထိုင်ယၢမ်းလဵဝ်သိုၵ်းမၢၼ်ႈ ၸွပ်ႇသွၵ်ႈႁႃတီႉၺွပ်း  လုၵ်ႁဵၼ်း တီႈဝဵင်းလူင်တူၼ်ႈတီး၊ ၼွင်ၶဵဝ်၊ ၵျွၵ်ႉမႄး၊ လႃႈသဵဝ်ႈ ၸိူဝ်းၼႆႉသေၵုမ်းၶင်ဝႆႉၼႂ်းၶွၵ်ႈ။

ပေႃႈမႄႈလုၵ်ႈဢွၼ်ႇႁဵၼ်းတီႈဝဵင်းမူႇၸေႊလၢတ်ႈတီႈၽူႈတွႆႇႁွၵ်ႈဝႃႈ -“ တီႈဝဵင်းမူႇၸေႊၵေႃႈပေႃႈမႄႈ လုၵ်ႈ ႁဵၼ်း ၺႃးတီႉ 2 ၵေႃႉယဝ်ႉ။ သိုၵ်းမၢၼ်ႈ ပလိၵ်ႈမၢၼ်ႈ ၼႆႉလုၵ်ႉၼေႇပျီႇတေႃႇ မႃးၵမ်းသိုဝ်ႈ တႃႇယိပ်း လွင်ႈ ၼႆႉ။ ၼႂ်းမိုဝ်းၶဝ်းၵေႃႈ မီးသၢၵ်ႈသေႇလၵ်းထၢၼ် ဢၼ်ပေႃႈမႄႈလုၵ်ႈဢွၼ်ႇ ဢုပ်ႇၵၼ်ဝႆႉတင်းႁူင်းႁဵၼ်း NUG ၼၼ်ႉၵမ်းသိုဝ်ႈယဝ်ႉၶႃႈ။ လၵ်းထၢၼ်ဢၼ်ဢူၼ်းၵႃႈႁူင်းႁဵၼ်း ၊ ဢူၼ်းၶဝ်ႈတၢင်းယေးငိုၼ်း မိူင်းထႆး ၸိူဝ်းလူးၵွၼ်ႇၶႃႈဢေႃႈ။ မၼ်းလီတူၵ်းၸႂ်ဝႆႉၼင်ႇၵဝ်ႇ”- ဝႃႈၼႆ။

ယွၼ်ႉပိူဝ်ႈသိုၵ်းမၢၼ်ႈလိုပ်ႈလမ်းတီႉၺွပ်း လုၵ်ႈႁဵၼ်းၸၼ်ႉသုင် ဢၼ်ႁဵတ်း CDM  ဢမ်ႇၵႂႃႇႁဵၼ်းတီႈႁူင်းႁဵၼ်းလူင်ပွင်ၸိုင်ႈ တႂ်ႈသိုၵ်းမၢၼ်ႈၵုမ်းၵမ်ၼၼ်ႉမႃးၶိူဝ်းယႂ်း လႄႈ ၵူၼ်းမိူင်း ဝဵင်းမူႇၸေႊ  ဢမ်ႇႁတ်းႁဵၼ်းလိၵ်ႈၸွမ်း NUG ၊ ပေႃးဢမ်ႇၶၢႆႉတီႈ လုၵ်ႈလၢင်းသမ်ႉတေဢမ်ႇလႆႈႁဵၼ်းလိၵ်ႈ၊ ၵွပ်ႈၼႆႈ ၵမ်ႈၽွင်ႈထိုင်တီႈလႆႈၶၢႆႉပၢႆႈၵႂႃႇယူႇတၢင်ႇတီႈတၢင်ႇဝဵင်း ၊ ၵမ်ႈၽွင်ႈပၢႆႈၵႂႃႇသူင်ႇလုၵ်ႈႁဵၼ်းလိၵ်ႈ တၢင်းမိူင်းၶႄႇ မိူင်းထႆးၵေႃႈမီးဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈသိုၵ်းမၢၼ်ႈတႄႉ ဢမ်ႇပိုၼ်ၽၢဝ်ႇသင်  ။

ႁွင်ႈၵၢၼ်ၶၢဝ်ႇ RFA တႄႉပိုၼ်ၽၢဝ်ႇဝႆႉဝႃႈ ပီၵၢၼ်ႁဵၼ်းလိၵ်ႈပီ 2023-2024 ၼႆႉ လုၵ်ႈႁဵၼ်း တီႈႁူင်းႁဵၼ်းလူင်ပွင်ၸိုင်ႈ လူတ်းယွမ်းလိူဝ်ပီယဝ်ႉမႃးၼႆႉ  7 သႅၼ်ပၢႆ ဝႃႈၼႆ။